މާނަގަލާ މަލްޓި ސްޕީޝީޒް ހެޗަރީ މަޝްރޫޢުއަކީ މަސްވެރިކަމުގެ ސިނާއަތް އިތުރަށް ތަރައްޤީކުރުމަށް ފެށޭ މުހިއްމު މަސައްކަތެއްކަމަށް ފިޝަރީޒް މިނިސްޓަރ ހަސަން ރަޝީދު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ މެރިކަލްޗަރ ނުވަތަ ކަނޑުފަޅުގައި ކަނޑުގެ ދިރުންތައް އަލާކޮށް ދިރުވުމުގެ މަސައްކަތް ގއ. މާނަގަލާގައި ތަރައްޤީކުރާ މަލްޓި ސްޕީޝީޒް ހެޗަރީ ތަރައްޤީކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައެވެ.
މިއެއްބަސްވުމުގައި ސޮއިކުރެއްވީ ފިޝަރީޒް މިނިސްޓްރީގެ ފިނޭންސް އެގްޒެކްޓިވް އީނާސް ނާސިރުއާއި، ދުބާއީގެ ކުންފުންޏެއް ކަމަށްވާ އެކުއާ ބްރިޖް ގުރޫޕްގެ ސީއީއޯ މޮހައްމަދު ތަބީޝްއެވެ.
މިރަސްމިއްޔާތުގައި ރައްޔިތުންގެ މަޖިލީހުގެ ހުވަދު އަތޮޅުގެ ދާއިރާތައް ތަމްސީލު މެމްބަރުންނާއި މިނިސްޓްރީ އޮފް ފިޝަރީޒް އެންޑް އެގްރިކަލްޗަރގެ އިސް ބޭފުޅުން ބައިވެރިވެވަޑައިގެންނެވިއެވެ.
މާނަގަލާގައި ތަރައްޤީކުރުމަށް ހަމަޖެހިފައިވާ މަލްޓި ސްޕީޝީޒް ހެޗަރީގެ މަޝްރޫއަކީ ވޯލްޑް ބޭންކުގެ އެހީގެ ދަށުން ފިޝަރީޒް މިނިސްޓްރީން ހިންގާ "ސަސްޓެއިނަބަލް ފިޝަރީޒް ރިސޯސް ޑިވެލޮޕްމެންޓް ޕްރޮޖެކްޓް"ގެ ތެރެއިން ހިންގާ މަޝްރޫޢުއެކެވެ.
"އެކުއަކަލްޗަރ" ނުވަތަ ކަނޑުގެ ބާވަތްތައް އާލާކުރާ ހެޗަރީއަކީ، މިބާވަތްތައް އުފަންވެ، އަލާތްތައް ހެދި ބޮޑުވުމަށް ބޭނުންވާ އެންމެހާ ނިޒާމުތައް ފޯރުކޮށްދޭ ތަނަކަށްވާތީ، މި މަސައްކަތުގެ އެންމެ މުހިއްމު ތަަނަކީ ހެޗަރީއެވެ. މިމަޝްރޫޢުގެ ދަށުން މާނަގަލާގައި އިމާރަތްކުރަންޖެހޭ ތަންތަނުގެ މަސައްކަތް އެއްކޮށް ނިމިފައިވާކަމަށް ފިޝަރީޒް މިނިސްޓްރީން މަޢުލޫމާތުދެއެވެ.
މަލްޓި ސްޕީޝީޒް ހެޗަރީ ތަރައްޤީކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރ ވިދާޅުވީ ރާއްޖޭގެ މަސްވެރިކަން އިތުރަށް ތަރައްޤީކުރުމަށް ދިމާވާ އެންމެ ބޮޑު ގޮންޖެހުމަކީ ކަނޑުމަހުގެ ޑިމާންޑް އިތުރުވެ، މަހުގެ ބާވަތްތަކުގެ ސްޓޮކް މަދުވުންކަމަށެވެ. އަދި ރީނދޫ އުރަހަ ކަންނެލީގެ ސްޓޮކް ދެމެހެއްޓެނިވި ފެންވަރަކަށް ގެންދަން މިހާރު ބާނާ ވަރަށްވުރެ 22 އިންސައްތަ މަދުކުރަން ޖެހޭކަމަށެވެ. އަދި ކަޅުބިލަ މަސްވެސް މިހާރު ބާނާވަރަށް ވުރެ އިތުރަށް ބާނައިފިނަމަ މަސްވެރިކަމަށް ވަރަށް ބޮޑު ނޭދެވޭ އަސަރެއް ކުރިމަތިވެގެންދާނެކަން މިނިސްޓަރ ފާހަގަކުރެއްވިއެވެ.
"އަޅުގަނޑުމެން ދޮށީގައި ދެމެހެއްޓެނިވި މަސްވެރިކަން ކުރި ނަމަވެސް، ބޮޑުދާޖހައިގެން އެއްވެސް ބެލުމެއްނެތި ކުދިމަސްތައް ނަގާތީ މަސްތައް ބޮޑުވުމުގެ ފުރުސަތެއް ނުލިބޭ. އެހެންކަމުން އަޅުގަނޑުމެންގެ މަސްވެރިކަމުގެ މަޝްރޫޢު އޮތީ ނާޒުކު ފައްތަރެއްގައި. އަޅުގަނޑުމެން ރަނގަޅަށް މެނޭޖް ނުކުރެވިއްޖެނަމަ މަސްވެރިކަމަސް ގޮންޖެހުންތަކެއް ކުރިމަތިވާނެ" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ރާއްޖޭގެ ފަރުތަކުގައި އުޅޭ މަސްތަކުގެ ބާވަތްތައް ގިނަ ކަމުގައިވީ ނަމަވެސް އެމަސްތަކުގެ އަދަދު ނިސްބަތުން ވަރަށް މަދުކަމަށެވެ. ފާނަ ފަދަ ބާވަތްތައް ގިނައިން ބާނަން ފެށުމުން އެފަދަ ބާވަތްތަކުގެ އަދަދު ވަރަށް ބޮޑަށް މަދުވެ މިފަދަ ބާވަތްތަކުގެ މަސްވެރިކަމަށް ބޮޑު ނޭދެވޭ އަސަރެއް ކުރިމަތިވާކަމަށްވެސް މިނިސްޓަރ ވިދާޅުވިއެވެ.
"މިކަން ހައްލުކުރެވެން އޮތް ގޮތަކީ ފާނަ ފަދަ ބާވަތައްތައް ނަގައިގެން އާޓިފިޝަލީ އާލާކުރުން. އޭގެ ކުދި ފާނަ އުފެއްދުނީމަ އަޅުގަނޑުމެންނަށް ބޭނުންވަރަކަށް ކާންދީގެން އެބާވަތްތައް ބޮޑުކުރެވޭނެ. އެހެންކަމުން އެކުއަކަލްޗަރ މަޝްރޫއުގެ ދަށުން މަސްވެރިކަމަށް މިހާރު ދިމާވާ މައްސަލަތައް ހައްލުވެގެންދާނެ" މިނިސްޓަރ ވިދާޅުވިއެވެ.
މާނަގަލާ ހެޗަރީން އުފައްދާ މައިގަނޑު ބާވަތްތަކަކީ ކުދި ހުއިފިލަނޑާއާއި، ފާނައިގެ އިތުރުން މަސްވެރިކަން ކުރަން ބޭނުންކުރާ އެން ކަމަށް ފިޝަރީޒް މިނިސްޓްރީން މަޢުލޫމާތުދެއްވައެވެ. މާނަގަލާގައި މި މަޝްރޫޢު ހިންގުމަށް ބޭނުންވާ އިމާރާތްތަކުގެ މަސައްކަތް ނިންމުމަށް ހަމަޖެހިފައިވާ މުއްދަތަކީ 12 މަސް ދުވަހެވެ. އަދި ހެޗަރީ ހިންގުމަށް ދޫކުރާނީ 20 އަހަރު ދުވަހަށްކަމަށް ފިޝަރީޒް މިނިސްޓްރީން ވިދާޅުވެއެވެ.
މެރިކަލްޗަރ ނުވަތަ ކަނޑުފަޅުގައި ކަނޑުގެ ދިރުންތައް އަލާކޮށް ދިރުވުމުގެ މަސައްކަތް ރާއްޖޭގައި ތަރައްޤީކޮށް ފުޅާކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ކ. މަނިޔަފުށީގައި މެރިކަލްޗަރ ޓްރެއިނިންގ ސެންޓަރެއް ތަރައްޤީކުރުމުގެ މަސައްކަތްވެސް އެމިނިސްޓްރީން ދަނީ ކުރަމުންނެވެ.