މިފްކޯގެ ކެޕޭސިޓީ އިތުރުކުރުމަށް ކުރަމުންދާ މަސައްކަތްތަކާއެކު އެކުންފުންޏަށް ގަންނަ މަހުގެ އަދަދު އިތުރުވެ، މިހާތަނަށް މަސްވެރިންގެ އަތުން ދެ ލައްކަ ޓަނަށްވުރެ ގިނަ މަސް ގަނެފައިވާކަމަށް މިފްކޯގެ ސީއީއޯ އިސްމާއިލް ފައުޒީ ވިދާޅުވެއްޖެއެވެ.
ޓީވީއެމުން ގެނެސްދޭ 'އެޖެންޑާ' ޕްރޮގްރާމްގައި ވާހަަކަދައްކަވަމުން ސީއީއޯ އިސްމާއިލް ވަނީ ކެޕޭސިޓީ އިތުރުކުރުމަށް ކުރަމުންދާ މަސައްކަތްތަކާއެކު މަސް ގަނެފައިވާ އަދަދުތަކަށް އައިސްފައިވާ ކުރިއެރުންތައް ފާހަގަކޮށްފައެވެ. އެގޮތުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން މިހާތަނަށް 201840 (ދެ ލައްކަ އެއްހާސް އަށްސަތޭކަ ސާޅީސް) ޓަނުގެ މަސް މިފްކޯއިން މަސްވެރިންގެ އަތުން ގަނެފައިވާ ކަމަށް ފައުޒީ ވިދާޅުވިއެވެ. އަދި ކިރުވި މަހަށް މަސްވެރިންނަށް 3 ބިލިއަނަށްވުރެ ގިނަ ރުފިޔާ ދޫކޮށްފައިވާކަމަށްވެސް އިސްމާއިލް ވިދާޅުވިއެވެ.
އިސްމާއިލް ފާހަގަކުރެއްވިގޮތުގައި މިއީ ކުރީ ސަރުކާރުގެ 5 އަހަރު މިފްކޯއިން ކިރާފައިވާ 170392 (އެއްލައްކަ ހަތްދިހަހާސް ތިންސަތޭކަ ނުވަދިހަ ދެ) ޓަނުގެ މަހާއި އަޅާބަލާއިރު ވަރަށް ބޮޑަށް އިތުރު އަދަދެކެވެ.
"ކަލެކްޓް ކުރެވުނު އަދަދަކަށް ބަލާއިރު، ކުރީ ސަރުކާރުގެ 5 އަހަރު ކަލެކްޓުކޮށްފައިވަނީ 170392 ޓަނުގެ މަސް، މި ސަރުކާރުގެ މިހާ ހިސާބަށް އައި އިރު، 201840 ޓަނުގެ މަސް ކަލެކްޓުކޮށް، މަސްވެރިންނަށް 3 ބިލިއަން 424 މިލިއަން ރުފިޔާ ގަތް މަހަށް މަސްވެރިންނަށް ދިނިން، މަސައްކަތްތަކެއް ކުރެވިއްޖެ، އެފިޝެންސީ ގެނައުމަށް މަސައްކަތްތަކެއް ކުރެވިއްޖެ،" އިސްމާއިލް ވިދާޅުވިއެވެ.
މިފްކޯގެ ކެޕޭސިޓީ މިހާރަށްވުރެ އިތުރުކުރުމަށް ކުރަމުންދާ މަސައްކަތްތަކާއި ގުޅޭ ތަފްސީލްތައް ދެމުން އިސްމާއިލް ވިދާޅުވީ، މިހާރު ކުރިއަށްދާ މަޝްރޫއުތަކާއެކު މިފްކޯގެ ކެޕޭސިޓީއަށް ބޮޑެތި ކުރިއެރުންތަކެއް ލިބިގެންދާނެ ކަމަށެވެ. އެގޮތުން ފެލިވަރު މަސް ކާރުޙާނާއިން މަސް ގަންނަ މިންވަރު މިހާރުވެސް އިތުރުވެފައިވާކަން އިސްމާއިލް ފާހަގަކުރެއްވިއެވެ.
" ވަރަށް ބޮޑަށް މަރާމާތަށް ބޭނުންވެފައި ފެލިވަރު އޮތީ، ތަރައްޤީގެ ގިނަ މަސައްކަތްތަކެއް ދަނީ ކުރެވެމުން، މިހާ ހިސާބަށް އައި އިރު، 41 ހާސް ޓަނުގެ މަސް ފެލިވަރުން ގަނެފިން، ކުރީ ސަރުކާރުގެ 5 އަހަރު އެތަނުން ގަނެފައިވަނީ 19 ހާސް ޓަނުގެ މަސް، މަސައްކަތްތަކެއް ކުރެވިފައިވާކަން މިކަމުންވެސް ދައްކައިދޭ،" އިސްމާއިލް ވިދާޅުވިއެވެ.
މިފްކޯއިން އަންނަނީ ގޮންޖެހުންތަކާއިއެކުވެސް މަސްވެރިންނަށް ދިމާވެފައިވާ މައްސަލަތައް ހައްލުކުރުމަށް މަސައްކަތް ކުރަމުންނެވެ. އެގޮތުން ކޫއްޑޫ އަޕްގްރޭޑުކުރުމުގެ މަސައްކަތްތަކާއި، މަސް ގަންނާނެ އިތުރު ބޯޓުތައް ހޯދުމުގެ މަސައްކަތް މިފްކޯއިން ދަނީ ކުރަމުންނެވެ.
މި ގެންނަ ބަދަލުތަކާއިއެކު މަސް ކިރުވުމުގައި މިހާރު ހުރި ދަތިތަކަށް ހައްލު ލިބިގެންދާނެކަމަށް މިފްކޯއިން ދެކެއެވެ.