ޗައިނާއަކީ ރާއްޖޭގެ ތަރައްޤީގެ އެންމެ މުހިންމު އެއް ބައިވެރިޔާ، ގުޅުން ހީނަރެއް ނުވާނެ: ރައީސް

ޗައިނާއަކީ ރާއްޖޭގެ ތަރައްޤީގެ އެންމެ ބޮޑު އެއް ބައިވެރިޔާކަމަށާއި، ރާއްޖެއާއި ޗައިނާގެ ގުޅުން ކުރިމަގުގައިވެސް މިގޮތުގައި ދެމިއޮންނާނެ ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ ޗައިނާއާއި ރާއްޖެއާއި ދެމެދު ސިޔާސީ ގުޅުން ޤާއިމުކުރިތާ 50 އަހަރު ފުރުން ފާހަގަކުރުމަށް، ޗައިނާ އެމްބަސީން ބޭއްވި ރަސްމިއްޔާތުގައި ބައިވެރިވެވަޑައިގެން ވާހަކަފުޅުދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ ސިޔާސީ ގުޅުން ޤާއިމުކުރުމުގެ ކުރީގައިވެސް ޗައިނާގެ އެހީތެރިކަން ރާއްޖެއަށް ލިބެމުން އައިކަމަށެވެ. ނަމަވެސް ސިޔާސީ ގުޅުމަށްފަހުގައި، ޚާއްސަކޮށް ވޭތުވެދިޔަ 30 އަހަރަކީ ޗައިނާގެ ބޮޑެތި އެހީތަކެއް ރާއްޖެއަށް ލިބިގެންދިޔަ އަހަރުތަކެއްކަމަށެވެ.

އުމްރާނީގޮތުން ރާއްޖޭގެ ތަރައްޤީގެ އެންމެ މުހިންމު އެއް ބައިވެރިއަކީ ޗައިނާކަން ރައީސް ފާހަގަކުރެއްވިއެވެ. މީގެ 30އަހަރު ކުރިން ޗައިނާގެ އެހީގައި މާލޭގައި ކުރިއަށްގެންދިޔަ ބޯހިޔާވަހިކަމުގެ ބޮޑު މަޝްރޫޢު "ސިނަމާލެ ފްލެޓް" މަސައްކަތަކީ ޗައިނާގެ މިފަދަ ބޮޑެތި އެހީތަކުގެ ފެށުންކަމަށެވެ. އޭގެފަހުން މިހާތަނަށް ރާއްޖޭގެ ތަރައްޤީގެ ބޮޑެތި ބިޔަ މަޝްރޫޢުތަކުގައި އެގައުމުގެ ފުރިހަމަ އެހީ ރާއްޖެއަށް ލިބިގެންދިޔަކަން ރައީސް ފާހަގަކުރެއްވިއެވެ.

"ޗައިނާ މޯލްޑިވްސް ފްރެންޑްޝިޕް ބްރިޖާ، ހިޔާ 7000 ޔުނިޓާއި ވެލާނާ އެއަރޕޯޓްގެ މަސައްކަތަކީ ރާއްޖެއަށް މުހިންމު މަސައްކަތްކެއް. އަދި ޗައިނާގެ އެހީގައި ރާއްޖޭގެ ފޮރިން މިނިސްޓްރީގެ އިމާރާތް ޒަމާނީކޮށް ބަދަލުކުރުމާއި މިހާރު ފަށަށާފައިވާ، ރަށްރަށަށް ސާފު ފެން ފޯރުކޮށްދިނުމުގެ މަސައްކަތްތައް ފާހަގަކޮށްލެވޭ." ރައީސް ވިދާޅުވިއެވެ.

ރައީސްވަނީ މިއަހަރުގެ ކުރީކޮޅު، ޗައިނާއާއި ރާއްޖެއާއި ދެމެދު ވެފައިވާ އެއްބަސްވުމުގެ ދަށުންވެސް މުހިންމު މަސައްކަތްތަކެއް ކުރިއަށްގެންދާކަން ފާހަގަކުރައްވާފައެވެ. އެއީ 62 މިލިއަން ޑޮލަރުގެ އެހީއެކެވެ. އުމްރާނީ ތަރައްޤީގެ އިތުރުން، ރާއްޖޭގެ އާމްދަނީ އެންމެ ބޮޑަށް ބަރޯސާވާ ފަތުރުވެރިވެރިކަމުގެ ވިޔަފާރިއާއި، އަދި އެހެނިހެން އިޤްތިޞާދީ ދާއިރާތަކުން އެ ޤައުމުން ވަމުންދާ އެހީ ފާހަގަކޮށް ރައީސްވަނީ ޝުކުރު އަދާކުރައްވާފައެވެ.

"ރާއްޖޭގެ ތަރައްޤީގެ ދަތުރުގައި ޗައިނާގެ އެހީ އަބަދުވެސް ލިބޭ. ވޭތުވެދިޔަ 30 އަހަރު މި ގުޅުން ވަނީ އިތުރަށް ބަދަހިވެފަ. މިފަދަ ގުޅުމެއް ރާއްޖެއާމެދު ބާއްވާތީ ޗައިނާގެ ސަރުކާރަށް ޝުކުރު އަދާކުރަން." ރައީސް ވިދާޅުވިއެވެ.

ދަރުބާރުގޭގައި ބޭއްވި ރަސްމިއްޔާތަކީ ރާއްޖެއާއި ޗައިނާގެ ސިޔާސީ ގުޅުމަށް 50 އަހަރު ފާހަގަކުރުން އަދި، ޗައިނާގެ މިނިވަން ދުވަސް ފާހަގަކުރުމަށް ބޭއްވި ރަސްމިއްޔާތެކެވެ. ރައީސްވަނީ ޗައިނާގެ ރައީސް ޝީޖިންގޕިން އަށާއި، ޗައިނާގެ ރައްޔިތުންނަށް މި ދެ މުނާސަބާގެ ތަޙުނިޔާ ވިދާޅުވެފައެވެ.

ރާއްޖެއާއި ޗައިނާއާއި ދެމެދު ސިޔާސީ ގުޅުން ޤާއިމުކޮށްފައިވަނީ 1972ވަނަ އަހަރުއެވެ. ރައީސްވަނީ ކުރިއަށް އޮތް ތާނގައިވެސް މި ގުޅުން އިތުރަށް ބަދަހިވެގެންދާނެކަމުގެ ޔަގީންކަން ދެއްވާފައެވެ.