ރަޝިޔާ-ޔޫކްރެއިން ހަނގުރާމައިގައި ހައްޔަރުކޮށްފައިވާ 218 އަސީރުން ދެ ޤައުމުން ބަދަލު ކޮށްފިއެވެ. މި ހަނގުރާމައަށް އަށް މަސް ފުރުމާ ގާތްވެފައި ވާއިރު، ދެ ޤައުމުގެ މެދުގައި ބަދަލު ކޮށްފައި ވަނީ ހަނގުރާމައިގައި ހައްޔަރު ކޮށްފައިވާ އަންހެނުންނެވެ. މިއީ، ހަނގުރާމައިގައި ހައްޔަރު ކޮށްފައިވާ އަންހެނުން މި ފަދަ ގޮތަކަށް ދެ ޤައުމުގެ މެދުގައި ބަދަލު ކުރި ފުރަތަމަ ފަހަރެވެ.
އަސީރުން ބަދަލު ކުރުމުގެ ގޮތުން ޔޫކްރެއިނުން ވަނީ އެ ޤައުމުގެ ސިފައިން ހައްޔަރު ކޮށްފައިވާ ރަޝިޔާ ސިފައިންގެ 108 މީހުން މިނިވަން ކޮށްފައެވެ. ރަޝިޔާއިން މިނިވަން ކޮށްފައި ވަނީ ޔޫކްރެއިން ސިފައިންގެ 96 މީހުންނާއި، ޢާންމުންގެ 12 މީހުންނެވެ. މީގެ ތެރެއިން 37 މީހުންނަކީ މަރުޔޮޕޯލްގައި ހުންނަ އަޒޮވްސްޓާލް ސްޓީލް ވަރކްސް ކާރުޚާނާއިން ހައްޔަރު ކޮށްފައިވާ މީހުންނެވެ.
އަސީރުން ބަދަލު ކުރުމުގެ މަސައްކަތް ކާމިޔާބު ކަމާއެކު ކުރިއަށް ގެންދެވުމުން ވޮލޮޑޮމީރް ޒެލެންސްކީ ވަނީ އެ ކަމުގައި ބައިވެރިވި ހުރިހާ ފަރާތްތަކަށް ޝުކުރު އަދާ ކުރައްވާފައެވެ. ޔޫކްރެއިން ސިފައިން ހައްޔަރަށް ގެންދިޔަ ރަޝިޔާ ރައްޔިތުންގެ ތެރެއިން ބަޔަކު މިނިވަން ކޮށްފައި ވީ ނަމަވެސް، ރަޝިޔާގެ އިތުރު ސިފައިން ހައްޔަރު ކުރަން ޖެހޭ ކަމުގައި ޒެލެންސްކީ ވިދާޅުވިއެވެ.
"ރަޝިޔާ ސިފައިން ހައްޔަރު ކޮށްފައިވާ ޔޫކްރެއިނުގެ ރައްޔިތުން މިނިވަން ކުރެވޭނީ މި ފަދަ ގޮތަކަށް އަސީރުން ބަދަލު ކޮށްގެން. ރަޝިޔާއިން ހައްޔަރު ކޮށްފައިވާ އިތުރު މީހުން މިނިވަން ކުރަން މި ފަދަ ޕުރޮގުރާމުތައް ހިންގަން ޖެހޭ،" ޒެލެންސްކީ ވިދާޅުވިއެވެ.
ޔޫކްރެއިނުން މިހާތަނަށް މިނިވަން ކޮށްފައިވާ ރަޝިޔާ ރައްޔިތުންގެ ތެރޭގައި ހިމެނެނީ ފެބުރުވަރީ މަހު ޔޫކްރެއިނުގެ ސިފައިން ހިފެހެއްޓި ދޯނިފަހަރުގެ 72 ފަޅުވެރިން ކަމުގައި ރަޝިޔާއިން ބުނެއެވެ. އަދި، 12 ސިފައިންނެވެ. އެ މީހުން އަނބުރާ ޤައުމަށް ގެންދިޔުމުގެ މަސައްކަތް ފަށާފައިވާ ކަމުގައި ރަޝިޔާގެ ދިފާޢީ ވުޒާރާއިން ބުނެއެވެ.
ޔޫކްރެއިނުގެ ދާޚިލީ ވުޒާރާއިން ބުނީ، ރަޝިޔާއިން މިނިވަން ކޮށްފައިވާ އެ ޤައުމުގެ ރައްޔިތުންގެ ތެރޭގައި 2019ވަނަ އަހަރު ހައްޔަރު ކޮށްފައިވާ އަންހެނުންތަކެއް ވެސް ހިމެނޭ ކަމުގައެވެ. އަދި، އެ މީހުން ހައްޔަރު ކޮށްފައި ވަނީ ރަޝިޔާއާ ދެކޮޅަށް އަޑުއުފުލައި ބަސް ބުނުމުގެ ކުށުގައު ކަމުގައި އެ ވުޒާރާއިން ބުނެއެވެ.