ކ.ހިންމަފުށީގައި ހުންނަ އައްސޭރި ޖަލުގެ ފާރުމަތިން އަރައިގެން ފިލަން އުޅުނު ދެ ޤައިދީއަކު އަތުލައިގެންފިއެވެ.
މިކަން ހާމަކުރެއްވީ ކޮމިޝަނަރ އޮފް ޕްރިޒަންސް އަޙްމަދު މުޙައްމަދު ފުޅު މިރޭ ކުރެއްވި ޓްވީޓެއްގައެވެ. އަޙްމަދު ވިދާޅުވީ މިރޭ އައްސޭރި ޖަލުގެ ފާރުމަތިން ފުންމާލައިގެން ފިލަން އުޅުނު 2ގައިދީން ވަނީ ހިފަހައްޓާފައިކަމަށެވެ. މި ހާދިސާ ހިގާ ދިޔަގޮތް މިހާރު ބަލަމުންދާކަމަށާ، މިފަދަކަމެއް އިތުރަށް ތަކުރާރުނުވާނެ ގޮތަށް އަޅަންޖެހޭ ފިޔަވަޅުތައް އަޅުއްވާނެކަމަށް އަޙްމަދު ކުރެއްވި ޓްވީޓުގައި ވިދާޅުވެފައިވެއެވެ.
މިރޭ އައްސޭރި ޖަލުގެ ފާރުމަތިން ފުންމާލައިގެން ފިލަން އުޅުނު 2ގައިދީން ވަނީ ހިފަހައްޓާފައި. މި ހާދިސާ ހިގާ ދިޔަގޮތް މިދަނީ ބަލަމުން، އަދި މިކަން އިތުރަށް ތަކުރާރުނުވާނެ ގޮތަށް އަޅަންޖެހޭ ފިޔަވަޅު އެޅިގެންދާނެ
— Ahmed Mohamed (@ahumadhumohamed) October 17, 2022
އައްސޭރި ޖަލަކީ މޯލްޑިވްސް ކަރެކްޝަނަލް ސަރވިސްއިން ކުރިއަށް ގެންދާ ޤައިދީން ރިހިބިލިޓޭޓް ކުރުމުގެ މަސައްކަތުގެ ގިނަ މަސައްކަތްތަކެއް ހިންގަމުން ގެންދާ ޖަލެކެވެ. މިހާރުވެސް މިޖަލުގައި 200 އެއްހާ ގައިދީން ތިބިކަމަށް ކަރެކްޝަނުން ވިދާޅުވެއެވެ. ގައިދީން ރިހިބިލިޓޭޓްކޮށް އަނބުރާ މުޖުތަމައުއަށް ނެރުމުގެ ގޮތުން ތަފާތުގިނަ މަސައްކަތްތަކެއް ގައިދީންލައްވާ މިޖަލުގައި ކުރުވައެވެ. މިގޮތުން ދަނޑުވެރި ކަމުގެ މަސައްކަތާއި، އަތްތެރި މަސައްކަތްތަކާއި، ކުކުޅާއި ބަކަރި ގެންގުޅުމުގެ އިތުރުން ހިންމަފުށީގައި ހުންނަ ބައެއް ކުންފުނި ތަކުގައިވެސް ގައިދީންލައްވާ މަސައްކަތް ކުރުވައެވެ.
ރާއްޖޭގެ ޖަލުގެ ނިޒާމު ހަރުދަނާކޮށް ރަނގަޅުކުރުމަށް މިސަރުކާރުން ގިނަ މަސައްކަތްތައް ކުރައްވައެވެ. އެގޮތުން ޤައިދީންގެ ހައްޤުތައް ކަށަވަރުކުރތުމާއި ޖަލުގެ އިންތިޒާމުތައް ހަރުދަނާކުރުމުގެ މަސައްކަތް ފާހަގަކޮށްލެވެއެވެ. ރާއްޖޭގެ ޖަލުތަކުން މީހުން ފިލުމަކީ ޢާއްމުކޮށް ހިނގާކަމެއްނޫނެވެ.