މޯލްޑިވްސް މީޑިއާ ކައުންސިލް، އެމްއެމްސީން މިއަހަރު ދޭ ނޫސްވެރިކަމުގެ އެވޯޑް ރާއްޖޭގައި ހުންނަ ސަޢުދީ އެމްބަސީން ސްޕޮންސަރކޮށް އެކަމުގެ އެއްބަސްވުމުގައި ސޮއިކޮށްފިއެވެ. މިއީ ކޮންމެ އަހަރަކު މީޑިއާ ކައުންސިލުން ބާއްވަމުން އަންނަ ނޫސްވެރިކަމުގެ އެވޯޑް ބޭރު އެމްބަސީއަކުން ސުޕޮންސަރ ކުރި ފުރަތަމަ ފަހަރެވެ.
ނުސްވެރިކަމުގެ އެވޯޑުގެ ސަޕޯޓް ޕާޓްނަރއެއްގެ ގޮތުގައި ސައުދީ އެމްބަސީގެ ފަރާތުން ސޮއިކުރެއްވީ ރާއްޖޭގައި ހުންނަވާ ސައުދީ ސަފީރު މަތްރެކް ބިން ޢަބްދުﷲ އަލް ޢަޖާލީން އަލްދައުސަރީއެވެ. އަދި މީޑިއާ ކައުންސިލްގެ ފަރާތުން ސޮއިކުރެއްވީ އެކައުންސިލްގެ ރައީސް މުޙައްމަދު ޝަފާޢުއެވެ.
މީޑިއާ ކައުންސިލުން މިއަހަރު 12 ދާއިރާއަކުން އެވޯޑް ދިނުމަށް ވަނީ ނިންމާފައެވެ. އޭގެ ތެރޭގައި ތަހުގީގީ ނޫސްވެރިކަން، ދެމެހެއްޓެނިވި ތަރައްގީ އާއި އިޖުތިމާއީ، ސިޔާސީ، ޝަރުއީ އަދި ޤާނޫނީ، ވިޔަފާރިއާއި އިގުތިޞާދު، ކުޅިވަރު، ފޮޓޯ ޖާނަލިޒަމް، ވީޑިއޯ ޖާނަލިޒަމް، ގްރެފިކްސް އާއި އިލެސްޓްރޭޝަންސް، ފީޗާ، އެންމެ އުންމީދީ ނޫސްވެރިޔާ، އަދި އަހަރުގެ އެންމެ މޮޅު ނޫސްވެރިޔާ ހިމެނެއެވެ. މިއަހަރުގެ ނޫސްވެރިކަމުގެ އިނާމަށް 12 ދާއިރާއަކުން 82 ހުށަހެޅުން ލިބިފައިވާކަމަށް މީޑިއާ ކައުންސިލުން ވިދާޅުވިއެވެ.
ނޫސްވެރިކަމުގެ އެވޯޑު ދިނުމުގެ ބޭނުމަކީ، މީޑިއާގައި ހަރަކާތްތެރިވާ ފަރާތްތަކުން ތަބާވާންޖެހޭ ހަމަތަކާއި، އަޚްލާޤީ މިންގަނޑުތަކަށް ތަބާވެ، ރަނގަޅު ފެންވަރެއްގައި މަސައްކަތްކުރާ ދިވެހި ނޫސްވެރިންގެ މަސައްކަތް ފާހަގަކުރުމާއި، ނޫސްވެރިންގެ މެދުގައި އިތުބާރު ދެމެހެއްޓުމާއި، ދިވެހި ނޫސްވެރިންނަށް ހިތްވަރު ދިނުމުގެގޮތުންދޭ ނޫސްވެރިކަމުގެ އިނާމުގެ ކަންކަން ކަނޑައެޅިފައިވާ އުސޫލެއްގެ ތެރެއިން އިންސާފުވެރިކަމާއި ހަމަހަމަކަމާއެކު ކުރިއަށްގެންދިއުމެވެ.
މިއަހަރުގެ ނޫސްވެރިކަމުގެ އެވޯޑުގެ ސްޕޮންސަރުންގެ ތެރޭގައި ކޮންޓްރިބިއުޓިން ޕާޓްނަރަކީ ޔޫރޯ މާކެޓިންއެވެ. ޑިޖިޓަލް ޕާޓްނަރަކީ ދިރާގެވެ. އަދި ޓެލެކޮމިއުނިކޭޝަން ޕާޓްނަރަކަށް ހަމަޖައްސާފައިވަނީ އުރީދޫއެވެ.މިއަހަރުގެ އެވޯޑުގެ އޮޑިޓިން ޕާޓްނާއަކީ ކްރޯވްއެވެ. މީގެ އިތުރުންވެސް އިތުރު ފަރާތްތަކާއެކު ސުޕޮންސަރ އެއްބަސްވުމުގައި ކުރިއަށް އޮތްތަނުގައި ސޮއިކުރާނެކަމަށް އެމްއެމްސީން މަޢުލުމާތު ދެއްވައެވެ.
މީޑިއާ ކައުންސިލުން ދޭ ނޫސްވެރިކަމުގެ މިއަހަރުގެ އެވޯޑް ދިނުމަށް ނިންމާފައިވަނީ އަންނަ މަހުގެ ތެރޭގައެވެ.