އދ.ދިގުރަށަށް މިދިޔަ ބުދަދުވަހުގެ ރޭ އެރި އުދައިގައި އެރަށުގެ 6 ގެއަކަށް ގެއްލުންވެފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިން ހާމަކޮށްފިއެވެ.
އެންޑީއެމްއޭއިން ހާމަކުރިގޮތުގައި މިހާތަނަށް ލިބިފައިވާ މަޢުލޫމާތުތަކަށް ބަލާއިރު އެންމެ ބޮޑު ގެއްލުމެއް ލިބިފައިވަނީ އެރަށުގައި ބަނދަރުގައި ހުރި އޮޑި ދޯނިފަހަރަށެވެ. މީގެ އިތުރުން މީހުން ދިރިއުޅޭ ހަގެއެއްގައި ހިފާ ގެންގުޅޭ ސާމާނު ތަކަށާއި، ގެސްޓްހައުސްއެއްގައިވެސް ހުރި ހިފާ ގެންގުޅޭ ސާމާނަށްވަނީ ގެއްލުން ލިބިފައެވެ. މީގެ އިތުރުން އެރަށުގެ ފިހާރައަކަށްވެސް ލޮނުވަދެ ފިހާރައިގައި ހުރި މުދަލަށްވެސް ގެއްލުން ވެފައިވާ ކަމަށް ދިގުރަށު ކައުންސިލުން މަޢުލޫމާތު ލިބިފައިވާ ކަމަށް އެންޑީއެމްއޭއިން މަޢުލޫމާތުދެއެވެ. މިއުދައިގައި ދިގުރަށަށް ލިބުނު ގެއްލުންތަކުގެ ތަފްސީލް ރަށު ކައުންސިލުން ބަލަމުންދާ ކަމަށާއި މާދަމާގެ ނިއަލަށް މައުލޫމާތު އެއްކޮށް ނިމޭނެ ކަމަށް ލަފާކުރެވޭ ކަމަށް ކައުންސިލާ ހަވާލާދީ އެންޑީއެމްއޭއިން ހާމަކުރެއެވެ.
ސުނާމީގައި ވެސް މާބޮޑު ގެއްލުމެއް ވެފައިނުވާ ދިގުރަށަކީ އާންމުގޮތެއްގައި މޫސުން ގޯސްވާއިރު ވެސް އުދައަރާ ރަށެއް ނޫނެވެ. ރަށު މީހުން ބުނާގޮތުގައި ސުނާމީގެ ފަހުން މިގޮތަށް ރަށަށް ރާޅުއަރާފައެއް ނުވެއެވެ. އަދި ރެކޯޑުތައް ބުނާގޮތުންނަމަ އެރަށަކީ ސުނާމީގައި ވެސް މާ ބޮޑު ގެއްލުމެއް ވީރަށެއް ނޫނެވެ.
މިހާރު ރާއްޖެއަށް ކުރަމުންދާ ވިއްސާރައަކީ ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވުމުގެ ސަބަބުން ކުރާ ވިއްސާރައެކެވެ. މިވިއްސާރައިގައި އާދިއްތަ ދުވަހު ހެނދުނު 6 ޖެހުމާ ހަމައަށް އެންމެ ދެކުނުގެ ބައެއް ރަށްރަށް ފިޔަވައި އެކިހިސާބުތަކަށް ވިއްސާރަ ކުރާނެ ކަމަށާއި، ބައެއް ރަށްތަކަށް ބޯކޮށް ވާރޭ ވެހި ގުގުރުންވެސް އެކަށީގެންވާ ކަމަށް މޫސުމާބެހޭ ޤައުމީ އިދާރާއިން މަޢުލޫމާތުދެއެވެ. އަދި އެންމެ ދެކުނުގެ ބައެއް ރަށްތަކަށް ކެރީގެ އަސަރު ފޯރާނެ ކަމަށްވެސް އެއިދާރާއިން މަޢުލޫމާތުދެއެވެ. ހުޅަނގު ދެކުނާއި ހުޅަނގުން މެދުރާއްޖެތެރޭގެ އަތޮޅުތަކަށް ގަޑިއަކު 15 މޭލާއި، 25 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށާއި، އެހެން ހިސާބުތަކަށް ގަޑިއަކު 10މޭލާއި 20 މޭލާ ދެމެދުގެ ބާރުމިނުގައި ވައިޖެހޭނެ ކަމަށްވެސް މޫސުމާބެހޭ ޤައުމީ އިދާރާއިން ހާމަކުރެއެވެ. ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައްވެސް ގަދަވާނެ ކަމަށާއި ރާޅުގެ އުސްމިނުގައި 4 ފޫޓާއި 7 ފޫޓު ހުންނާނެ ކަމަށް އެއިދާރާއިން ހާމަކުރެއެވެ.
މިދުވަސްވަރަކީ މޫސުން ގޯސްވެ ގަވައި ޖެހެމުންދާ ދުވަސްރެއްކަމަށްވާތީ، ސިނަމާލޭ ބްރިޖާއި ލިންކް ރޯޑް ބޭނުންކުރާ ފަރާތްތަކުންވެސް ޚާއްސަ ސަމާލުކަމެއް ދިނުމަށް ފުލުހުން ވަނީ އިލްތިމާސްކުރައްވާފައެވެ. އަދި ވައިގަދަވާ ގަޑިތަކުގައި އުޅަނދުތަކުގެ ސްޕީޑް ކޮންޓްރޯލްކުރެވޭ މިންގަނޑެއްގައި ހިފެހެއްޓުމަށްވެސް އިރުޝާދުދީފައިވެއެވެ.
މި ދުވަސްވަރު، ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެ، ޚާއްޞަކޮށް އުތުރާއި މެދުރާއްޖެތެރޭގައި ވައިބާރުވެ ކަނޑުތައް ގަދަވާނެކަމަށް މޫސުމާ ބެހޭ ޤައުމީ އިދާރާއިން ލަފާކޮށްފައިވާތީވެ، ކަނޑު ދަތުރުކުރައްވާ ފަރާތްތަކުން މޫސުމަށް ސަމާލުވުމަށް އެމް.އެން.ޑީ.އެފުންވެސް ވަނީ އިލްތިމާސްކުރައްވާފައެވެ.