މޯލްޑިވްސް މީޑިއާ ކައުންސިލުން އެކުލަވާލި "ދިވެހި މީޑިއާގެ އަހުލާޤީ މިންގަނޑު" އިފްތިތާހްކޮށް މީޑިއާތަކުން އެކަން އެންޑޯސްކޮށް ސޮއިކޮށްފިއެވެ. މީޑިއާތަކުން އަމަލުކުރުމަށް ކަނޑައަޅާފައިވާ ކޯޑް އޮފް އެތިކްސްއަށް ބަދަލުތަކެއް ގެނެސްފައި މިވަނީ 11 އަހަރަށްފަހުއެވެ.
މިކަން އޮތީ މިއަދު ދިވެހިރާއްޖޭގެ އަޑުގެ ސެނެކޯ މާލަމުގައި ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތުގައި 60އަށްވުރެ ގިނަ އޮންލައިން، ޕްރިންޓް އަދި ބްރޯޑްކާސްޓިން މީޑިއާތަކުން ވަނީ ބައިވެރިވެފައެވެ.
މިކަމަށްޓަކައިބޭއްވި ރަސްމިއްޔާތުގައި މޯލްޑިވްސް މީޑިއާ ކައުންސިލްގެ ރައީސް މުޙައްމަދު ޝަފާއު ޙަސަން ވިދާޅުވީ އަލަށް އެކުލަވާލި ކޯޑް އޮފް އެތިކްސްގައި ނޫސްވެރިޔާގެ ޒިންމާ ބޮޑުވާނެކަމަށެވެ. އެގޮތުން ކަންކަމުގެ ތެދު މަޢުލޫމާތު ވަގުތުން ވަގުތަށް ގެނެސްދިނުމާއި ޚަބަރެއްގެ މައްސަލައެއް އޮވެގެން ޚަބަރު އޮންލައިން މީޑިއާއިން ނަގަންޖެހޭ ޙާލަތެއްގައި އެކަންކުރަން ޖެހުނު ސަބަބުން އިނގޭނެފަދަ ރިކޯޑެއް އޮންނަންޖެހޭނެކަމަށެވެ.
"ނޫސްވެރިޔާއަށް ވަރަށް ބޮޑު ޒިންމާއެއް މިހާރު އިންނާނީ ދީފަ. އެއީ ކަމެއް ހިނގައިގެން އުޅޭކަމުގައިވާނަމަ އެނޫސްވެރިޔާގެ ޒިންމާއެކޭއެއި، ޢާއްމު ރައްޔިތުންނަށް ވީހާވެސް ތެދުކޮށް، ސާފުކޮށް ގެނެސްދިނުން. އަދި ޚަބަރެއްގެ މައްސަލައެއްގައި ނަގަންޖެހިއްޖެނަމަ އެނަގަންޖެހުނު ސަބަބުން ބަޔާންކޮށް ޕޯސްޓްކުރަންޖެހޭނެ، ޕްރިންޓް މީޑިއާއެއްނަމަ އޭތި ޖަހަންޖެހޭނެ." ޝަފާއު ވިދާޅުވިއެވެ.
މީޑިއާ ކައުންސިލްގެ ރައީސްވަނީ، މީޑިއާތަކުން އެކުލަވާލަންޖެހޭ އެމީޑިއާއެއްގެ މިންގަނޑުތައް ވީއެންމެ އަވަހަކަށް އެމްއެމްސީއަށް ހުށައަޅައިދިނުމަށް އިލްތިމާސްކުރައްވާފައެވެ.
މިއީ ދިވެހި މީޑިއާއިން ޢަމަލުކުރުމަށް، މޯލްޑިވްސް މީޑިއާ ކައުންސިލުގެ ޤާނޫނުގެ ދަށުން، އެކުލަވައިލާފައިވާ "ދިވެހި މީޑިއާގެ އަޚްލާޤީ މިންގަނޑު"އެވެ. ދިވެހި މީޑިއާ ކޮންމެ މީހަކީ މި އަޚްލާޤީ މިންގަނޑަށް ތަބާވާ އަދި މި އަޚްލާޤީ މިންގަނޑަށް އަހުލުވެރި މީހަކަށް ވާންވާނެކަމަށް މޯލްޑިވްސް މީޑިއާ ކައުންސިލުން ވިދާޅުވެއެވެ. އަދި މިއީ ޚަބަރާއި މަޢުލޫމާތު ހޯދައި ފެތުރުމުގައި ހަރަކާތްތެރިވާ އެންމެހާ ފަރާތްތަކުން މި މިންގަނޑާ އެއްގޮތަށް ޢަމަލު ކުރުމަށް އެއްބަސްވާ މިންގަޑެކެވެ.
ޕްރިންޓް މީޑިއާއާއި އިލެކްޓްރޯނިކް މީޑިއާއި އޮންލައިން އަދި ނިއުމީޑިއާގެ ވަސީލަތްތަކުގައި މަޢުލޫމާތު ފަތުރަންވާނީ މި މިންގަނޑާ އެއްގޮތަށްކަމަށް މީޑިއާތަކުން ސޮއިކުރި "ދިވެހި މީޑިއާގެ އަޚްލާޤީ މިންގަނޑު"ގައި ވެއެވެ.
"ދިވެހި މީޑިއާގެ އަޚްލާޤީ މިންގަނޑު" ގައި ބަޔާންކޮށްފައިވަނީ
- އިސްލާމް ދީނާއި ދިވެހި ޖުމްހޫއްރިއްޔާގެ ޤާނޫނުއަސާސީއާއި ޤާނޫނުތަކަށް ހުރުމަތްތެރިކޮށް ހިތުން.
- އާންމުންނަށް ހަގީގަތް އެނގުމުގެ ހައްގަށް އިހުތިރާމް ކުރުން.
- އިންސާނީ ހައްގުތަކަށް ހުރުމަތްތެރިކޮށް ހިތައި އިޖުތިމާޢީ އަޚްލާޤު ހިފެހެއްޓުން.
- ނޫސްވެރިކަމަށް ނުރަނގަޅު އަސަރު ފޯރާނެފަދަ މަންފާތަކާއި ނުފޫޒުތަކުން އެއްކިބާވުން.
- ނޫސްވެރިކަމުގެ ހަމަތައް ހިފަހައްޓައި އެއްވެސް ބިރަކަށް ޖެހިލުންނުވުން، މިއެވެ.
މިއަދު މި ސޮއިކުރި "ދިވެހި މީޑިއާގެ އަޚްލާޤީ މިންގަނޑު"އާ އެއްގޮތްވާ ގޮތުގެ މަތިން، ދިވެހި މީޑިއާގެ ލޭންޑްސްކޭޕް އެހެން ހަރުފަތަކަށް ގެންދިއުމަށްޓަކައި، ކޮންމެ މީޑިއާއަކުން އެމީޑިއާއެއްގެ ކޯޑް އޮފް ޕްރެކްޓިސްއެއް އެކުލަވާލުމަކީ މުހިންމުކަމެކެވެ. މިއާއެކު މީޑިއާ ކައުންސިލުން އެދެނީ ހުރިހާ މީޑިއާތަކުން "ދިވެހި މީޑިއާގެ އަޚްލާޤީ މިންގަނޑު" އާއި އެއްގޮތްވާ ގޮތުގެ މަތިން ހަބަރު ފެތުރުމަށެވެ.