ރާއްޖޭގެ ރީތިކަން ދެކިލައި މިތަނުގެ ހިތްގައިމު ފަތުރުވެރިކަމުގެ ޚިދުމަތް، ތަޖުރިބާ ކުރަން ބޭނުންވާ ނުކުޅެދުންތެރިކަން ހުންނަ މީހުންނަށްވެސް އެފުރުސަތު ލިބެންޖެހޭނެކަމަށް ޓޫރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ނުކުޅެދުންދެރިކަން ހުންނަ މީހުންނަށް އެހީ ފޯރުކޮށްދޭ ޑައިވް އިންސްޓަރުން ތަމްރީނުކުރުމަށް އަދާރަން ޕްރެސްޓީޖު ވާދޫގައި ބޭއްވި ޕްރޮގަރާމް ރަސްމީކޮށް އިފްތިތާހްކުރުމުގެ ހަފްލާގައެވެ. މި ޙަފްލާގައި އެޑިއުކޭޝަން މިނިސްޓަރ ޑރ.ޝައުނާއާއި ހަޔަރއެޑިއުކޭޝަން މިނިސްޓަރ ޑރ.އިބރާހީމް ޙުސައިން ބައިވެރިވެވަޑައިގަތެވެ.
ނުކުޅެދުންދެރިކަން ހުންނަ މީހުންނަށް އެހީ ފޯރުކޮށްދޭ ޑައިވް އިންސްޓަރުން ތަމްރީނުކުރުމުގެ ޕްރޮގަރާމަކީ 5ވަނަ ޓޫރިޒަމް މާސްޓަރ ޕްލޭންގެ ދަށުން، ރާއްޖޭގެ ފަތުރުވެރިކަން އިތުރަށް ފުޅާކޮށް ޝާމިލްކުރުމަށް ކުރިއަށް ގެންދާ ޕްރޮގާރާމެކެވެ. މި ޕްޕރޮގްރާމް ވެގެންދާނީ ރާއްޖޭގެ ފަތުރުވެރިކަމަށް ލިބޭ ބޮޑު ކުރިއެރުމެއްކަން ފާހަގަކުރައްވަމުން މިނިސްޓަރ ވިދާޅުވީ، މިއީ ނުކުޅެދުންދެންތެރިކަން ހުންނަ މީހުންނަށް ވަޒީފާގެ ފުރުސަތުތަކައް މަގުފަހިވެގެންދާނެވެސް ކަމެއްކަމަށެވެ.
"އަޅުގަނޑުމެން ފަސްވަނަ މާސްޓާ ޕްލޭންގެ ޑްރާފްޓް ހަދަމުން ދިޔައިރު ވާހަކަ ދެކެވުނު އެއްކަމަކީ ރާއްޖޭގެ ރީތިކަން އެންމެންނަށް ތަޖުރިބާކުރުމުގެ މަގުފަހިކޮށްދެންޖެހޭކަން. އެހެންވީމަ ރާއްޖެއަކީ ޚާއްސަ އެހީއަށް ބޭނުންވާ މީހުންނަށްވެސް ޑައިވްކުރުމުގެ ފުރުސަތު ލިބޭނެ މަންޒިލަކަށް ހެދެންޖެހޭ." ޑރ.މަޢުޞޫމް ވިދާޅުވިއެވެ.
މި ޕްރޮގްރާމް ކުރިއަށްދަނީ ޓޫރިޒަމް މިނިސްޓްރީއާއި ބޭރުގެ ކުންފުންޏެއްކަމަށްވާ ޕީއެޗްއެސްއޭ ޔޫއެސްއާއި އެޓޯލްސް ވޯލްޑްގެ އިތުރުން އަދާރަން ރިސޯޓްސް ގުޅިގެންނެވެ. އިނިސްޓްރަކްޓަރ ލެވެލްގެ ޑައިވަރުން ތަމްރީނުކުރުމަށް ހަމަޖެހިފައިވާ މިޕްރޮގްރާމްގެ ދަށުން މިހާތަނަށް ހަޑައިވަރަކު ތަމްރީން ކޮށްފައިވާ ކަމަށް އެޓޯލްސް ވޯލްޑުން މަޢުލޫމާތުދެއެވެ.
ނުކުޅެދުންތެރިކަން ހުންނަ މީހުނަކީ މުޖުތަމަޢު ބަލައިގަންނަ ބަޔަކަށް ހެދުމާއި އެމީހުން ކުރިއެރުވުމަށް ސަރުކާރުންދަނީ ގިނަ މަސައްކަތްތައް ކުރައްވަމުންނެވެ. އެގޮތުން މީހުންނަށް ވަޒީފާގެ ފުރުސަތުތައް ފަހިކޮށް އިތުރުކުރުމާއި ނުކުޅެދުންތެރިކަން ހުންނަ ޒުވާނުންގެ ތެރެއިން މަސައްކަތްތެރިކަމާއި ވިޔަފާރި ކުރިއެރުމަށް ޝައުގުވެރިކަންހުންނަ މީހުންނަށް ހިތްވަރުދީ މަގުފަހިކޮށްދިނުމުގު ޕްރޮގްރާމްތައް ސަރުކާރުންދަނީ މަސްއަކަތްތައް ކުރައްވަމުންނެވެ.