މާލޭގެ ގެއެއްގެ ތެރޭގައި ބަނގުރާ ކެއްކި މައްސަލާގައި ބިދޭސީއަކު ހައްޔަރުކޮށްފިއެވެ.
ފުލުހުން ވިދާޅުވީ މި މައްސަލާގައި ހައްޔަރުކޮށްފައި ވަނީ 34 އަހަރުގެ ބިދޭސީ ފިރިހެނެއް ކަމަށާއި، އެމީހާ ހައްޔަރުކުރީ އެ ގޭ ތެރެއިން ކަމަށެވެ.
އެ މައްސަލަ ފެންމަތިވީ ހ. ރޯޝަނީ މަގުގައި ހުރި ގެއަކުން ދުން އަރަމުންދާތީ މިއަދު ހެނދުނު 6:15 ހާއިރު ލިބުނު ރިޕޯޓަކާ ގުޅިގެން ކަމަށް ފުލުހުން ވިދާޅުވިއެވެ.
ފުލުހުންނާއި އެމްއެންޑީއެފް އިން އެ ސަރަހައްދަށް ގޮސް ދުން އަރަމުންދިޔަ ގޭ ދޮރުގައި ޓަކި ޖެހުމުން، ދޮރު ނުހުޅުވާ ކަމަށާ، އޭރުވެސް ދުން އަރަމުން ދިޔަ ކަމަށް ފުލުހުން ވިދާޅުވިއެވެ. އެހެންވެ ބާރުގެ ބޭނުންކޮށްގެން އެތަނަށް ވަދެ ބެލިއިރު ބަނގުރާ ކައްކަނީއެވެ.
ފުލުހުން ވިދާޅުވީ ބަނގުރާ ކެއްކުމަށް ބޭނުންކުރާ ސާމާނުވެސް އެ ގޭތެރެއިން ފެނިފައި ކަމަށާއި، އެ މައްސަލަ އިތުރަށް ތަހުގީގުކުރަމުން އަންނަ ކަމަށެވެ.