ހަކަތައިގެ ދާއިރާއިން ރަޝިޔާއަކީ އިތުބާރު ކުރެވޭ ޤައުމެއް ކަމަށާއި، ރަޝިޔާއިން އެހެން ޤައުމުތަކަށް ފޯރުކޮށްދޭ ތެލާއި ގޭހުގެ ސަޕްލައިއަށް ލޮޅުންތައް އަރާފައި ވަނީ ހުޅަނގުގެ އަމަލުތަކުގެ ސަބަބުން ކަމަށް އެ ޤައުމުގެ ރައީސް ވްލަޑިމިއަރ ޕުޓިން ވިދާޅުވެއްޖެއެވެ. މި މޭރުމުން ހުޅަނގުގެ ޤައުމުތަކަށް ތުހުމަތު ޕުޓިން ތުހުމަތު ކުރައްވާފައި ވަނީ ރަޝިޔާގައި ބޭއްވި ހަކަތައާ ބެހޭ ފޯރަމެއްގައި ވާހަކަފުޅު ދައްކަވަމުންނެވެ.
ރަޝިޔާއިން ޔޫކްރެއިނުގައި ކުރަމުންދާ ހަނގުރާމައާ ގުޅިގެން އެ ޤައުމާ ދެކޮޅަށް އެމެރިކާއާއި ވިލާތުގެ އިއްތިހާދު ޤައުމުތައް ގުޅިގެން ވަނީ އިޤްތިޞާދީ ގޮތުން ދަތި ކުރުމުގެ ފިޔަވަޅުތައް އަޅާފައެވެ. މި ފިޔަވަޅުތަކަށް ރައްދު ދިނުމުގެ ގޮތުން ރަޝިޔާއިން ވެސް ވަނީ، ވިލާތުގެ ޤައުމުތަކަށް ޤުދުރަތީ ގޭސް ފޯރުކޮށްދިނުން މެދުކަނޑައިލާފައެވެ. އަދި، އެ ކަމަށް ބޭނުން ކުރާ ނޯޑް ސްޓްރީމް 1 ތެޔޮހޮޅިތައް ބަންދުކޮށްފައެވެ.
ނަމަވެސް، އެއީ ވިލާތުގެ ޤައުމުތަކަށް ދަތި ކުރުމުގެ ގޮތުން އަޅާފައިވާ ފިޔަވަޅެއް ކަމަށް ރަޝިޔާއިން ސީދާ އެއްބަސްވެފައެއް ނުވެއެވެ. ރަޝިޔާއިން ބުނަނީ، ކަނޑުގެ އަޑީގައި އަޅާފައިވާ އެ ހޮޅިތައް ބަންދުކޮށްފައި ވަނީ މަރާމާތުތައް ކުރުމުގެ ބޭނުމުގައި ކަމުގައެވެ.
މި މަހުގެ ކުރީކޮޅު ބަޔަކު ވަނީ ކަނޑު އަޑީގައި ހަމަލާއެއް ދީ، ހޮޅިތަކަށް ގެއްލުން ދީފައެވެ. ނަމަވެސް، އެއްވެސް ޤައުމަކުން އެ ކަމުގެ ޒިންމާ އުފުލާފައެއް ނުވެއެވެ. އެމެރިކާއާއި ވިލާތުން ތުހުމަތު ކުރަނީ އެއީ ރަޝިޔާއިން ހިންގާފައިވާ އަމަލެއް ކަމުގައެވެ. ނަމަވެސް، ރަޝިޔާގެ ތުހުމަތު އަމާޒުކޮށްފައި ވަނީ އެމެރިކާއަށެވެ.
ޕުޓިން ވިދާޅުވީ އެ ހޮޅިތައް މެދުވެރިކޮށް ވިލާތަށް ގޭސް ވިއްކަން ފަށަން ރަޝިޔާ އޮތީ ތައްޔާރަށް ކަމުގައެވެ. ހޮޅިތަކަށް ދިން ހަމަލާގައި ހުރިހާ ހޮޅިއަކަށް ގެއްލުންވެފައެއް ނުވެއެވެ. "މި ކަމުގައި ގޮތެއް ނިންމުމުގެ ބާރު އޮތީ ވިލާތުގެ ޤައުމުތަކުގެ އަތްމަތީގައި. އެ މީހުން ބޭނުންވެއްޖެ ނަމަ، ހޮޅިތައް އަލުން ހުޅުވައި، ގޭސް ފޯރުކޮށްދޭން ފަށަށް ރަޝިޔާ އޮތީ ތައްޔާރަށް،" ޕުޓިން ވިދާޅުވިއެވެ.
ހޮޅުތަކަށް ދިން ހަމަލާތަކަކީ ޓެރެރިޒަމްގެ އަމަލެއްގެ ގޮތުގައި ޕުޓިން ސިފަ ކުރައްވައެވެ. އަދި، އެ ކަމުގެ މަންފާ ކުރާނެ ޤައުމުތަކަކީ އެމެރިކާއާއި ޕޮލެންޑު އަދި ޔޫކްރެއިން ކަމުގައި އޭނާ ވިދާޅުވެއެވެ. ކުރިއަށް އޮތް ފިނި މޫސުމާ ދިމާކޮށް ވިލާތުގެ ގިނަ ޤައުމުތައް މިހާރު އޮތީ ހަކަތައަށް ބޭނުން ޖެހިފައެވެ.
ވިލާތުގެ ޤައުމުތަކުގައި ހަކަތައިގެ އަގު އިންތިހާއަށް އުފުލިފައިވާ މި ދަނޑިވަޅުގައި، އެ ޤައުމުތަކުން ދަނީ ރަޝިޔާއިން ވިއްކާ ތެލާއި ގޭހުގެ އަގު ކޮންޓްރޯލް ކުރަން މަސައްކަތް ކުރަމުންނެވެ. ނަމަވެސް، އެ ގޮތަށް އަމަލު ކުރާ ޤައުމުތަކަށް ތެލާއި ގޭސް ފޯރުކޮށްދިނުމަށް ރަޝިޔާއިން ދެކޮޅު ހަދައެވެ.
"ދުނިޔޭގެ ބާޒާރުގައި ތެލާއި ގޭހުގެ އަގު އިންތިހާއަށް އުފުލިފައި ވަނީ ވިލާތުގެ ބައެއް ޤައުމުތަކުގެ އަމަލުތަކުގެ ސަބަބުން. މި ކަމުގެ ފަހަތުގައި ތިބީ ހުޅަނގުގެ ޤައުމުތަކުގެ ސިޔާސީ ވެރިން. އެ އަމަލުތަކުގެ އަސަރު އެތަކެއް ބިލިޔަން މީހުންނަކަށް ދަނީ ކުރަމުން. ޢާންމު ރައްޔިތުންނަށް ވަނީ ބޮޑެތި ދަތިތަކާ ކުރިމަތިވެފައި،" ޕުޓިން ވިދާޅުވިއެވެ.
ތުރުކީ ވިލާތު މަގުން ވިލާތުގެ ޤައުމުތަކަށް ތެލާއި ގޭސް ފޯރުކޮށްދިނުމަށް ބޭނުންވާ ކަމުގައި ވެސް ޕުޓިން ވިދާޅުވިއެވެ. އަދި، އެއާއެކު ތުރުކީ ވިލާތަކީ ހަކަތައިގެ މައި މަރުކަޒަކަށް ވެގެންދާނެ ކަމުގައި ވެސް އޭނާ ވިދާޅުވިއެވެ. އޭނާ މި ކަން ހާމަކުރައްވާފައި ވަނީ، މި ކަމާ ގުޅޭ ގޮތުން މަޝްވަރާ ކުރުމަށް ތުރުކީ ވިލާތުގެ ރައީސް ރަޖަބް ތައްޔިބު އުރުދުޣާނާ ބައްދަލު ކުރެއްވުމަށް ހަމަޖެހިފައިވާ ދަނޑިވަޅެއްގައެވެ.