މަރައިލާފައިވާ ޢާންމުންގެ ގިނަ އަދަދެއްގެ ބަޔެއްގެ ހަށިތައް ވަޅުލާފައިވާ ކަށްވަޅުތަކެއް ރަޝިޔާ ސިފައިންގެ އަތްދަށުން މިނިވަން ކޮށްފައިވާ ޔޫކްރެއިނުގެ އިރުމަތީގެ ބައެއް ރަށްތަކުން ފެނިއްޖެއެވެ. ރަޝިޔާގެ އިރުމަތީގައިވާ ޑޮނެޓްސްކް އަދި ލުހާންސްކްއަށް ރަޝިޔާ ސިފައިން ވަނީ އަތްގަދަ ކޮށްފައެވެ. ނަމަވެސް، އެ ސަރަޙައްދުތަކުގެ ބައެއް ރަށްތައް ޔޫކްރެއިން ސިފައިން ވަނީ ފާއިތުވި ހަފުތާތަކުގެ ތެރޭގައި މިނިވަން ކޮށްފައެވެ.
ރަޝިޔާ ސިފައިންގެ އަތްދަށުން އެންމެ ފަހުން މިނިވަން ކޮށްފައިވާ ބައެއް ރަށްތަކުގެ ތެރޭގައި ޑޮނެޓްސްކްގެ ލިމާންއާއި ސްވަޔަތޮހިރްސްކް ހިމެނެއެވެ. ޔޫކްރެއިނު ސިފައިންނާއި ޢާންމުންގެ ގިނަ އަދަދެއްގެ ބަޔަކު މަރައިލުމަށްފަހު، އެ މީހުންގެ ހަށިތައް ވަޅުލާފައިވާ ކަށްވަޅުތައް ފެނުނީ އެ ދެ ރަށުންނެވެ.
ޔޫކްރެއިނުގެ ޕްރޮސިކިއުޓަރ ޖެނެރަލްގެ އޮފީހުން ބުނީ، ގިނަ އަދަދެއްގެ ހަށިތައް ވަޅުލާފައިވާ 110 ކަށްވަޅު ލިމާންއިން ފެނިފައިވާ ކަމުގައެވެ. ލިމާންއިން ފެނުނު ކަށްވަޅުތަކުން މިހާތަނަށް 34 މީހެއްގެ ހަށިގަނޑު ފެނިފައިވާ ކަމަށާއި، ސްވަޔަތޮހިރްސްކްއިން 44 މީހެއްގެ ހަށިގަނޑު ފެނިފައިވާ ކަމުގައި އެ ޤައުމުގެ ޕްރޮސިކިއުޓަރ ޖެނެރަލްގެ އޮފީހުން ބުނެއެވެ.
"ކަށްވަޅުތަކުން ފެނުނު ހަށިތައް ނަގައި، އެއީ ކޮން ބަޔެއްގެ ހަށިތަކެއް ކަން ދެނެގަތުމަށް މަސައްކަތް ކުރަމުން މި ދަނީ. ހަށިތަކުގެ ތެރޭގައި ޔޫކްރެއިނުގެ ސިފައިންގެ އިތުރުން ގިނަ އަދަދެއްގެ ޢާންމުންގެ ހަށިތައް ވެސް ހިމެނޭ. ބައެއް މީހެއްގެ ހަށިތަކުގެ ބައިތައް ވެސް ފެނުނު. އެއް އަހަރުގެ ތުއްތު ކުއްޖެއްގެ ހަށިގަނޑު ވެސް ފެނުނު. އެ ކުއްޖާގެ ހަށިގަނޑު ވަޅުލާފައި ވަނީ އެ ކުއްޖާގެ ޢާއިލާގެ އެހެން މެންބަރުންގެ ހަށިތަކާ އެކު،" ޔޫކްރެއިނުގެ އަސްކަރީ އޮފިޝަލަކު ބުންޏެވެ.
ރަޝިޔާއިން އަތްގަދަ ކޮށްފައިވާ ސަރަޙައްދުތަކުގައި ދިރިއުޅޭ ޔޫކްރެއިނު ރައްޔިތުންނާ މެދު ރަޝިޔާ ސިފައިން އިންސާނިއްޔަތާ ޚިލާފަށް އަމަލު ކުރަމުންދާ ކަމުގައި ޔޫކްރެއިނުން ތުހުމަތު ކުރެއެވެ. އަދި، ގިނަ އަދަދެއްގެ ބަޔަކަށް އިންސާނިއްޔަތާ ޚިލާފު އަނިޔާތައް ދީފައިވާ ކަމުގައި ވެސް ޔޫކްރެއިނުން ތުހުމަތު ކުރެއެވެ. ނަމަވެސް، ރަޝިޔާއިން ދަނީ އެ ކަން ދޮގު ކުރަމުންނެވެ.
ރަޝިޔާ ސިފައިންގެ އަތްދަށުން ސެޕްޓެންބަރު މަހުގެ ކުރީކޮޅު މިނިވަން ކޮށްފައިވާ ޚާރްކިވް ސަރަޙައްދުން މަރައިލާފައިވާ ގިނަ އަދަދެއްގެ މީހުންގެ ހަށިތައް ފެނިފައިވާ ކަމަށް ޔޫކްރެއިނުން ބުނެއެވެ. ޖުމުލަ 534 މީހެއްގެ ހަށިގަނޑު ފެނިފައިވާ އިރު، މީގެ ތެރޭގައި 19 ކުޑަކުދިން ވެސް ހިމެނޭ ކަމުގައި އެ ޤައުމުން ބުނެއެވެ. މީގެ ތެރެއިން 447 ހަށިގަނޑު ފެނިފައި ވަނީ ރަޝިޔާގެ އަތްދަށުން މިނިވަން ކުރި ރަށެއް ކަމުގައިވާ އިޒްޔުމްއިންނެވެ.