އެފްރިކާ ބައްރުގެ ޤައުމެއް ކަމުގައިވާ ޔުގާންޑާގައި ނުރައްކާތެރި ބައްޔެއް ކަމުގައިވާ އިބޯލާ ޖެހިފައިވާ މީހުންގެ ޢަދަދު 63އަށް އަރާފައިވާ ކަމަށާއި، މި ބަލީގައި މަރުވި މީހުންގެ ޢަދަދު 29އަށް އަރާފައިވާ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ބުނެފިއެވެ. ޔުގާންޑާގެ މުބެންޑޭ ސަރަޙައްދުގައި މި ބަލި ހަލުވިކަމާ އެކު ފެތުރެމުންދާ ކަން އެ ޤައުމުގެ ޞިއްޙީ ވުޒާރާއިން އިޢުލާނު ކޮށްފައި ވަނީ ސެޕްޓެންބަރު 30ގައެވެ.
އިބޯލާ ވައިރަސް ޑިޒީޒް (އީ.ވީ.ޑީ) ނުވަތަ އިބޯލާއަކީ ޖަނަވާރުންގެ ފުށުން އިންސާނުންގެ ހަށިގަނޑަށް އަރާ ނުރައްކާތެރި ބައްޔެކެވެ. މި ބަލި ފަތުރާ ޖަނަވާރުތަކުގެ ތެރޭގައި ވައު، ޕޯކިޔުޕައިން އަދި ރާމާމަކުނު ޢާއިލާގެ ޖަނަވާރުތައް ހިމެނެއެވެ. އެއަށްފަހު، ހަށިގަނޑުން ބޭރުވާ ދިޔައިގެ ޒަރީޢާއިން މި ބަލި އިންސާނުންގެ ތެރޭގައި ފެތުރެއެވެ.
ޔުގާންޑާގައި މި ބަލި ޖެހިފައިވާ މީހުންގެ ތެރޭގައި، ސެޕްޓެންބަރު މަހު ބަލި ޖެހުނު މީހުންނަށް ފަރުވާ ދިނުމުގެ މަސައްކަތުގައި ހަރަކާތްތެރިވި ޞިއްޙީ ޚިދުމަތްތެރިން ވެސް ހިމެނެއެވެ. މި ބަލި ޖެހިފައިވާ ޞިއްޙީ ޚިދުމަތްތެރިންގެ ތެރެއިން ފަސް މީހަކު މިހާރު ވަނީ ބަލިން ފަސޭހަވެފައެވެ. އެ މީހުންނަށް ފަރުވާ ދީފައި ވަނީ އެންޓެބޭގައި ހުންނަ ޞިއްޙީ ފަރުވާދޭ މަރުކަޒެއްގައެވެ. މި ބަލި ޖެހިފައިވާ މީހުންގެ ތެރެއިން ޖުމުލަ 20 މީހަކު ބަލިން ފަސޭހަވެފައިވާ ކަމުގައި އެ ޤައުމުގެ ޞިއްޙީ ވަޒީރު ޖޭން ރުތް އެސެންގް ވިދާޅުވިއެވެ.
"ބަލި ޖެހިފައިވާ ޞިއްޙީ ޚިދުމަތްތެރިންގެ ތެރެއިން ފަސް މީހަކު ބަލިން ފަސޭހަވެ، އެ މީހުން އެކަހެރިކޮށްފައި އޮތް އޮތުން ނިމުމުން މިއީ އުފާވެރި ދުވަހެއް. އެ މީހުންނަށް މިހާރު އެ މީހުންގެ ޢާއިލާތައް ކައިރިއަށް ދެވޭނެ. ފަސް ޑިސްޓްރިކްޓެއްގައި މި ބަލި ދަނީ ފެތުރެމުން. ނަމަވެސް، 20 މީހަކު ވަނީ ބަލިން ފަސޭހަވެފައި،" އެސެންގް ވިދާޅުވިއެވެ.
ޔުގާންޑާގެ ބައެއް ސަރަޙައްދުތަކުގައި ހަލުވިކަމާ އެކު އިބޯލާ ފެތުރެން ފެށުމާ އެކު ބައެއް ޤައުމުތަކުން ވަނީ ރައްކާތެރިކަމުގެ ފިޔަވަޅުތައް އަޅާފައެވެ. މީގެ ތެރޭގައި އެމެރިކާ ހިމެނެއެވެ. އެ ޤައުމުން ވަނީ، ޔުގާންޑާއަށް ދަތުރު ކޮށްފައި އެނބުރި އެ ޤައުމަށް އަންނަ މީހުން ސްކްރީން ކުރުމުގެ މަސައްކަތް ފަށާފައެވެ.
2014ވަނަ އަހަރު ޔުގާންޑާގައި މި ބަލި ފެތުރެން ފެށުމާ އެކު ވެސް އެމެރިކާއިން މި ފަދަ ފިޔަވަޅުތަކެއް އަޅާފައިވެއެވެ. އެ ފަހަރު، ޔުގާންޑާއަށް ދަތުރު ކުރުމަށް ފަހު އެނބުރި އެމެރިކާއަށް އެތެރެވި 11 މީހެއްގެ ހަށިގަނޑުން އިބޯލާ ވައިރަސް ފެނިފައިވެއެވެ. އަދި، މި ބަލީގައި ދެ މީހުން މަރުވިއެވެ.