ރާއްޖޭގެ ފުރަތަމަ ފްލޯޓިން ރިސޯޓު ވ.އަތޮޅުގައި ތަރައްޤީކުރުމުގެ އެއްބަސްވުމުގައި ލެވިނީ ހޮޓެލްސް މޯލްޑިވްސްއާކު ވ.އަތޮޅު ކައުންސިލުން ސޮއިކޮށްފިއެވެ.
މިކަމުގެ އެއްބަސްވުމުގައި ސޮއިކުރެއްވީ ވ.އަތޮޅު ކައުންސިލުގެ ރައީސް ޢަލީ ސުޖާޢާއި ލެވިނީ ހޮޓެލްސް މޯލްޑިވްސްގެ ނައިބު ރައީސް ޑރ.ވަރިސާ ލިމްސަކުލްއާއި މެނޭޖިން ޑިރެކްޓަރު އަބްދުﷲ ރަޝީދެވެ.
6038 އަކަމީޓަރުގެ މިރިސޯޓް ތަރައްޤީކުރަން ހަމަޖެހިފައިވަނީ ވ.ރަކީދުއާ ދިމާއިން ބޭރުގައި އޮންނަ ފަޅެއްގައެވެ. މިއީ ކަނޑު އަޑީގެ ރީތިކަން ފެންނަ އިންތިޒާމުތަކާއެކު، 40 ކޮޓަރީގެމައްޗަށް ތަރައްޤީކުރާ ރިސޯޓެކެވެ. ވ.އަތޮޅު ކައުންސިލްގެ ރައީސް ވިދާޅުވީ ތަފާތު އެކި ރަހަތަކަށް ޙާއްސަ 5 ރެސްޓޯރަންޓާއި، މުވައްޒަފުންނަށް ޚާއްސަކޮށް ދެ ޢިމާރާތެއްވެސް މި ރިސޯޓްގައި ތަރައްޤީ ކުރާނެކަމަށް ސުޖާޢު ވިދާޅުވިއެވެ.
ރާއްޖޭގައި ފުރަތަމަ ފަހަރަށް ތަރައްޤީކުރެވޭ ފްލޯޓިން ރިސޯޓްގެ މަގްސަދަކީ ފަތުރުވެރިކަމުގެ ތަފާތު ކޮންސެޕްޓެއް ރާއްޖެއަށް ތައާރަފްކުރުންކަން ފާހަގަކުރައްވަމުން ވ.އަތޮޅު ކައުންސިލްގެ ރައީސް ވިދާޅުވީ މިރިސޯޓަކީ ވ.އަތޮޅުގެ ތަރައްޤީއަށްވެސް ވަރަށްބޮޑު ކުރިއެރުމެއް ލިބިގެންދާނެ މަޝްރޫޢެއްކަމަށެވެ. މިރިސޯޓާއެކު އަތޮޅުތަކުގައި ވަޒީފާގެ ފުރުސަތުތައްވެސް އިތުރުވެގެންދާނެކަން އޭނާ ފާހަގަކުރެއްވިއެވެ.
ޒަމާނީ ފެންވަރަށް ތަރައްޤީކުރެވޭ މި ރިސޯޓްގެ މަސައްކަތް 36 މަސްދުވަހުގެތެރޭގައި ނިމިގެންދާނެކަމަށް ވ.އަތޮޅު ކައުންސިލުން މަޢުލޫމާތުދެއްވައެވެ.
ރާއްޖޭގެ އިޤްތިޞާދީ ފުދުންތެރިކަން އިތުރުކޮށް، ޤައުމުގެ ތަރައްޤީއަށް ބޭނުންވާ ގިނަ މަޝްރޫޢުތަކެއް ސަރުކާރުން ގެންދަވަނީ ހިންގަވަމުންނެވެ. އެގޮތުން ބޮޑެތި އާބާދީތަކަށާއި ކުދި އާބާދީ ހިމެނޭ ސަރަހައްދުތަކަށް އަމާޒުކުރައްވައިގެން އިޤްތިޞާދީ ގޮތުންނާއި އުމްރާނީ ގޮތުން އަދި އިޖްތިމާޢީގޮތުން ރައްޔިތުންނަށް ބޭނުންވާ މުހިންމު މަޝްރޫޢުތަކެއް ސަރުކާރުން ގެންދަވަނީ ހިންގަވަމުންނެވެ. އަދި އިޤްތިޞާދީ މަސައްކަތްތަކާއި އެކި މަޝްރޫޢުތައް ހިންގުމާއި އެފަދަ ކަންކަމުގައި ބައިވެރިވުމުގެ ބާރާއި އިޚްތިޔާރު ލޯކަލް ކައުންސިލްތަކަށް ސައރުކަރުންވަނީ ފަހިކޮށްދެއްވާފައެވެ.