ވޭތުވެދިޔަ 50 އަހަރުގެ ތެރޭގައި ރ.އަތޮޅުގައި ފަތުރިވެރިކަމަށް އެކި ގޮތްގޮތުން ޚިދުމަތް ކުރެއްވި ފަރާތަކަށް ހާއްސަ އެވޯޑެއް ދީފިއެވެ.
މި އެވޯޑްތައް ދީފައިވަނީ ރޭ ބޭއްވި ރ. ޓުވަރިޒަމް އެކްސްޕޯ 2022 އެވޯޑް ހަފްލާގައެވެ.
ރ.ދުވާފަރުގައި ބޭއްވި މި ޖަލްސާ ޝަރަފްވެރިކޮށްދެއްވީ ރައީސުލްޖުމްހޫރިއްޔާގެ ނައިބް ފައިސަލް ނަސީމްއެވެ. މި ޖަލްސާގައި ޓޫރިޒަމް މިނިސްޓަރ ޑރ. އަބްދުﷲ މައުސޫމްގެ އިތުރުން ދައުލަތުގެ ވަޒީރުންނާއި ފަތުރުވެރިކަމުގެ ސިނާއަތުގައި މަސައްކަތްކުރާ ގިނަ އަދަދެއްގެ ފަރާތްތަކަކުން ބައިވެރިވިއެވެ.
ރ. ޓުވަރިޒަމް އެކްސްޕޯ 2022 އެވޯޑް ރަސްމިއްޔާތުގައި ރ.އަތޮޅުގައި ފަތުރުވެރިކަން ކުރިއެރުވުމަށް އެކި ގޮތްގޮތުން މަސައްކަތްކުރެއްވި ބޭފުޅުންނަށް އެކަމުގެ އަގުވަޒަންކޮށް 3 އެވޯޑެއްދީފިއެވެ. އދި ރާއްޖޭގެ ތާރީޙު ފެށިގެން އައީ ރ އަތޮޅުގެ ތެރެއިންކަން ފާހަގަކޮށް މިތިން އެވޯޑަށް ވަނީ ދިވެހިވަންތަ ނަންތަކެއްދީފައެވެ.
އެގޮތުން ރ.އަތޮޅުގައި ފަތުރުވެރިކަން ތަރައްޤީކުރުމަށް އޮޕަރޭޓް ކުރަމުންދާ ރެސޯޓްތަކަށް ދީފައިވަނީ "ކޮއިމަލާ" އެވޯޑްއެވެ. މި އެވޯޑް ރ.އަތޮޅުގެ 10 އަށްވުރެ ގިނަ ރިސޯޓަށް ވަނީ ލިބިފައެވެ.
ރ.އަތޮޅުގެ ފަތުރުވެރިމުގެ ދާއިރާގައި މަސައްކަތްކުރާ ފަރާތްތަކުގެ ތެރެއިން އިންޓަރނޭޝަނަލް އެވޯޑެއް ހާސިލްކޮށްފައިވާ ފަރާތްތަކަށް ހާއްސަކޮށްފައިވަނީ "ބަތޫތާ" އެވޯޑެވެ. މި އެވޯޑް ހާސިލްކޮށްފައިވާ ވަނީ މީދުއްޕަރު އައިލެންޑް ރިސޯތްގައި މަސައްކަތްކުރާ ފަރާތެއްކަމަށްވާ އަޙްމަދު އަންވަރްއެވެ.
ރ.އަތޮޅުގެ ފަތުރުވެރިކަމުގެ ދާއިރާގައި 20 އަހަރު ޙިދުމަތްކޮށްފައިވާ ފަރާތްތަކުގެ އަގު ވަޒަންކޮށް، "ދަންޑަހެލު" ގެ ނަމުގައި ދިން އެވޯޑް ރ.އަތޮޅުގެ ދިހަ ފާރާތަކުން ހާސިލްކޮށްފައިވާ ވާއިރު، އެފަރާތަކަށް އެވޯޑް ދެއްވާފައިވަނީ ޓޫރިޒަމް މިނިސްޓަރ ޑރ.އަބްދުﷲ މައުސޫމްއެވެ.
މިރަސްމިއްޔާތުގައި ފަތުފުވެރިކަމުގެ ޚިދުމަތްތެރިންގެ އަގުވަޒަން ކުރުމަކީ ލިބޭ ބޮޑު އުފަލެއްކަން ފާހަގަކުރައްވަމުން މިނިސްޓަރ ވިދާޅުވީ ރާއްޖޭގެ ފަތުރުވެރިކަމަށް 50 އަހަރު ފުރިގެންދާއިރު އެއް އަތޮޅެއްގައި ފަތުވެރިކަމުގެ ރަން އަހަރު އެންމެ ކުލަގަދަކޮށް ފާހަގަކުރި އަތޮޅަކީ ރ.އަތޮޅުކަމަށެވެ.
ފަތުރުވެރިކަމުގެ ރަން އަހަރު ފާހަގަ ކުރުމަށް ރ.އަތޮޅުގައި ވަނީ ލާމަސީލު މަސައްކަތްތަކެއް ކުރައްވާފައެވެ. އެގޮތުން ކަލިނަރީ އާޓްސްގެ އިވެންޓަކާއި، ވޯޓާ ސްޕޯޓްސް އިވެންޓެއްގެ އިތުރުން، އަތްތެރި މަސައްކަަތްތަކުގެ މަޢުރަޒެއްވެސް ވަނީ ރ.އަތޮޅުގައި ކުރިއަށްގެންގޮސްފައެވެ.