ރައްޔިތުންގެ މަޖިލީހުގެ އިދާރާގެ ބޮޑެތި މަރާމާތުތަކެއް ކުރުމަށް ސަރުކާރު ހިއްސާވާ ކުންފުންޏަކާއި ހަވާލުކުރުމުގައި ޤަވާއިދާއި ޚިލާފަށް ގިނަ ކަންތައްތަކެއް ކޮށްފައިވާކަމަށް އޮޑިޓް ރިޕޯޓްގައި ބުނެފިއެވެ.
ރައްޔިތުންގެ މަޖިލީހުގެ 2020 ވަނަ އަހަރުގެ އޮޑިޓް ރިޕޯޓްގައި ވަނީ ދައުލަތުގެ މާއްލިއްޔަތު ޤަވާއިދުގައި ޕްރޮކިއުމަންޓުގެ ކަމެއްކުރަން ފެށުމުގެ ކުރިން އެކަމަކަށް ބޭނުންވާ ހުރިހާ މަޢުލޫމާތެއް ތަފުޞީލުކޮށް އެނގެން އޮންނާނެގޮތަށް ލިޔުން ތައްޔާރުކުރަންވާނެކަމަށް ބަޔާންކޮށްފައި ވީނަމަވެސް، 2019 ވަނަ އަހަރު ރައްޔިތުންގެ މަޖިލީހުގެ ޢިމާރާތުގައި ކުރަން ހުރި ބޮޑެތި މަރާމާތުތައް ކުރުމަށް 9.9 މިލިއަން ރުފިޔާއަށް އެ މަސައްކަތް ހަވާލުކުރުމުގެ ކުރިން ބީއޯކިޔުއާއި ކުރެހުން އަދި ސްޕެސިފިކޭޝަން ތައްޔާރުކޮށްފައި ނުވާކަން ފާހަގަކުރެވުނުކަމަށެވެ.
މި މަސައްކަތް އެފަރާތާއި ހަވާލުކޮށްފައިވަނީ ދައުލަތުގެ މާލިއްޔަތު ޤަވާއިދުގައި ބަޔާންކުރާގޮތާއި ޚިލާފަށް ބިޑްކުރުމަކާއި ނުލައި ފިނޭންސް މިނިސްޓްރީގެ ހުއްދައާއެކުކަމަށެވެ. ނަމަވެސް، މަސައްކަތަށް ހިނގާނެ ހަރަދެއް އިތުރު ފަރާތަކުން ހޯދާފައިނުވުމުގެ ސަބަބުން، އެ މަސައްކަތުގެ އަގަކީ ވާދަވެރި އަދި އެކަމަށް އެކަށޭނަ އަގެއް ކަމަށް ކަށަވަރުކުރެވިފައިނުވާކަމަށްވެސް އޮޑިޓް ރިޕޯޓްގައިވެއެވެ.
މާލިއްޔަތު ގަވާއިދުގައި ބަޔާންކޮށްފައިވަނީ، ބީލަމުގެ ޖުމްލަ އަގު ދެމިލިޔަން ފަސްލައްކަ ރުފިޔާއަށްވުރެ ބޮޑުނަމަ، ރިޓެންޝަން ފައިސާ އަނބުރާ ދޭންވާނީ، މަސައްކަތް ނިމޭތާ 12 މަސްވުމުންކަމަށެވެ. ނަމަވެސް މަސައްކަތް ނިމުނުތާ 6 މަސް ދުވަހުގެ ތެރޭގައި އެފަރާތަށް ރިޓެންޝަން ފައިސާ އަނބުރާ ދީފައިވާކަންވެސް ރިޕޯޓުގައި ވަނީ ފާހަގަކޮށްފައެވެ. މިގޮތަށް އަމަލުކޮށްފައި ވުމުން ފެންވަރު ދަށްކޮށް ކޮށްފައިވާ މަސައްކަތް އެފަރާތް ލައްވައި އަލުން ކުރުވުމާއި، އެފަދަ މަސައްކަތަށް އެފަރާތް ޒިންމާކުރުވުމަކީ ދަތިކަމެއްކަން އޮޑިޓް ރިޕޯޓްގައި ވަނީ ފާހަގަކޮށްފައެވެ.
އޮޑިޓް ރިޕޯޓުގައި ވަނީ މަޖިލީހުން ކުރާ މިފަދަ ޚަރަދުތައް ކުރުމުގައި މާލިއްޔަތު ގަވާއިދާއި އެއްގޮތަށް އަމަލު ކުރުމަށް އިރުޝަދު ދެއްވާފައެވެ. އެގޮތުން ޕްރޮކިއުމަންޓް ކަމެއް ކުރަން ފެށުމުގެ ކުރިން އެކަމަށް ބޭނުންވާ ހުރިހާ މައުލޫމާތެއް ތަފްސީލުކޮށް ލިޔުމުން އެނގެން އޮންނާނެ ގޮތަށް ތައްޔާރު ކުރުމަށް ވަނީ ދަންނަވާފައެވެ. އަދި ބީލަމުގެ އަގު ފަސް މިލިޔަން ރުފިޔާއަށްވުރެ ބޮޑުނަމަ، ބީލަމުގެ މަސައްކަތް ނިމޭތާ 12 މަސް ވުމުން ނޫނީ ރިޓެންޝަން ފައިސާ އަނބުރާ ނުދިނުމަށްވެސް އޮޑިޓް ރިޕޯޓްގައި ވަނީ އިލްތިމާސްކޮށްފައެވެ.