ދެކުނު އެފްރިކާގެ ކަނޑުގެ އައްސޭރިފަށުގެ ސަރަޙައްދުތަކުގައި ދިރިއުޅޭ ފީނާދޫނި (ޕެންގުއިން) ތަކުގެ ތެރޭގައި ދޫނިރޯގާ ޢާންމުވެ، މިހާތަނަށް 28 ދޫނި މަރުވެއްޖެއެވެ. އެފްރިކާ ބައްރުގައި ދިރިއުޅޭ ފީނާދޫނިތަކަކީ ދުނިޔެއިން ނެތިދާނެ ކަމުގެ ބިރު ހީވެފައިވާ ޖަނަވާރެކެވެ.
ފީނާ ދޫނި ދިރިއުޅެނީ ދެކުނު އެފްރިކާގެ ރަށެއް ކަމުގައިވާ ކޭޕް ޓައުންގެ އައްސޭރިފަށުގައެވެ. އެއީ، ބިސްއަޅައި، ދަރިން ބަލައި ބޮޑެތި ކުރަން ޖަމާވާ ސަރަޙައްދެކެވެ.
ސަދަން އެފްރިކަން ފައުންޑޭޝަން ފޯރ ދަ ކޮންޒަރވޭޝަން އޮފް ކޯސްޓަލް ބަރޑްސްއަކީ މި ފަދަ ޖަނަވާރު ހިމާޔަތް ކުރަން މަސައްކަތް ކުރާ ޖަމުޢިއްޔާއެކެވެ. އެ ޖަމުޢިއްޔާގެ އިސްވެރިއެއް ކަމުގައިވާ ޑރ ޑޭވިޑް ރޮބަރޓްސް ވިދާޅުވީ އޮގަސްޓު މަހުގެ 15އިން ފެށިގެން މިހާތަނަށް 28 ފީނާދޫންޏަށް ދޫނިރޯގާ ޖެހިގެން މަރުވެފައިވާ ކަމުގައެވެ.
"
އަޅުގަނޑުމެން މި ދަނީ ސައުތް އެފްރިކަން ނޭޝަނަލް ޕާކްސްއާ ގުޅިގެން ބަލި ޖެހިފައިވާ ފީނާދޫނިތައް ދެނެގަތުމަށް މަސައްކަތް ކުރަމުން. ކޮންމެ ދުވަހަކު ވެސް އަޅުގަނޑުމެންގެ ޓީމުތަކުން އެ މަސައްކަތް ކުރޭ. އަދި، ބަލި ޖެހިފައިވާ ދޫންޏެއް ފެނިއްޖެ ނަމަ، އެ ދޫނި އެކަހެރި ކުރެވޭ. ޓީމުތައް މަސައްކަތް ކުރަނީ ރައްކާތެރި އަންނައުނު އަޅައިގެން،" ޑރ ރޮބަރޓްސް ވިދާޅުވިއެވެ.
ކޭޕް ޓައުންގެ އައްސޭރި ފަށުގައި އޮންނަ ރަށެއް ކަމުގައިވާ ސައިމަންސް ޓައުންގެ އައްސޭރިފަށުގައި އެފްރިކަން ޕެންގުއިން ޢާއިލާއަށް ނިސްބަތްވާ 3,000 އަށްވުރެ ގިނަ ފީނާދޫނި ދިރިއުޅެއެވެ. ދޫނިރޯގާއަކީ ދޫނީގެ ނަޖިހުގެ ޒަރީޢާއިން ފެތުރޭ ނުރައްކާތެރި ބައްޔެކެވެ މި ބަލި އެ ސަރަޙައްދުން ފުރަތަމަ ފަހަރަށް ފެނިފައި ވަނީ 2021 ވަނަ އަހަރުގެ މޭ މަހުގެ ތެރޭގައެވެ.
އެފްރިކަން ޕެންގުއިންއަކީ އިންޓަރނޭޝަނަލް ޔޫނިއަން ފޯރ ކޮންޒަރވޭޝަން އޮފް ނޭޗަރ (އައި.ޔޫ.ސީ.އެން)އިން އެކުލަވައިލާފައިވާ ދުނިޔެއިން ނެތިދާނެ ކަމުގެ ބިރު ހީވެފައިވާ ޖަނަވާރުތަކުގެ ލިސްޓުގައި ހިމަނާފައިވާ ދޫންޏެކެވެ.
"ދޫނިރޯގާގެ ސަބަބުން މަރުވެފައި ވަނީ މަދު އަދަދުގެ ފީނާދޫންޏެކޭ ބުނެވިދާނެ. ނަމަވެސް، މި ބަލީގެ ނުރައްކާތެރި ކަން ކުޑައެއް ނޫން. ދޫނިރޯގާގެ އިތުރުން، އެ ދޫނިތައް ދިރިއުޅޭ، އަދި ބިސްއަޅާ ސަރަޙައްދުތަކަށް ދަނީ ގެއްލުން ލިބެމުން. މި ދެ ކަންތައް އެކުވުމުން ދޫނިތަކަށް އޮތް ނުރައްކާތެރިކަން ބޮޑުވޭ،" ޑރ ރޮބަރޓްސް ވިދާޅުވިއެވެ.