ބަޖެޓް އެއާރލައިންތަކުގެ ސަބަބުން ޓިކެޓް އަގުބޮޑުވެގެން ޑިމާންޑަށް އަންނަ ލޮޅުން ކުޑަކުރެވޭނެކަމަށް މިނިސްްޓަރ އޮފް ޓޫރިޒަމް ޑރ. އަބްދުﷲ މައުސޫމް ވިދާޅުވެއްޖެއެވެ.
ޓޫރިޒަމް މިނިސްޓަރ މިހެން ވިދާޅުވީ އަގުހެޔޮކޮށް ދަތުރުކުރެވޭ ބަޖެޓް އެއާރލައިނެއްކަމަށްވާ ވިޒް އެއަރގެ ދަތުރުތައް ރާއްޖެއަށް ފެށުން ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މިނިސްޓަރ މައުސޫމް ވިދާޅުވީ ވިޒް އެއަރގެ ދަތުރުތައް ރާއްޖެއަށް ފަށާފައި މިވަނީ ރާއްޖޭގެ ފަތުރުވެރިކަމަށް 50 އަހަރު ފުރި، އަނެއް 50 އަހަރު ގުނަން ފެށި ދުވަހުކަމަށެވެ. އަދި މިފަދަ މުނާސަބަތަކާއި ދިމާކޮށް ވިޒް އެއަރގެ ދަތުރުތައް ރާއްޖެއަށް ފެށުމަކީ ރަނގަޅު ފާލެއް ކަމަށް މިނިސްޓަރ ވިދާޅުވިއެވެ.
"މިއަހަރުގެ ފަހު ކުއާޓަރު މިއައީ.. އޮކްޓޫބަރުން ޑިސެމްބަރަށް. ރާއްޖެއަށް ދަތުރުކުރުމަށް އޮތް ޑިމާންޑާއި އެއްވަރަށް، ބާޒާރުގައި ތެޔޮ އަގުބޮޑުވުމުގެ ސަބަބުން، ފްލައިޓް ޓިކެޓްތައް ވަރަށް އަގުބޮޑު ވެފައި އޮތް ދުވަސްވަރެއްގައި ވިޒް އެއަރގެ ދަތުރުތައް މިފެށުނީ.. ވަރަށް ބޮޑަށް ފާހަގަކޮށްލަންޖެހޭ މިއީ އަޅުގަނޑުމެންގެ ޓޫރިޒަމަށް 50 އަހަރު ފުރިފައި.. އަނެއް 50 އަހަރު ގުނަން ފަށާ ދުވަހު އަލަށް އެއަރލައިނެއް އޮޕަރޭޓްކުރަން ފެށުމަކީ ރަނގަޅު ފާލެއް" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ދުނިޔޭގެ ބާޒާރުގައި ތެލުގެ އަގު އުފުލެމުންދިއުމާއި ގުޅިގެން ފްލައިޓް ޓިކެޓްތައް އަގުބޮޑުވަމުންދާކަމަށެވެ. އަދި ބަޖެޓް އެއާލައިންތަކުގެ ސަބަބުން ޓިކެޓް އަގުބޮޑުވެގެން އަންނަ ލޮޅުންތައް ކުޑަކުރެވޭނެކަމަށް މިނިސްޓަރ ވިދާޅުވިއެވެ.
"ހަފްތާއަކު ހަތަރު ފްލައިޓް އޮންނާނެ ވިޒް އެއަރގެ. 650 އަށްވުރެ ގިނަ ސީޓް އެ ލިބުނީ. ވަރަށް ރަނގަޅު ފެށުމެއް މިއީ. ވިޒް އެއާރ އިން މެދު މާކެޓުގެ އަގުހެޔޮ ފްލައިޓްތަކުގެ ތެރޭގައި ހިމެނޭތީ ފްލައިޓްތަކުގެ ޓިކެޓް އަގުބޮޑުވެގެން ޑިމާންޑަށް އަންނަ ލޮޅުން ކުޑަކުރެވޭނެ" މިނިސްްޓަރ ވިދާޅުވިއެވެ. .
ވިޒް އެއަރގެ ދަތުރުތައް ހަފްތާއަކު 4 ދުވަހު އަބޫދާބީ އާއި ރާއްޖެއަށް ބާއްވާނެއެވެ. އެއީ ހޮނިހިރު، އާދީއްތަ، އަންގާރަ، އަދި ބުރާސްފަތި ދުވަހެވެ.
ކޮންމެ ދަތުރެއްގެ އަގަކީ 97 ޑޮލަރެވެ. މިދަތުރުތަކުގައި އެ އެއަރލައިނުން ބޭނުންކުރާނީ އެއާބަސް އޭ321 ނިއޯ މަރުކާގެ ބޯޓެކެވެ.
ޔޫއޭއީގެ އަބޫ ދާބީއާއި ރާއްޖެއާ ދެމެދު މިހާރު ސީދާ ދަތުރުތައް ކުރަނީ އިއްތިހާދު އެއާވޭސްއިން އެކަންޏެވެ. ނަމަވެސް އެ ގައުމުގެ ދުބާއީއަށް ރާއްޖެއިން ކޮންމެ ދުވަހަކުވެސް ފްލައިޓްތައް އޮވެއެވެ.