އުތުރު ކޮރެޔާއިން ފޮނުވައިލި މެދު ރާސްތާގެ ބެލިސްޓިކް މިސައިލެއް ޖަޕާނުގެ ވައިގެ ސަރަޙައްދު ހުރަސްކޮށް ކަނޑުގެ ސަރަޙައްދަކަށް ވެއްޓިއްޖެއެވެ. އުތުރު ކޮރެޔާއިން އުދުއްސައިލި މިސައިލް ޖަޕާނުގެ ވައިގެ ސަރަޙައްދަށް ވަނުމާ އެކު އެ ޤައުމު ވަނީ ކުއްލި ހާލަތަކަށް ގެނެސްފައެވެ. އަދި، ރައްކާތެރި ކަމުގެ ފިޔަވަޅުތައް އަޅާފައެވެ.
ޖަޕާނުގެ އަސްކަރިއްޔާ ވަނީ ތައްޔާރީ ހާލަތަކަށް ގެނެސްފައެވެ. އަދި، މިސައިލް ހަމަލާތަކުން ދިފާޢުވުމަށް ބޭނުން ކުރާ ނިޒާމުތައް ވަނީ އެކްޓިވޭޓް ކޮށްފައެވެ. މީގެ އިތުރުން، ޢާންމު ރައްޔިތުންނަށް ވަނީ، ހިޔާތަކަށް ވަދެ ރައްކާތެރިވުމަށް އަމުރު ކޮށްފައެވެ.
"އުތުރު ކޮރެޔާއިން އުދުއްސައިލި ބެލިސްޓިކް މިސައިލް ދަތުރު ކޮށްފައި ވަނީ މި ޤައުމުގެ މަތިން. މި ޤައުމުގެ ވައިގެ ސަރަޙައްދުގެ ތެރެއިން. މިސައިލް ވެއްޓިފައި ވަނީ ޕެސިފިކް ކަނޑުގެ ސަރަޙައްދަށް. ޖަޕާނުން ދެކެނީ މިއީ އަނިޔާވެރި ކުށެއްގެ ގޮތުގައި. މި ކަން އެންމެ ހަރުކަށި ޢިބާރާތުން ކުށްވެރި ކުރަން،" ޖަޕާނުގެ ބޮޑުވަޒީރު ފުމިޔޯ ކިޝިޑާ ވިދާޅުވިއެވެ.
އުތުރު ކޮރެޔާއިން މިސައިލް ޓެސްޓެއް ހެދުމަށް ބެލިސްޓިކް މިސައިލް އުދުއްސައިލުމާ އެކު ދެކުނު ކޮރެޔާ ވެސް ވަނީ ތައްޔާރީ ހާލަތަކަށް ގެނެސްފައެވެ. އަދި، ދިފާޢީ ނިޒާމުތައް އެކްޓިވޭޓްކޮށްފައެވެ. އެ ޤައުމުގައި ހަރަކާތްތެރިވާ އެމެރިކާ ސިފައިންގެ ފައުޖު ވެސް ވަނީ ތައްޔާރީ ހާލަތަކަށް ގެންގޮސްފައެވެ. ދެކުނު ކޮރެޔާގައި އެމެރިކާގެ 28,500 އަށްވުރެ ގިނަ ސިފައިން ޤާއިމުވެ ތިބެއެވެ.
އުތުރު ކޮރެޔާއިން އެންމެ ފަހުން ޖަޕާނުގެ މަތިން މިސައިލެއް ޓެސްޓު ކޮށްފައި ވަނީ 2017ވަނަ އަހަރުއެވެ. އެއީ، އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ ވެރިކަމުގައި އުތުރު ކޮރެޔާއާ ދެމެދު އުފެދުނު ނުތަނަވަސްކަމާ ގުޅިގެންނެވެ. އެ ފަހަރު އުތުރު ކޮރެޔާއިން އަޖުމަ ބަލާފައި ވަނީ އިންޓަރކޮންޓިނެންޓަލް ބެލިސްޓިކް މިސައިލެކެވެ. އެއީ، އެއް ބައްރުން އަނެއް ބައްރަށް ދަތުރު ކުރުމުގެ ޤާބިލުކަން ލިބިފައިވާ މިސައިލެކެވެ.
ހުސްވި ހަފުތާގައި ވެސް އުތުރު ކޮރެޔާއިން ވަނީ ހަތަރު ފަހަރެއްގެ މަތިން މެދު ރާސްތާގެ މިސައިލުތަކެއްގެ އަޖުމަ ބަލާފައެވެ. އެ ކަން ކޮށްފައި ވަނީ އެމެރިކާގެ ނައިބު ރައީސް ކަމަލާ ހެރިސް ދެކުނު ކޮރެޔާއާއި ޖަޕާނަށް ކުރެއްވި ދަތުރުފުޅަކާ ދިމާކޮށެވެ. ދެކުނު ކޮރެޔާއަށް ކުރެއްވި ދަތުރުފުޅުގައި ހެރިސް ވަނީ، ދެ ކޮރެޔާ ގުޅޭ ސަރަޙައްދީ ރޮނގަށް ޒިޔާރަތް ކުރައްވާފައެވެ. އުތުރު ކޮރެޔާއިން މި އަހަރުގެ ތެރޭގައި ގިނަ އަދަދެއްގެ މިސައިލު ޓެސްޓު ހަދާފައިވެއެވެ.
އުތުރު ކޮރެޔާއިން ދީފާނެ ހަމަލާއަކަށް ތައްޔާރުވުމުގެ ގޮތުން ދެކުނު ކޮރެޔާއާއި ޖަޕާނުން ދަނީ އެމެރިކާއާ ގުޅިގެން އަސްކަރީ ތަމްރީނުތައް ބާއްވަމުންނެވެ. ހުސްވި ހަފުތާގެ ތެރޭގައި މި ތިން ޤައުމުން ގުޅިގެން ކަނޑުގެ ސިފައިންގެ ތަމްރީނުތަކެއް ބާއްވާފައިވެއެވެ. މިއީ، ފަސް އަހަރުގެ މެދުކެނޑުމަކަށް ފަހު ސަބްމެރިން ފަދަ އުޅަނދުފަހަރު ބޭނުން ކޮށްގެން މި ތިން ޤައުމުން އަސްކަރީ ތަމްރީނުތައް ބާއްވާފައިވާ ފުރަތަމަ ފަހަރެވެ.
އުތުރު ކޮރެޔާއިން ނިއުކްލިޔަރ ބޮމެއް ޓެސްޓު ކުރުމަށް ވެސް ތައްޔާރުވަމުން ދާ ކަމުގައި ދެކުނު ކޮރެޔާއާއި އެމެރިކާއިން ތުހުމަތު ކުރެއެވެ. އަދި، އޮކްޓޫބަރު 16 ވަނަ ދުވަހު ބާއްވާ ޗައިނާގެ ވެރިކަން ކުރާ ކޮމިޔުނިސްޓު ޕާޓީގެ ކޮންގްރެސްގެ ފަހުން އުތުރު ކޮރެޔާއިން ނިއުކްލިޔަރ ޓެސްޓެއް ހަދާނެ ކަމަށް ބެލެވޭ ކަމުގައި އެ ޤައުމުތަކުން ބުނެއެވެ. 2006ވަނަ އަހަރު ފަހުން އުތުރު ކޮރެޔާއިން ހަ ފަހަރެއްގެ މަތިން ނިއުކްލިޔަރ ބޮން ޓެސްޓު ކޮށްފައިވެއެވެ.