މޫސުމީ ވިއްސާރައިގެ ސަބަބުން ޕާކިސްތާނުގައި ހާލުގައި ޖެހިފައިވާ އެތައް މިލިޔަން މީހުންނަށް އިންސާނީ އެހީތެރިކަން ފޯރުކޮށްދިނުމަށް 816 މިލިޔަން ޑޮލަރު ބޭނުންވާ ކަމުގައި ދުނިޔޭގެ ކާބޯތަކެއްޗާ ބެހޭ ޕުރޮގުރާމު (ޑަބްލިޔު.އެފް.ޕީ)އިން ބުނެފިއެވެ. ޕާކިސްތާނުގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް އިތުރަށް ފައިސާ ހޯދުމަށް ގޮވައިލައްވާފައި ވަނީ ޑަބްލިޔު.އެފް.ޕީ.ގެ ފަރާތުން ޕާކިސްތާނަށް ކަނޑައަޅާފައި ހުންނަވާ ކަންޓްރީ ޑިރެކްޓަރ ކްރިސް ކޭއެވެ.
"ޕާކިސްތާނު މިހާރު އޮތީ އިންސާނީ މުސީބާތެއްގެ ދެވަނަ ރާޅުގެ ތުންފަތް މަތީގައި. އެ ޤައުމަށް މިހާރު ކުރިމަރިވެފައި އޮތީ ޞިއްޙީ ކާރިސާއެއް. ކުރިން އަޅުގަނޑުމެން ގޮވައިލާފައި ވާނީ އެހީގެ ގޮތުގައި 162 މިލިޔަން ޑޮލަރު ހޯދުމަށް. ނަމަވެސް، މިހާރު އެނގޭ އެ އަދަދުން ނުވާނެ ކަން. އެންމެ މަދުވެގެން ވެސް 816 މިލިޔަން ޑޮލަރުގެ އެހީ އެބަ ބޭނުންވޭ،" ކޭ ވިދާޅުވިއެވެ.
ކޭއި ވިދާޅުވި ގޮތުގައި، ޕާކިސްތާނުގައި ޞިއްޙީ ކާރިސާއެއް ފެށިފައި މި ވަނީ ބޯކޮށް ވާރޭވެހުމުގެ ސަބަބުން ފެންބޮޑުވެފައިވާ ސަރަޙައްދުތަކުން ފެންގަނޑު ހިނދުން ލަސްވުމުގެ ސަބަބުންނެވެ. އޭނާ ވިދާޅުވީ، ފެންބޮޑުވުމުގެ ސަބަބުން ރައްކާތެރި ގޮތުގައި ޤަޟާޙާޖަތްކުރާނެ އެއްވެސް ގޮތެއް ނެތް ކަމުގައެވެ. އަދި، ހާމަ ތަންތަނަށް ޤަޟާޙާޖަތްކުރުމުގެ ސަބަބުން ނުރައްކާތެރި ބަލިތައް ފެތުރެމުންދާ ކަމުގައި އޭނާ ވިދާޅުވިއެވެ.
"މަދިރި ގިނަވެއްޖެ. މަދިރީގެ ޒަރީޢާއިން ފެތުރޭ ބަލިތައް ކަމުގައިވާ ބޭރަށް ހިންގުން ފަދަ ބަލިތައް ޢާންމުވެއްޖެ. މެލޭރިޔާ ފެތުރެން ފަށައިފި. ހަމުގެ ބަލިތައް ޖެހޭ މީހުންގެ އަދަދު އިތުރުވެއްޖެ. ކުރިއަށް އޮތް ހަފުތާތަކުގެ ތެރޭގައި ޞިއްޙީ ކާރިސާއަކާ މި ޤައުމަށް ކުރިމަތިލާން ޖެހޭނެ،" ކޭ ވިދާޅުވިއެވެ.
ފެންބޮޑުވުމާ ގުޅިގެން އެންމެ ބޮޑަށް ހާލުގައި ޖެހިފައި ވަނީ ޕާކިސްތާނުގެ އަންހެނުންނާއި ކުޑަކުދިން ކަމުގައި ވެސް ކޭ ވިދާޅުވިއެވެ. ފެންބޮޑުވުމާ ގުޅިގެން ގެދޮރަށް ގެއްލުން ލިބުމުގެ ސަބަބުން އެތައް މިލިޔަން ބަޔަކު އަދި ވެސް ދިރިއުޅެމުން ދަނީ ވަގުތީ ހިޔާތަކުގައެވެ. އަދި، އެތަކެއް ސަތޭކަ ބަޔަކު ނިދަނީ މަގުތައް މަތީގައެވެ. އެ މީހުންނަށް ވަގުތީ ހިޔާ ފޯރުކޮށްދިނުމަށް ބައިނަލްއަޤުވާމީ މުޖުތަމަޢުގެ އެހީތެރިކަން ބޭނުންވާ ކަމުގައި ކޭ ވިދާޅުވިއެވެ.