ވެލާނާ އިންޓަރނޭޝަނަލް އެއަރޕޯޓުގައި ތަރައްޤީކޮށްފައިވާ އައު ރަންވޭގައި ގަޑިއިރެއްގެ ތެރޭ 21 ފްލައިޓު ޖެއްސޭނެކަމަށް އެމްއޭސީއެލުން ވިދާޅުވެއްޖެއެވެ.
މޯލްޑިވްސް އެެއަރޕޯޓްސް ކޮމްޕެނީ ލިމިޓެޑުން އަންނަނީ އަންނަ ބުރާސްފަތިދުވަހު އައު ރަންވޭ ބޭނުންކުރަން ފަށަން ވާންޖެހޭ ތައްޔާރީތައް ވަމުންނެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ އެއް ބިލިއަން ޑޮލަރުގެ މަޝްރޫޢު ހިމަނައިގެން، އައު ރަންވޭ ތަރައްޤީކުރުމުގެ މަސައްކަތް ފެށީ 2017 ވަނަ އަހަރުއެވެ. ރަންވޭގެ ޢަމަލީ މަސައްކަތް ނިންމާ 2018 ވަނަ ޓެސްޓް ފްލައިޓްވެސް ވަނީ އައު ރަންވޭއަށް ޖައްސާއެވެ.
އެމްއޭސީއެލްގެ ޖެނެރަލް މެނޭޖަރ ކޯރޕަރޭޓް އެފެއަރޒް، ހަސަން އަރީފް ވިދާޅުވީ، އައު ރަންވޭ އަށް ގަޑި އިރެއްގެ ތެރޭ 21 ފްލައިޓު ޖެއްސޭނެ ކަމަށެވެ. އަދި މިއީ އެއަރޕޯޓްގެ އޮޕަރޭޝަންތަކަށް ލިނިގެންދިޔަ ވަރަށް ބޮޑު ކުރިއެރުމެއްކަމަށް އޭނާ ވިދާޅުވިއެވެ.
"މިހާރުގެ ރަންވޭގެ ކެޕޭސިޓީއަކީ ގަޑިއިރެއްގެ ތެރޭ 8 ފްލައިޓު، އައު ރަންވޭގައި ގަޑިއިރެއް ތެރޭ 21 ފްލައިޓު ޖެއްސޭނެ، ކުރިން ނަގާނެ 15 މިނެޓު އޭޕްރަންއަށް އަންނަން، އައު ރަންވޭއާއެކު 3 މިނެއްޓަށް އެވަގުތު ކުޑަކުރެވިގެންދާނެ، މިއީ 80 އިންސައްތަ ކުރިއެރުމެއް،" ހަސަން ވިދާޅުވިއެވެ.
ހަސަން ވިދާޅުވީ އައު ރަންވޭ ބޭނުންކުރަން ފެށުމާއެކު ބާ ރަންވޭ ބޭނުން ކުރަމުންދާނީ ޓެކްސީވޭއެއްގެ ގޮތުގައި ކަމަށެވެ.
ބާ ރަންވޭ އިން އައު ރަންވޭއަށް އޮޕަރޭޝަން ބަދަލުކުރުމަށްޓަކައި ކުރަންޖެހޭ މަސައްކަތްތަކަށް ބުދަ ދުވަހުގެ ރޭ 11:00 އިން ފެށިގެން 6 ވަނަ ދުވަހުގެ 7 ޖެހުމާއި ހަމައަށް ރަންވޭ ބަންދުކުރުމަށް ވަނީ ނިންމާފައެވެ. މިއީ އާއްމުކޮށް ރާއްޖެއަށް ފްލައިޓުތައް ދަތުރުކުރާ ގަޑިތަކަކަށް ނުވުމުން އެއަރލައިންތަކަށް މީގެ ސަބަބުން ދަތިތަކެއް ކުރިމަތި ނުވާނެކަމަށް އެމްއޭސީއެލުން ވިދާޅުވެއެވެ.
އައު ރަންވޭ ހުޅުވުމަށް ބާއްވާ ރަސްމިއްޔާތު ޝަރަފްވެރިކޮށްދެއްވުމަށް ހަމަޖެހިފައިވަނީ ރައިސުލްޖުމްހުރިއްޔާގެ ނައިބް ފައިސަލް ނަސީމެވެ. އައު ރަންވޭގައި އެންމެ ފުރަތަމަ ޖެއްސުމަށް ހަމަޖެހިފައިވަނީ އެމިރޭޓްސް އެއަރލައިންގެ ފްލައިޓެކެވެ.
ވީ.އައި.އޭގެ އައު ރަންވޭއަކީ 3400 މީޓަރު ދިގު، 65 މީޓަރު ފުޅާ ރަންވޭއެކެވެ. ކޯޑް.އެފް ފެންވަރުގެ މި ރަންވޭއަކީ ކޮމާޝަލް ދަތުރުތަކުގައި މިވަގުތު ބޭނުންކުރާ އެންމެ ބޮޑެތި ބޯޓުފަހަރުކަމަށްވާ A380 މަރުކާގެ ބޯޓު ފަހަރަށްވެސް ޖެއްސޭނެހެން ފަރުމާކޮށްފައިވާ ރަންވޭއެކެވެ.