ހުޅުމާލޭގައި މަރުވެފައި އޮއްވާ ފެނުނު މުޙައްމަދު އަޒްހާންގެ ފޯނު މިހާރު ހޯދިފައިވާކަމަށާއި ނަމަވެސް އޭނާ މަރާލާފައިވާ ކަމަށް ބެލެވޭ އެއްވެސް ހެއްކެއް މިހާތަނަށް ލިބިފައިނުވާ ކަމަށް ފުލުހުން ވިދާޅުވެއްޖެއެވެ.
މިދިޔަ މަހުގެ 18 ވަނަ ދުވަހުން ފެށިގެން ގެއްލިގެން ހޯދަމުންދިޔަ ހ.ބޮނޑިކަނދޮޅުގޭ މުޙައްމަދު އަޒްހާންގެ ހަށިގަނޑު ކަމަށް ބެލެވޭ ހަށިގަނޑު މިމަހުގެ 2 ވަނަ ދުވަހު ހުޅުމާޅެއިން ވަނީ ފެނިފައެވެ.
އަޒްހާންގެ މަރާއި ގުޅޭގޮތުން ފުލުހުން ނެރުނު ބަޔާނެއްގައި ވަނީ އަޒްހާން ގެއްލިގެން އާއިލާގެ ފަރާތުން ފުލުހުންނަށް މައްސަލަ ހުށައެޅި ހިސާބުން އެފަދަ މައްސަލަތަކުގައި ޢަމަލުކުރާ އުސޫލުގެ ދަށުން، މާލެއާއި ހުޅުމާލޭގައި ގާއިމްކުރެވިފައިވާ ޕޮލިސް ސްޓޭޝަންތަކަށާއި، ފުލުހުންގެ އިންޓެލިޖެންސަށް އެމަޢުލޫމާތު ހިއްސާކޮށްފައިވާކަމަށެވެ. އޭގެ އިތުރުން އިންޓެލިޖެންސް މެދުވެރިކޮށް ބެލިބެލުމުން އަޒްހާން ގެންގުޅޭ ފޯން ނަންބަރުގެ ސިގްނަލް އެންމެ ފަހުން ލިބިފައިވަނީ ހުޅުމާލެ ފޭސް 2ގައި ހުންނަ ސެލް ޓަވަރަކަށްކަން އެނގިފައިވާ ކަމަށް ފުލުހުން ނެރުނު ބަޔާނުގައިވެއެވެ.
އަދި ސެޕްޓެމްބަރ 20 ވަނަ ދުވަހުވެސް އަޒްހާންގެ ޚަބަރެއް ވެފައި ނުވާތީ އާއިލާގެ އިޒުނައާއެކު އޭނާ ހޯދުމަށް އެދުވަހުގެ ރޭގެ ވަގުތެއްގައި އިއުލާންކޮށްފައިވާކަމަށާއި، މިމައްސަލައިގެ ތަހްގީގްގައި އަޒްހާނާއި އެންމެ ފަހުން ބައްދަލުވި ކަމަށް ފާހަގަކުރެވުނު މީހުންނާ ސުވާލުކޮށް އެމީހުން ފޯރުކޮށްދިން މަޢުލޫމާތު ފުލުހުންގެ ސީސީޓީވީ ފުޓޭޖާއި، އަމިއްލަ ފަރާތްތަކުގެ ސީސީޓީވީ ފުޓޭޖުގެ އެހީގައި އަދި އެހެން ގޮތްގޮތުންވެސް ކަށަވަރުކޮށްފައިވާ ކަމަށް ފުލުހުން ވިދާޅުވިއެވެ.
އެގޮތުން ބެލިބެލުމުން ސެޕްޓެމްބަރ 18 ވަނަ ދުވަހުގެ ފަތިހުގެ ވަގުތެއްގައި ޓެކްސީއެއްގައި ހުޅުމާލޭ ފޭސް 1ގައި ހުންނަ ގެސްޓް ހައުސްއަކަށް އަޒްހާން ގޮސްފައިވާކަން ތަހްގީގަށް އެނގިފައިވާކަމަށާއި، އަޒްހާން ދިޔަ ގެސްޓް ހައުސްއާއި އެސަރަހައްދުގައި ލިބެން ހުރި ސީސީޓީވީ ފޫޓޭޖްތައް ނަގައި އެނަލައިޒް ކުރުމުގެ އިތުރުން އެ ސަރަހައްދުގައި ހަރަކާތްތެރިވާ އަވަށްޓެރި ފުލުހުންގެ އެހީތެރިކަމާއެކު ތަހްގީގަށް ބޭނުންވާ މަޢުލޫމާތު އެއްކުރުމުގެ މަސައްކަތްވެސް ކޮށްފައިވާކަަމަށް ފުލުހުންގެ ބަޔާނުގައިވެއެވެ.
މިގޮތުން ލިބުނު މަޢުލޫމާތުގެ މައްޗަށް ބިނާކޮށް ސެޕްޓެމްބަރ 26 ވަނަ ދުވަހު ހުޅުމާލެ ނިރޮޅު މަގުގައި ހުންނަ ސްކޭޓް ޕާކް ސަރަހައްދާއި، ވޯޓާ ތީމް ޕާކް ހަދަން ދޫކޮށްފައި އޮތް ސަރަހައްދު ބަލައި ފާސްކޮށްފައިވާކަމަށާއި، މި މަސައްކަތުގެ ތެރެއިން ސެޕްޓެމްބަރ 30 ވަނަ ދުވަހު ފުލުހުންނަށް ލިބުނު އިތުރު ސީސީޓީވީ ފޫޓޭޖުތަކެއްގެ އެހީގައި ލިބުނު މަޢުލޫމާތުތަކުން، ސެޕްޓެމްބަރ 18 ވަނަ ދުވަހުގެ ހެނދުނު ސްކޭޓް ޕާކާ ދިމާލު އަތިރިމައްޗަށް އަޒްހާން ފައިބާ މަންޒަރާއި، އަތިރިމަތިން އެއްގަމަށް އަރައިގެން އައިސް ސްކޭޓް ޕާކާއި ދިމާލުން ނިރޮޅު މަގަށް ނިކުންނަކަން އެނގިފައިވާކަމަށް ފުލުހުން ވިދާޅުވިއެވެ.
މި މަޢުލޫމާތުތަކާއެކު އަޒްހާން ފެންނާނެކަމަށް ބެލެވޭ ތަނާއި، އެންމެ ކައިރިން ލިބެންހުރި ސީސީޓީވީ ފޫޓޭޖު ނަގައި ބެލިއިރު އެ ފޫޓޭޖު ތަކުން އަޒްހާން ފެނިފައިނުވާތީ، އަނެއްކާވެސް ސްކޭޓް ޕާކް ހިމެނޭ ސަރަހައްދު ބަލައި ފާސްކުރުމަށް ތަހްގީގް ޓީމުން ނިންމިކަމަށްވެސް ފުލުހުން ވިދާޅުވިއެވެ.
އެގޮތުން އޮކްޓޫބަރު 2ވަނަ ދުވަހު އެސަރަހައްދު ބަލައި ފާސްކުރުމަށް ހިންގި އޮޕަރޭޝަންގެ ތެރެއިން ވޯޓާ ތީމް ޕާކް ހެދުމަށް ދޫކޮށްފައިވާ ސަރަހައްދާ ދިމާ ނިރޮޅުމަގު ހުޅަނގު ފަރާތް ބަލައި ފާސްކުރިއިރު، އެ ސަރަހައްދުގެ ވެޔޮތަކުގެ ތެރެއިން އަޒްހާންކަމަށް ބެލެވޭ މީހެއްގެ ހަށިގަނޑު ޑީކޮމްޕޯޒްވެފައި ވަނިކޮށް ފެނިފައިވާކަމަށް ފުލުހުން ވިދާޅުވިއެވެ.
އޮކްޓޫބަރު 2 ވަނަ ދުވަހު އަޒްހާންގެ ހަށިގަނޑުކަމަށް ބެލެވޭ ހަށިގަނޑު ފެނުނު ހިސާބުންފެށިގެން ގެއްލިގެން ހޯދާ މީހެއްގެ މައްސަލައަކުން މަރުގެ މައްސަލައަކަށް ތަހްގީގް ބަދަލުކޮށް ތަހްގީގް ފަށާފައިވާކަމަށާއި، ހަށިގަނޑުގެ އިތުރު ތަހްގީގްތައް ހެދުމަށް ރާއްޖެއިން ބޭރަށް ފޮނުވުމަށް ކުރަންޖެހޭ މަސައްކަތްވެސް ފުލުހުން ކުރަމުން އަންނަކަމަށް ބަޔާނުގައިވެއެވެ. ފުލުހުން ވިދާޅުވީ، އަޒްހާންގެ ފޯނު މިހާރު ހޯދިފައިވާކަމަށާއި، އޭނާ މަރާލާފައިވާކަމަށް ބެލެވޭ އެއްވެސް ހެއްކެ ނުވަތަ ގަރީނާއެއް މިމައްސަލައިގެ ތަހްގީގަށް މިހާތަނަށް ލިބިފައިނުވާކަމަށެވެ.
އަޒްހާން ހޯދުމުގެ މަސައްކަތް ފުލުހުން ކުރަމުން ދިޔައިރު، ތަހްގީގްގައި ކުރެވެމުން ދިޔަ މަސައްކަތްތައް ކޮންމެ ދުވަހަކު އާއިލާއާއި ހިއްސާކުރަމުން ދިޔަކަމަށްވެސް ފުލުހުން ވިދާޅުވިއެވެ.