މޫސުމަށް އަންނަމުންދާ ބަދަލުތަކާ ބެހޭ އ.ދ.ގެ މަހާސިންތާ (ކޮޕް27)އަކީ މޫސުމީ ބަދަލުތަކުގެ ސަބަބުން ލިބެމުންދާ ގެއްލުންތައް ކުޑަކުރުމަށް މަސައްކަތްކޮށް، ނަތީޖާ ނެރެވޭ ބައްދަލުވުމަކަށް ހެދުމަށް އ.ދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ގޮވައިލައްވައިފިއެވެ. ގުތެރޭޝް ވިދާޅުވީ މޫސުމީ ބަދަލުތަކާ ގުޅިގެން ޤައުމުތަކަށް ލިބެމުންދާ ގެއްލުންތަކާ މެދު އަޅައިނުލައި ތިބެވެން ނެތް ކަމުގައެވެ.
"ޕާކިސްތާނުގެ ތިންބައިކުޅަ އެއްބައި އެ އޮތީ ފެނު އަޑީގައި. މި އަހަރަކީ ފާއިތުވި 500 އަހަރުގެ ތެރޭގައި ވިލާތުގެ ޤައުމުތަކުން ކުރިމަތިލާން ޖެހުނު އެންމެ ހޫނު ގަދަ އަހަރު. ފިލިޕީންސްއަށް ވަނީ ބާރުގަދަ ތޫފާނެއް އަރައި ބޮޑެތި ގެއްލުންތަކެއް ދީފައި. ބާރުގަދަ އަދި ނުރައްކާތެރި ތޫފާނެއް ކަމުގައިވާ އިއަން ވަނީ އެމެރިކާއަށް އަރާފައި. މި ހުރިހާ ކަމަކުން ވެސް ހަނދާން ކޮށްދޭ ކަމަކީ، މޫސުމީ ބަދަލުތަކުގެ އަސަރު ހުރިހާ ޤައުމަކަށް، އަދި ހުރިހާ އިޤުތިޞާދަކަށް ކުރާނެ ކަން،" ގުތެރޭޝް ވިދާޅުވިއެވެ.
މޫސުމީ ބަދަލުތަކުގެ ސަބަބުން ޤުދުރަތީ ކާރިސާތައް ކުރިމަތިވެފައިވާ ޤައުމުތަކަށް އެހީވުމަށް ފިޔަވަޅުތަކެއް އަޅަން ޖެހިފައިވާ ކަމުގައި ގުތެރޭޝް ވިދާޅުވިއެވެ. އަދި، މިއަދު ފިޔަވަޅުތަކެއް ނާޅައިފި ނަމަ، މާދަމާ ލިބެން އޮތް ގެއްލުން މާ ބޮޑުވެދާނެ ކަމުގައި އޭނާ ވިދާޅުވިއެވެ. އެހެންކަމުން، ކުރިއަށް އޮތް ކޮޕް27ގެ ބައްދަލުވުމަކީ، ނަތީޖާ ޖެރެވޭ ބައްދަލުވުމަކަށް ހެދުމަށް އޭނާވަނީ ބައިނަލްއަޤުވާމީ މުޖުތަމަޢަށް ގޮވައިލައްވާފައެވެ.
ކޮޕް27ގެ ބައްދަލުވުން އޮންނާނީ އަންނަ ނޮވެންބަރު މަހުގެ 6އިން 18އަށް މިޞްރުގެ ރިސޯޓު ރަށެއް ކަމުގައިވާ ޝަރްމު އައްޝައިޚްގައެވެ. ކޮޕް27 ބައްދަލުވުމަށް ތައްޔާރުވުމުގެ ގޮތުން ޑިމޮކްރެޓިކް ރިޕަބްލިކް އޮފް ކޮންގޯގެ ވެރިރަށް ކިންޝާސާގައި ވަނީ ބައްދަލުވުމެއް ފަށާފައެވެ. މި ބައްދަލުވުމުގައި 50 އަށްވުރެ ގިނަ ޤައުމުގެ އޮފިޝަލުން ބައިވެރިވެއެވެ. މީގެ ތެރޭގައި އެމެރިކާގެ މޫސުމީ ބަދަލުތަކާ ބެހޭ ޚާއްޞަ މަންދޫބު ޖޯން ކެރީ ވެސް ހިމެނިވަޑައިގަންނަވައެވެ.
"މުޅި ދުނިޔެ އެކަތިގަނޑަކަށް ވެގެން މެނުވީ މޫސުމީ ބަދަލުތަކުގެ ނުރައްކަލުން ސަލާމަތްވެވޭކަށް ނެތް،" މި ބައްދަލުވުން ފެށުމުގެ ގޮތުން ވާހަކަފުޅު ދައްކަވަމުން ކޮންގޯގެ ތިމާވެއްޓާ ބެހޭ ވަޒީރު އީވް ބަޒައިބާ ވިދާޅުވިއެވެ. އަދި، މޫސުމީ ބަދަލުތަކުގެ ސަބަބުން ޤުދުރަތީ ކާރިސާތަކާ ކުރިމަތިލާން ޖެހިފައިވާ ޤައުމުތަކަށް އެހީވުމަށް ވެފައިވާ ވަޢުދުތައް ފުއްދުމަށް އޭނާ ވަނީ ތަރައްޤީވެފައިވާ ޤައުމުތަކަށް ގޮވައިލައްވާފައެވެ.
މިޞްރުގެ ޚާރިޖީ ވަޒީރު ސަމީރު ޝުކުރީ ވެސް ވަނީ، ގެއްލުން ލިބިފައިވާ ޤައުމުތަކަށް މާލީ އެހީތެރިކަން ބޭނުންވާ ކަން ފާހަގަ ކުރައްވާފައެވެ. އަދި، 2015ވަނަ އަހަރު ބޭއްވި ކޮޕް15 ބައްދަލުވުމުގައި ވަޢުދުވެފައިވާ ގޮތަށް، ހާލުގައި ޖެހިފައިވާ ޤައުމުތަކަށް އެހީވުމަށް 100 ބިލިޔަން ޑޮލަރު ފޯރުކޮށްދިނުމަށް ހަރުދަނާ މަސައްކަތެއް ކުރެވިފައި ނުވާ ކަމަށާއި، އެ ވަޢުދު ފުއްދިފައި ނުވާ ކަމަށް އޭނާ ވިދާޅުވިއެވެ.