ބައިނަލް އަގްވާމީ ޔޯގާ ދުވަސް ފާހަގަކުރުމަށް ގަލޮޅު ދަނޑުގައި ބޭއްވި ހަރަކާތައް ހުރަސް އަޅައި ހަމަނުޖެހުން ހިންގި މައްސަލާގައި 18 މީހެއްގެ މައްޗަށް ދައުވާ އުފުލައިފިއެވެ. ޕްރޮސެކިއުޓަރ ޖެނެރަލްގެ އޮފީހުން ވިދާޅުވީ މި އެންމެންގެ މައްސަލަ ކްރިމިނަލްކޯޓަށް ހުށައަޅާފައިވާކަމަށެވެ.
މި މައްސަލާގައި ދައުވާކުރި 18 މީހުންގެ މައްޗަށް ވަނީ އެކި ދައުވާ އުފުލާފައެވެ. އެގޭގެތެރޭގައި ޓެރަރިޒަމް އަމަލެއް ކުރުމަށް ހިތްވަރު ދިނުމުގެ ކުށުގެ ދައުވާއާ، ޓެރަރިޒަމް އަމަލެއް ކުރުމުގެ ކުށުގެ ދައުވާއާ، ޓެރަރިޒަމް އަމަލެއް ހިންގުމުގައި ބައިވެރިވުމުގެ ކުށުގެ ދައުވާއާ، ޓެރަރިޒަމް ޖަމާއަތަކަށް ތާއިދުކުރާ މީހެއްކަން ދޭހަވާ ފަދަ ލިޔުމެއް ގެންގުޅުމުގެ ކުށުގެ ދައުވާއާ، ހަތިޔާރު ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއާ، ހަތިޔާރު ބޭނުންކޮށްގެން މާރާމާރީ ހިންގަން އުޅުމުގެ ކުށުގެ ދައުވާވެސް ހިމެނެއެވެ. މީގެއިތުރުން ޤާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްދުގައި ހުރައެޅުމުގެ ކުށުގެ ދައުވާއާ، އަދުލު އިންސާފު ޤާއިމުކުރުމަށް ހުރަސް އެޅުމުގެ ކުށުގެ ދައުވާވެސް ވަނީ އުފުލާފައެވެ.
ޓެރަރިޒަމްގެ އަަމަލެއް ކުރުމަށް ހިތްވަރު ދިނުމުގެ ދައުވާ އުފުލި މީހުން
1- ފަޟްލޫން މުހައްމަދު ށ. މިލަންދޫ، ނާޒް
2- އާދަމް ނިޝާން ލ. މާމެންދޫ ، ސޯސަންވިލާ
މި މައްސަލާގައި މި ދެމީހުން ވަނީ މީގެކުރިން ހައްޔަރުކޮށްފައެވެ. މި ދެމީހުންގެ މައްޗަށް ކުށް ސާބިތުވެއްޖެނަމަ 10 އަހަރާއި 15 އަހަރާއި ދެމެދުގެ މުއްދަތެއްގެ ޖަލު ހުކުމެއް އަންނާނެއެވެ.
ޓެރަރިޒަމްގެ އަަމަލެއް ކުރަން އުޅުމުގެ ދައުވާ އުފުލި މީހުން
1- މުހައްމަދު ޛިލިއަން މއ. ކަނުހުރާ
2- އަބްދުﷲ ރިފާއު ތ. ތިމަރަފުށީ، ނަރުގިސްވިލާ
3- އަބޫބަކުރު ފާރިޣު ނި. މިލަދޫ، ކާނޭޝަންމާގެ
4- އަހްމަދު އަކްސަމް ރ. ކަނދޮޅުދޫ ، އަލަމާގެ
5- އަހްމަދު ނަޞޫޙް ގއ މާމެންދޫ ، އަސްރަފީވިލާ
6- ހަސަން ޝިފާޒު މ. ކުދެހިގެ
7- ޝަބިމް އާދަމް ފ. ދަރަނބޫދޫ ، އާބާދީ ގުލްޝަން
މީ މީހުންގެ މައްޗަށް ކުށްސާބިތުވެއްޖެނަމަ 20 އަހަރާއި 25 އަހަރާއި ދެމެދުގެ ޖަލު ހުކުމެއް އަންނާނެއެވެ.
ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ އުފުލި މީހުން
1- މުހައްމަދު އިސްމާއިލް ހއ. ހޯރަފުށީ ޔާގޫތްގެ
2- އަބްދުﷲ ނިޔާޒް ގ. ފީނިކްސް
3- އަލީ މުހައްމަދު ތ.ތިމަރަފުށީ ، އަލީއާބާދު
4- އިބްރާހިމް ޒިހާން ނ. ވެލިދޫ، މިލާނޯ
5- މުހައްމަދު ޝާން ލ. މުންޑޫ، އަންނާރުމާގޭ
6- ހުސައިން އަލީ ހދ. ކުޅުދުއްފުށީ، ބާބޫގޭ
7- އަހުމަދު އަލީ، މ. ފަޅުމަތީގޭ
މި ހަތް މީހުންގެ މައްޗަށް ކުށްސާބިތުވެއްޖެނަމަ 17 އަހަރާއި 20 އަހަރާއި ދެމެދުގެ ޖަލު ހުކުމެއް އަންނާނެއެވެ.
ޓެރަރިސްޓު ޖަމާއަތަކަށް ތާއިދުކުރާ މީހެއްކަން ދޭހަވާ ލިޔުމެއް ގެންގުޅެގެން ދައުވާ އުފުލި މީހުން
1- އަބްދުﷲ ރިފާއު ތ. ތިމަރަފުށީ، ނަރުގިސްވިލާ
މި ކުށް މީނާގެ މައްޗަށް ސާބިތުވެއްޖެނަމަ 1 އަހަރާއި 3 އަހަރާއި ދެމެދުގެ ޖަލު ހުކުމެއް އަންނާނެއެވެ.
ހަތިޔާރު ބޭނުންކޮށްގެން މާރާމާރީ ހިންގުމުގެ ކުށުގެ ދައުވާ އުފުލި މީހުން
1- ޝަބިމް އާދަމް ފ. ދަރަނބޫދޫ ، އާބާދީ ގުލްޝަން
މި ކުށް މީނާގެ މައްޗަށް ސާބިތުވެއްޖެނަމަ 7 އަހަރާއި 10 އަހަރާއި ދެމެދުގެ ޖަލު ހުކުމެއް އަންނާނެއެވެ.
ހަތިޔާރު ބޭނުންކޮށްގެން މާރާމާރީ ހިންގަން އުޅުމުގެ ކުށުގެ ދައުވާ އުފުލި މީހުން
1- އަބްދުﷲ ރިފާއު ތ. ތިމަރަފުށީ، ނަރުގިސްވިލާ
2- އަހްމަދު އަކްސަމް ރ. ކަނދޮޅުދޫ ، އަލަމާގެ
3- ހަސަން ޝިފާޒު މ. ކުދެހިގެ
މި ކުށް މި މީހުންގެ މައްޗަށް ސާބިތުވެއްޖެނަމަ 3 އަހަރާއި 5 އަހަރާއި ދެމެދުގެ ޖަލު ހުކުމެއް އަންނާނެއެވެ.
އަދުލު އިންސާފު ގާއިމުކުރުމަށް ހުރަސް އެޅުމުގެ ކުށުގެ ދައުވާ އުފުލި މީހުން
1- މުހައްމަދު އިސްމާއިލް ހއ. ހޯރަފުށީ ޔާގޫތްގެ
2- މުހައްމަދު ޛިލިއަން މއ. ކަނުހުރާ
މި ދެމީހުންގެ މައްޗަށް ކުށްސާބިތުވެއްޖެނަމަ 1 އަހަރާއި 7 މަހާއި 6 ދުވަހުގެ ޖަލު ހުކުމެއް އަންނާނެއެވެ.
މީގެއިތުރުން ގާނޫނު ތަންފީޒުކުރާ މުވައްޒަފެއްގެ މަސައްކަތަށް ހުރަސްއެޅުމުގެ ދައުވާ ވެސް 15 މީހެއްގެ މައްޗަށް އުފުލާފައިވެއެވެ.
މި އަހަރުގެ ޖޫންމަހުގެ 21 ވަނަދުވަހު ބޭއްވި ޔޯގާ ހަރަކާތައް ދެކޮޅަށް ހިންގި ހަމަނުޖެހުންތަކުގައި ބައިވެރިވީ މީހުން ބޭނުންކުރި ދިދަތައް ނެރުނީ އިދިކޮޅު ޕީޕީއެމްގެ އޮފީހުންކަމަށް ފުލުހުން ވަނީ މީގެކުރިން ބުނެފައެވެ. އަދި އެތަތަކެތި އެ އޮފީހުން އެދުވަހުގެ ފަތިހުގެ ވަގުތެއްގައި ނެރެމުންދާ މަންޒަރު ފެންނަ ފޮޓޯތަކެއްވެސް ވަނީ ސޯޝަލް މީޑިއާގައި އާއްމުވެފައެވެ.
ބައިނަލްއަޤްވާމީ ޔޯގާ ދުވަހަކީ ކޮންމެ އަހަރެއްގެ ޖޫންމަހުގެ 21 ވަނަ ދުވަސް ކަމަށް އދ. އިން ކަނޑައެޅުމާއެކު ރާއްޖޭގައިވެސް ކޮންމެ އަހަރަކު އެ ހަރަކާތް އަންނަނީ ބާއްވަމުންނެވެ. އެގޮތުން ކުރީގެ ރައީސް ޔާމީންގެ ވެރިކަމުގެ ދުވަސްވަރުވެސް މިޙަރަކާތް އެކި އަހަރުތަކުގައި ބާއްވާފައިވެއެވެ. އަދި އޭރުގެ ސަރުކާރުގެ ވަޒީރުންނާއި އެކި މުއައްސަސާތަކުގެ އިސްބޭފުޅުންވެސް މިޙަރަކާތުގައި ބައިވެރިވެފައި ވެއެވެ.