ހިތަދޫ ވިޔަފާރި ބަނދަރު ތަރައްޤީކުރުމުގެ މަޝްރޫޢު އަންނަމަހު ފެށޭނެކަމަށް އުއްމީދުކުރައްވާކަމަށް މޯލްޑިވްސް ޕޯޓްސް ލިމިޓެޑުން ބުނެފިއެވެ.
ނޫސްވެރިންނަށް މައުލޫމާތު ދެއްވަމުން މޯލްޑިވްސް ޕޯޓްސް ލިމިޓެޑްގެ ސީއީއޯ ޝާހިދު އަލީ ވިދާޅުވީ ހިތަދޫ ޕޯޓްގެ ހުރިހާ މަސައްކަތެއް ކުރަނީ އެމްޓީސީސީންކަމަށާއި، އަންނަމަހު ރީޑިވެލޮޕްމެންޓް ޕްރޮޖެކްޓް ފެށިގެންދާނެކަމަށް އުއްމީދުކުރައްވާކަމަށެވެ.
އެމްޕީއެލްގެ އޮފީހުގައި ނޫސްވެރިންނަށް މައުލޫމާތު ދެއްވަމުން އެމްޕީއެލްގެ ސީއީއޯ ޝާހިދު އަލީ ވަނީ އެމްޕީއެލްއިން އޮޕަރޭޓްކުރަމުންދާ ސަރަހައްދީ ބަނދަރުތަކުގެ މަސައްކަތްތަކާއި، އެތަންތަނުގެ ތަރައްޤީއަށް ކުރެއްވެމުންދާ މަސައްކަތްތަކުގެ މައްޗަށް އަލިއަޅުއްވާލައްވާފައެވެ.
ޝާހިދު ވިދާޅުވީ ހިތަދޫ ވިޔަފާރި ބަނދަރުގެ ރީޑިވެލޮޕްމެންޓް ޕްރޮޖެކްޓްގެ މަސައްކަތްތައް ބާރުދުވެލީގައި ކުރިއަށްދާއިރު، މި މަޝްރޫޢުގެ މައިގަނޑު ހުރިހާ މަަސައްކަތްތައް ނިމިފައިވާކަމަށެވެ.
"ޕޯޓްގެ ރީޑިވެލޮމެންޓް މާސްޓަރ ޕްލޭން އެއްކޮށް ނިމި، ޑިޒައިން ހެދި، ކޯސްޓިން ހެދި، އީއައިއޭވެސް މިހާރު މިވަނީ ހެދިފަ. ހުރިހާ މަސައްކަތެއް ކުރީ އެމްޓީސީސީއާއި ހަވާލުކޮށްގެން. މިހާރު އީއައިއޭވެސް އެޕްރޫވްވެފައި" ޝާހިދު އަލީ ވިދާޅުވިއެވެ.
މި ބަނދަރު ތަރައްޤީކުރެވުމުން މޫސުން ގޯސްވާ ދުވަސްވަރު ބޯޓުފަހަރު ތޮށިގަނޑަށް ކައިރި ކުރުމުގައި ދިމާވާ ދަތިތަކާއި، ބަނދަރުކޮށްފައި އޮންނަ ބޯޓުތަކުގެ ވާ ކަނޑައިގެންގޮސް ބޯޓުފަހަރުތަަކަށް ވާ ގެއްލުންތައް ކުޑަވެގެންދާނެކަމަށް އެމްޕީއެލްއިން ބުނެއެވެ.
އައްޑޫ ހިތަދޫ ވިޔަފާރި ބަނދަރުގެ އިތުރުން ކުޅުދުއްފުށީގެ ވިޔަފާރި ބަނދަރު ތަރައްޤީކުރުމުގެ މަސައްކަތްވެސް ކުރިއްދާކަމަށް ޝާހިދު ވިދާޅުވިއެެވެ. އެގޮތުން، އެ މަޝްރޫޢުގެ މާސްޓަރ ޕްލޭން ނިމިފައިވާއިރު، މިހާރު ކުރިއަށް ދަނީ ސާވޭ މަސައްކަތްތަކާއި އީއައިއޭގެ މަސައްކަތްތައްކަމަށް ޝާހިދު ވިދާޅުވެއެވެ.
ދެ މަޝްރޫޢު އެމްޓީސީއާ ހަވާލުކޮށްގެން ކުރިއަށްދާއިރު، ހިތަދޫ އަދި ކުޅުދުއްފުށި ވިޔަފާރި ބަނދަރުގެ އިތުރުން މާލޭގެ ވިޔާފަރި ބަނދަރުވެސް ތަރައްޤީކުރުމުގެ މަސައްކަތް ދަނީ އެމްޕީއެލުން ކުރަމުންނެވެ. އެގޮތުން، މާލޭ ވިޔަފާރި ބަނދަރުގެ ޖާގަ އިތުރުކުރުމުގެ ގޮތުން ޕޭވިންގެ ބޮޑުކުރުމާއި ބިންގަނޑު ލެވަލްކޮށް، ގާ އެތުރުމުގެ މަސައްކަތް ދަނީ ކުރަމުންނެވެ.