މަސްކިރުވުމުގައި ހުރި ދަތިތައް ހައްލުކޮށްދިނުމަށް މީގެ ކުރީގެ އެއްވެސް ސަރުކާރަކަށް ނުކުރެވޭ ވަރަށްވުރެ ބޮޑެތި މަސައްކަތްތަކެއް މިސަރުކާރުން ކުރަމުން އަންނަ ކަމަށް ފިޝަރީޒް މިނިސްޓަރ ޑރ. ހުސެއިން ރަޝީދު ހަސަން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މަޑަވެލި ދާއިރާގެ އެމްޑީޕީ މެމްބަރު ހުސައިން ފިރުޝާން ކުރެއްވި ސުވާލަކަށް ޖަވާބުދެއްވަމުން ފިޝަރީޒް މިނިސްޓަރ ޑރ. ހުސެއިން ރަޝީދު ހަސަން ވިދާޅުވީ މަސްކިރުވުމުގައި ހުރި ދަތިތަކަކީ އަބަދުވެސް ދިމާވާ މައްސަލައެއް ކަމަށެވެ. އެހެން ނަމަވެސް މި މައްސަލަ ހައްލުކުރުމަށް މިސަރުކާރުން އަމަލީ ގޮތުން ގިނަ މަސައްކަތްތަކެއް ކުރަމުންދާ ކަމަށް މިނިސްޓަރ ވިދާޅުވިއެވެ.
" މި މައްސަލަ ހައްލުކުރުމަށް ވޭތުވެދިޔަ އެއްވެސް ސަރުކާރަކުން އެކަށީގެންވާ އިންވެސްޓްމަންޓެއް ނުވަތަ އެކަށީގެންވާ ހައްލެއް ހޯދިފައެއް އަދިއެއް ނެތް، މަސް ނުގަނެވުމުގެ މައްސަލަ ހައްލުކުރުމަށް އަމަލީގޮތުން މަސައްކަތްކުރާ ހަމައެކަނި ސަރުކާރަކީ ރައީސް ޞާލިޙުގެ ސަރުކާރު" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ރާއްޖޭގައި މަސްވެރިކަން ރަނގަޅުވަނީ ކޮންމެ އަހަރެއްގެވެސް އޮކްޓޯބަރުމަހުން ފެށިގެން އޭޕްރީލްމަހުގެ ނިޔަލަށް ކަމަށެވެ. އަދި މަސް ކިރުވުމުގެ މައްސަލަ އެދުވަސްވަރު ދިމާވާކަން މިނިސްޓަރ ފާހަގަކުރެއްވިއެވެ. މިކަމަށް ހައްލު ހޯދުމަށްޓަކައި ސަރުކާރުން ކުރިއަށްގެންދާ ބައެއް މަޝްރޫޢުތަކުގެ ތަފްސީލްތައްވެސް މިނިސްޓަރވަނީ ހިއްސާކޮށްފައެވެ.
"ސައުދީ ޑިވެލޮޕްމަންޓު ފަންޑުގެ ލޯނުގެ ދަށުން، ކޫއްޑޫގައި 4000 ޓަނު، ގދ. ތިނަދޫގައި 1000 ޓަނު، މ. މުލަކުގައި 500 ޓަނުގެ ކޯލްޑު ސްޓޯރޭޖް ފެސިލިޓީ ގާއިމްކުރުމުންނާއި، އިންޑިއަން އެގްޒިމް ބޭންކުގެ އެހީގައި ފެލިވަރުގައި 4000 ޓަނުގެ ކޯލްޑު ސްޓޯރޭޖާއި ދުވާލަކު 100 ޓަނުގެ ކޭނަރީ ގާއިމްކުރުމުން މަސް ނުގަނެވުމުގެ މައްސަލައަށް ދެމެހެއްޓެނިވި ހައްލެއް ލިބޭނެ،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މަސް ކިރުވުމުގައި ހުރި ދަތިތަކަށް ހައްލެއް ހޯދައިދިނުމަށް ބޭރުގެ މަސް ބޯޓުތަކަށް ރާއްޖޭގެ ކަނޑުގެ ސަރަހައްދުގައި މަސް ގަތުމުގެ ފުރުސަތު ހުޅުވާލާފައިވާ ކަމަށެވެެ. އަދި މިކަމަށް ބޭނުންވާ ލައިސަންސްވެސް ދޫކުރަމުންދާ ކަމަށް މިނިސްޓަރ ވިދާޅުވިއެވެ.
މަސް ކިރުވުމުގައި ދިމާވާ ދައްޗަކީ މަސްވެރިންގެ އެންމެ ބޮޑު އެއް ޝަކުވާއެވެ. އެހެންކަމުން މިކަމަށް ހައްލު ހޯދުމަށް ސަރުކާރުންގެންދަނީ ގިނަ މަސައްކަތްތަކެއް ކުރަމުންނެވެ. އެގޮތުން މިފްކޯގެ މަސް ކިރުވުމުގެ މަސައްކަތަށް އިތުރު ބޯޓުތައް ހޯދުމަށްވެސް ސަރުކާރުން އަންނަނީ މަސައްކަތް ކުރަމުންނެވެ.