ހުޅުމާލެ ފޭސް ދޭކުން ގެއްލިގެން ހޯދަމުންދާ ކ. މާލެ / ހ. ބޮނޑިކަނދޮޅުގެ، 27 އަހަރުގެ މުޙައްމަދު އަޛުހާން އެންމެފަހުން ފެނިފައިވަނީ ހުޅުމާލެ ފޭސް އެކެއްގެ "ރެޑްބުލް ދަނޑު" ސަރަހައްދުންކަމަށް ފުލުހުން ހާމަކޮށްފިއެވެ.
މުޙައްމަދު އަޛުހާން ސެޕްޓެމްބަރު 18 ވަނަ ދުވަހުގެ ދަނވަރު 12:00 ހާއިރުން ފެށިގެން ހަބަރެއް ނުވެ، ގެއްލިގެން އާއިލާއިން ފުލުހުންނަށް ރިޕޯޓްކޮށްފައިވަނީ މިމަހުގެ 19 ވަނަ ދުވަހުގެރެއެވެ.
ފުލުހުން ވިދާޅުވީ މި މަޢުލޫމާތު ފުލުހުންނަށް ލިބުމާއި ގުޅިގެން މުޙައްމަދު އަޛުހާނު ހޯދުމުގެ މަސައްކަތް ވަގުތުން ފަށައި، އަޛުހާނުގެ މަޢުލޫމާތުތައް ފުލުހުންގެ އެކި ބަހާތަކަށް ހިއްސާކޮށްފައިވާކަމަށެވެ. ނަމަވެސް ފުލުހުންގެ އެކި ބަހާތަކުން ކުރެވެނު މަސައްކަތުން މުޙައްމަދު އަޛުހާން ހޯދިފައިނުވާތީ، އާންމު ރައްޔިތުންގެ އެހީތެރިކަމަށް އެދި އާންމުކޮށް އިއުލާނުކުރެވި، އޭނާ އެންމެ ފަހުން ފެނިފައިވާކަމަށް މަޢުލޫމާތު ލިބިފައިވާ ސަރަހައްދުގެ ސީސީޓީވީ ފުޓޭޖްތައް ބެލުމުގެ މަސައްކަތް ދަނީ ކުރެވެމުންކަމަށް ފުލުހުން ވިދާޅުވެއެވެ.
ފުލުހުން ވިދާޅުވީ މިހާތަނަށް ބެލިބެލުމުން މުޙައްމަދު އަޛުހާން ވަނީ ހުޅުމާލެ ފޭސް އެކެއްގައި އޭނާ ހުރި ގެސްޓް ހައުސްއިން ކާރެއްގައި ހިޔާ ފްލެޓް 13 ވަނަ ޓަވަރަށް ގޮސް، އެޓަވަރަށް އެރުމަށްފަހު ފަތިހު 4:53 އެހާކަންހާއިރު އެޓަވަރު ކައިރިން ހުދުކުލައިގެ ޓެކްސީއަކަށް އަރައިގެން ފޭސް އެކެއްގައި އޭނާ ހުރި ގެސްޓް ހައުސް ސަރަހައްދަށް އަނބުރާ ގޮސްފައިކަމަށެވެ. އަދި އެ ދެ ކާރުގެ ޑްރައިވަރުން މިހާރު ދެނެގަނެވިފައިވާއިރު، އެންމެ ފަހުން އަޛުހާން ފެނިފައިވާ ސަރަހައްދުވެސް ވަނީ ދެނެގަނެވިފައިކަމަށާއި، އެގޮތުން އަޛުހާން އެންމެ ފަހުން ފެނިފައިވާކަމަށް މިހާރު އެނގިފައިވާ ސަރަހައްދަކީ ފޭސް އެކެއްގެ "ރެޑްބުލް ދަނޑު" ސަރަހައްދުކަމަށް ފުލުހުން ވިދާޅުވެއެވެ. މީގެއިތުރުން އަޛުހާން ވައިގެ މަގުން ރާއްޖޭގެ އެހެން އަތޮޅަކަށް އަދި ރާއްޖެއިން ބޭރަށް ފުރައިގެން ގޮސްފައިނުވާކަންވެސް މިހާތަނަށް ލިބިފައިވާ މަޢުލޫމާތުތަކުން އެނގިފައިވާކަމަށްވެސް ފުލުހުން ވިދާޅުވެއެވެ.
މުޙައްމަދު އަޛުހާން ހޯދުމުގެ މަސައްކަތް މިހާރުވެސް ފުލުހުން ކުރަމުންދާއިރު، އޭނާ އެންމެ ފަހުން ފެނިފައިވާކަމަށް ބެލެވޭ ސަރަހައްދުގެ ސީސީޓީވީ ފުޓޭޖްތައް ބެލުމުގެ މަސައްކަތް ދަނީ ކުރަމުންކަމަށް ފުލުހުން ވިދާޅުވެއެވެ. އެހެންކަމުން، މުޙައްމަދު އަޛުހާންއާ ބެހޭ އެއްވެސް މަޢުލޫމާތެއް ލިބިފައިވާނަމަ ލަސް ނުކުރައްވައި ހުޅުމާލެ ޕޮލިސް ފޭސް ދޭއް އިންވެސްޓިގޭޝަންގެ ނަންބަރު 9393351 ނުވަތަ ފުލުހުންގެ ހޮޓްލައިން 3322111 އަށް ގުޅުއްވައި ހިއްސާކުރެއްވުމަށް ފުލުހުން އެދެއެވެ.