ހުޅުލެ ފަރަށް ބޯޓެއް އަރައި ލިބުނު ގެއްލުމުގެ ބަދަލުގެ ގޮތުގައި ތިން ލައްކަ ރުފިޔާއަށް ވުރެ ބޮޑު އަދަދަކުން ޖޫރިމަނާކޮށްފިއެވެ.
ޖޫރިމަނާކޮށްފައި ވަނީ "އެމްވީ ޗެން ގްލޯރީ 9" ނަމަކަށް ކިޔާ ބޯޓެކެވެ. މި ބޯޓު ފަރަށް އެރީ މި މަހުގެ 2 ވަނަ ދުވަހުއެވެ.
އެންވަޔަރަންމަންޓް ޕްރޮޓެކްޝަން އެޖެންސީ (އީޕީއޭ) އިން ބުނީ އެ ބޯޓު ޖޫރިމަނާކުރީ ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދުގެ ދަށުން ގެއްލުމުގެ ބަދަލުގެ ގޮތުގައި 365،000 ރުފިޔާއިން ކަމަށެވެ.
އެ އެޖެންސީން ބުނިގޮތުގައި ތަނަށް ލިބުނު ގެއްލުންތައް ބެލުމަށް، އުޅަނދުގެ ވެރިފަރާތް އައްޔަންކުރި ސާވެޔަރަކާ އެކު މި މަހުގެ 10 ގައި އެ ސަރަހައްދަށް ގޮސް ޖޮއިންޓް ސާވޭއެއް ކޮށްފައިވެއެވެ. ސާވޭއިން އެނގޭ ގޮތުގައި ފަރަށް ކޮންމެވެސް ވަރެއްގެ ގެއްލުންތަކެއް ލިބިފައިވާ ކަމަށް ބުނެއެވެ.
"އެމްވީ ޗެން ގްލޮރީ 9" ގެ ލޯކަލް އެޖެންޓަކީ ގްރޭސް އެޓޯލް ޕްރައިވެޓް ލިމިޓެޑެވެ. އެ ކުންފުނިން ވަނީ މި މަހުގެ 13 ގައި ޓްރާންސްޕޯޓް އެންޑް ސިވިލް އޭވިއޭޝަން އޮތޯރިޓީއަށް އެ ފައިސާ ދައްކާފައި ކަމަށް ވެސް އީޕީއޭ އިން ބުނެ އެވެ.