އެންމެން ގުޅިގެން މަސައްކަތްކުރަމުން ދަނީ ރާއްޖޭގެ ގައުމީ ފުޓްބޯޅަ ޓީމު އެއްކޮށް ޒުވާން ކުރުމަށް ކަމަށް ޓީމުގެ ކެޕްޓަން އަދި ތަޖުރިބާކާރު ޑިފެންޑަރު އަކުރަމް އަބްދުލް ޣަނީ (އަކޫ) ބުނެފިއެވެ.
މި ސީޒަނުގެ އެފްއޭ ކަޕުގެ ފައިނަލް މެޗަށް ފަހު މީޑިއާތަކަށް ދިން އިންޓަވިއުއެއްގައި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވީ ގައުމީ ކޯޗު އިޓަލީގެ ފްރެންޗެސްކޯ މޮރިއޭރޯގެ އިރުޝާދުގެ ދަށުން ގައުމީ ޓީމު ޒުވާން ކުޅުންތެރިން ލައިގެން ވަރުގަދަ ކުރުމުގެ މަސައްކަތް ފަށާނީ ލާއޯސް އާއި ބްރުނާއީ ދާރުއްސަލާމް މެޗުން ކަމަށެވެ.
އެއާއެކު މި މެޗުތަކަށް އެކުލަވާލި ސްކޮޑުން ޒުވާން ކުުންތެރިންނަށް ފުރުސަތު ދީފައިވާއިރު، އޭގެ ތެރޭގައި ނިޝާމް މުޙައްމަދު ރަޝީދު (ޕޮގްބާ)، އަހުނަފް ރަޝީދު (އަހުއްކޮ)، އަޙްމަދު ބައްސާމް މުޙައްމަދު ނައީމް (ބައްކު) އަދި ގޯލްކީޕަރު އިޔާން އަބްދުލް އަލީމް (ޗިކީ) ހިމެނެއެވެ.
އޭގެ ތެރެއިން އަހުއްކޮއަށް ވަނީ ބްރޫނާއީ މެޗުގެ ފުރަތަމަ އެގާރައިން ފުރުސަތު ދީފައެވެ. މިއީ އަހުއްކޮ ރާއްޖޭގެ ގައުމީ ސީނިއާ ސްކޮޑުގައި ހިމެނިގެން ކުޅުނު ފުރަތަމަ މެޗެވެ. އެކަމަކު މެޗުގެ ފުރަތަމަ ހާފުގައި އަހުއްކޮއަށް ވަނީ އަނިޔާވެފައެވެ.
ލާއޯސް މެޗުގެ ކުރިން ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން އަކޫ ބުނީ ޒުވާން ކުޅުންތެރިންނާއެކު ލާއޯސް ޓީމުވެސް ވަރަށް ބޮޑަށް ބަދަލުވެފައިވާ ކަމަށެވެ. ހަމަ އެގޮތަށް ރާއްޖެ ޓީމުވެސް ވަރަށް ބޮޑަށް ބަދަލުވެފައިވާ ކަމަށާއި، ކޯޗު މޮރިއޭރޯގެ ވިސްނުން ހުރީ ވަރަށް ގިނަ ކުޅުންތެރިންތަކަކަށް ފުރުސަތު ދީގެން، ކުޅުންތެރިން ކުރިއަށް އޮތް ތަނަށް ތައްޔާރުކުރަން ކަމަށެވެ.
އަދި މިހާރު ދަނީ ޓްރާންޒިޝަން ޕީރިއަޑެއް ކަމަށާއ، އެގޮތުން މުޅި ޓީމު އެއްކޮށް ޒުވާން ކުރުމުގެ މަގުސަދުގައި އެންމެން ގުޅިގެން މަސައްކަތްކުރަމުންދާ ކަމަށްވެސް ބުންޏެވެ. އެހެންކަމުން މި މެޗުތަކަކީ ޓީމަށް ރަނގަޅު ފުރުސަތެއް ކަމަށްވެސް އަކޫ ވަނީ ބުނެފައެވެ.
ބުރޫނާއީގައި ރާއްޖޭން އެކުވެރިކަމުގެ ދެ މެޗު ކުޅޭއިރު، ފުރަތަމަ މެޗުގައި މިދިޔަ ބުދަ ދުވަހު ގައުމީ ޓީމުން ވަނީ 3-0 ގެ ނަތީޖާއަކުން ބުރޫނާއީ ބަލިކޮށްފައެވެ.
ރާއްޖޭން ވަނީ މީގެ ކުރިން ލާއޯސްއާއެކު ރަސްމީ ދެ މެޗެއް ކުޅެފައެވެ. އެއީ 2016 ވަނަ އަހަރުގެ އޭޝިއަން ކަޕް ކޮލިފައިންގައެވެ. އެ ފަހަރު މާލޭގައި ކުޅުނު މެޗުގައި ރާއްޖޭން ވަނީ 4-0 އިން މޮޅުވެފައެވެ. އެކަމަކު ލާއޯސްގައި ކުޅުނު މެޗު ނިމުނީ 1-1 ގެ ނަތީޖާއަކުން އެއްވަރުވެގެންނެވެ.
އަދި އޭގެ ކުރިން 2014 ވަނަ އަހަރު މާލޭގައި ލާއޯސްއާ ދެކޮޅަށް އެކުވެރިކަމުގެ މެޗެއް ކުޅުނުއިރު، އެ މެޗު ރާއްޖޭން ކާމިޔާބުކުރީ 7-1 ގެ ނަތީޖާއަކުންނެވެ.
އެކުވެރިކަމުގެ މެޗެއްގައި ލާއޯސް އާއި ރާއްޖެ ބައްދަލުކުރާއިރު، ލާއޯސް މި ވަގުތު އޮތީ ދުނިޔޭގެ ރޭންކިންގެ 183 ވަނައިގައެވެ. އަދި ރާއްޖެ އޮތީ 156 ވަނައިގައެވެ. ލާއޯސް އާއި ރާއްޖެ ބައްދަލުކުރާ މެޗު ފެށުމަށް ހަމަޖެހިފައިވަނީ ހޮނިހިރު ދުވަހު ރާއްޖެ ގަޑިން 13:00 ގައެވެ.