ޖަޕާނުގެ ޓްރެވަލް ޓްރޭޑް އަދި ފަތުރުވެރިންގެ މެދުގައި ރާއްޖޭގެ މަޤުބޫލުކަން އިތުރުކުރުމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)އިން ޓޫރިޒަމް އެކްސްޕޯ ޖަޕާނުގައި ބައިވެރިވެއްޖެއެވެ.
މިއީ ކޯވިޑް-19ގެ ބަލިމަޑުކަން ފެށުނު ފަހުން އެމްއެމްޕީއާރުސީއިން ޖަޕާނުގެ މާކެޓުގައި ރާއްޖެ ޕްރޮމޯޓުކުރުމަށް ބައިވެރިވާ ފުރަތަމަ މިފަދަ ހަރަކާތެވެ. މި ހަރަކާތް ކުރިއަށްދާނީ މި މަހުގެ 22ވަނަ ދުވަހުން ފެށިގެން 25ވަނަ ދުވަހުގެ ނިޔަލަށް ޓޯކިޔޯ ބިގް ސައިޓުގައެވެ.
ޖަޕާނުގައި ބާއްވާ އެންމެ ބޮޑު ބައިނަލްއަޤްވާމީ ފަތުރުވެރިކަމުގެ ޙަރަކާތްކަމަށްވާ މިފެއާއަކީ، ފަތުރުވެރިކަމުގެ މަންޒިލްތަކާއި، ދުނިޔޭގެ ފަތުރުވެރިކަމުގެ ޚިދުމަތްދޭ ފަރާތްތައް އެއްތަނަކުން ބައްދަލުކޮށް ވިޔަފާރީގެ ފައިދާގެ އެކި މުޢާމަލާތްތައް ކުރިއަށް ގެންދިއުމަށް ގިނަ ފުރުސަތުތަކެއް ލިބިގެންދާ ޙަރަކާތެކެވެ.
މި ފެއާގައި އެމްއެމްޕީއާރުސީން ފަތުރުވެރިކަމުގެ ސްޓޭކްހޯލްޑަރުންނާ ބައްދުލުކޮށް ރާއްޖޭގެ ފަތުރުވެރިކަމުގެ މުހިންމު މައުލޫމާތު ހިއްސާކުރާނެއެވެ. މީގެއިތުރުން ސްޓޭންޑަށް ޒިޔާރަތްކުރާ މީހުންނަށް އަމާޒުކޮށްގެން ތަފާތު ޙަރަކާތްތަކެއް ކުރިއަށް ގެންދެވޭނެއެވެ. އެގޮތުން ސޯޝަލް މީޑިއާ ކޮންޓެސްޓްތަކާއި، ކުއިޒްތައް ބާއްވައި މިހަރާކާތްތަކުގައި ބައިވެރިވާ މީހުންނަށް ތަފާތު ހަދިޔާތައް ދޭނެކަމަށް އެމްއެމްޕީއާރުސީން ވިދާޅުވެއެވެ.
މި ފެއާގައި ރާއްޖޭގެ ސްޓޭންޑް ފަރުމާކޮށްފައިވަނީ ޖަޕާނުގެ ފަތުރުވެރިންގެ މެދުގައި މަޤުބޫލު، ރާއްޖޭގެ ތަފާތު ތަޖުރިބާތައް ދައްކުވައިދޭ ތަސްވީރުތައް ހިމެނޭ ގޮތަށެވެ. މިފެއާގައި އެމްއެމްޕީއާރުސީއާއެކު އިންޑަސްޓްރީގެ 06 ކުންފުންޏަކުން 12 މަންދޫބުން ބައިވެރިވެއެވެ.
ރާއްޖެ ފަތުރުވެރިކަމުގެ މަންޒިލެއްގެ ގޮތުން ޕްރޮމޯޓުކޮށް، ރާއްޖޭގެ ފަތުރުވެރިކަމުގެ އުފެއްދުންތަކާއި (ރިސޯޓް، ހޮޓަލް، ގެސްޓްހައުސް، ލިވަބޯޑް) ތަފާތު ތަޖުރިބާތައް އެމްއެމްޕީއާރުސީ އިން މާކެޓްކުރާނެއެވެ. ރާއްޖެ ގުދުރަތީ ގޮތުން އުފެދިފައިވާ ގޮތާއި، ރާއްޖޭގެ ފަތުރުވެރިކަމުގެ ދާއިރާއިން ހިދުމަތް ފޯރުކޮށްދޭ ތަފާތު ސެގްމަންޓްތައް (ރޮމޭންސް، ހަނީމޫން، ފެމިލީ، އެޑްވެންޗަރ، ވޯޓަރ ސްޕޯޓްސް/ޑައިވް، މައިސް) ސެގްމެންޓުތައް މި ފެއަރގައި ޖަޕާނުގެ ޓޫރިޒަމް ދާއިރާގެ ސްޓޭކްހޯލްޑަރުންނާއި ކޮންސިއުމަރުންނަށް ދައްކާލާނެއެވެ.
ކޯވިޑްގެ ބަލިމަޑުކަމުގެ ކުރިން ޖަޕާނަކީ ރާއްޖެއަށް އެންމެ ގިނައިން ފަތުރުވެރިން ދަތުރުކުރި އެއް މާކެޓެވެ. 2019ވަނަ އަހަރު ޖަޕާން އޮތީ ރާއްޖެއަށް 9ވަނަ އަށް އެންމެ ގިނައިން ފަތުރުވެރިން ދަތުރުކުރި މާކެޓްގެ ގޮތުގައެވެ. ކޯވިޑާ ގުޅިގެން ބައިނަލްއަޤްވާމީ ދަތުރުފަތުރަށް ބަންދުކޮށްފައި އޮތް ޗަޕާން މިފަހުން ހުޅުވާލާފައިވާއިރު، މިދިޔަ އޮގަސްޓުމަހުގެ 10ގެ ނިޔަލަށް ޖަޕާނުން ޖުމްލަ 2909 ފަތުރުވެރިން އެޤައުމުން ރާއްޖެއަށް އައިސްފައިވެއެވެ.