ރާއްޖޭގެ އިގްތިސާދު ވަކި ސިނާއަތަކަށް އެކަނި ބަރޯސާނުވެ، ހުރިހާ ދާއިރާއަކުންވެސް މީހުން ބިނާކޮށް، އިތުރު ސިނާއަތްތައް ކުރިއަރުވަންޖެހޭކަމަށް ނާއިބު ރައީސް ފައިސަލް ނަސީމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ވިލާ ކޮލެޖުން ދަސްވެނިވި ދަރިވަރުންގެ ތެރެއިން ހައި އެެޗީވާސް އެވޯޑް ހާސިލުކުރި ދަރިވަރުންނަށް އެވޯޑް ދިނުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ވިލާ ކޮލެޖްގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ ނާއިބު ރައީސް ފައިސަލް ނަސީމް ވިދާޅުވީ ކޯވިޑާއެކު ރާއްޖޭގެ އިގްތިސާދަށް ކުރިމަތިވި ހީނަރުކަމުގެ ސަބަބުތަކުގެ ތެރޭގައި އެއް ސިނާއަތަކަށް ބަރޯސާވުން ހިމެނޭކަމަށެވެ. އެހެންކަމުން ކުރިއަށް އޮތްތަނުގައި އިގްތިޞާދީ ކުރިއެރުންތައް ހޯދަން ބޭނުންވާނަމަ އިގްތިޞާދު ޑައިވާސިފައި ނުވަތަ ސިންދަފާތުކުރަން މަސައްކަތްކުރަންޖެހޭކަމަށް ނާއިބު ރައީސް ވިދާޅުވިއެވެ.
ނާއިބު ރައީސް ވިދާޅުވީ ކުރިމަތިވެދާނެ ކޮންމެ ހާލަތަކަށްވެސް ތައްޔާރަށް އޮތް މުޖްތަމައުައެއް އުފެއްދުމަށް އައު ވިސްނުންތަކެއް ނެރެންޖެހޭކަމަށާއި، އެކަމަށްޓަކައި ހުރިހާ ދާއިރާއަކުންވެސް މީހުން ބިނާކުރުމަށް ހާއްސަ ސަމާލުކަމެއް ދޭންޖެހޭކަމަށެވެ.
ރާއްޖޭގެ އިގުތިސާދު މިއަދުވެސް އޮތީ ފަތުރުވެރިކަމުގެ ސިނާއަތަށް ބަރޯސާވެފައިކަން ފާހަގަކުރައްވާ ނާއިބު ރައީސް ވިދާޅުވީ ރާއްޖޭގައި ހުރި ވަސީލަތްތައް ހޯދައި، ކުރެވެން ހުރި އިތުރު މަސައްކަތްތައް ފަށަންޖެހޭކަމަށެވެ.
ވިލާ ކޮލެޖުން ދަސްވެނިވި ދަރިވަރުންގެ ތެރެއިން ހައި އެެޗީވާސް އެވޯޑް ހާސިލުކުރި ދަރިވަރުންނަށް އެވޯޑް ދިނުމަށް ބޭއްވި ރަސްމިއްޔާތުގައި ވަނީ ގާސިމް އިބްރާހިމް އެވޯޑް ފޯ އެކްސެލެންސް ހާސިލުކުރި 22 ދަރިވަރުންނަށް އެވޯޑް ހަވާލުކޮށްފައެވެ. އަދި ވިލާ ކޮލެޖުގެ ގޯލްޑް މެޑަލް އަދި އިންޑަސްޓްރީ ޕްރައިޒްް ހާސިލުކުރި 42 ދަރިވަރަކަށާއި އޭސީސީއޭ ނެޝަނަލް ރެސިޑެންޓް ޕްރައިޒް ހާސިލުކުރި 7 ދަރިވަރުންނަށާއި ވިލާ ކޮލެޖުގެ ބުކް ޕްރައިޒް ހާސިލުކުރި 107 ދަރިވަރުންނަށް މި ރަސްމިއްޔާތުގައި އެވޯޑް ދީފައިވެއެވެ.