މިއަހަރު ނިމުމުގެ ކުރިން އިހަވަންދިޕޮޅުގައި ބައިނަލްއަގުވާމީ ބަންކަރިންގެ ހިދުމަތް ފެށިގެންދާނެކަމަށް މިނިސްްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ ވިދާޅުވެއްޖެއެވެ.
މިނިސްޓަރ ނަހުލާ މިހެން ވިދާޅުވީ ބައިނަލްއަގުވާމީ ކަނޑުދަތުރާއި ބެހޭ ދުވަސް ފާހަގަކުރުމަށް ބޭއްވި ޖަލްސާގައި ވާހަކަފުޅުދައްކަވަމުންނެވެ.
ބައިނަލްއަގުވާމީ ކަނޑުދަތުރާއި ބެހޭ ދުވަސް ފާހަގަކުރުމަށް ބޭއްވި ޖަލްސާގައި ވާހަކަފުޅުދައްކަވަމުން މިނިސްޓަރ ނަހުލާ ވިދާޅުވީ ރާއްޖެ ހިމެނޭ ސަރަހައްދުން ދަތުރުކުރާ އުޅަނދުތަކަށް ތެޔޮ ފޯރުކޮށްދިނުމަށް އިހަވަންދިޕޮޅުގައި ތެޔޮ ސްޓޯރޭޖެއް ގާއިމްކޮށް، ބަންކަރިންގެ ހިދުމަތް ފެށުމަށް ވާންޖެހޭ ތައްޔާރީތައް ވަމުންދާ ކަމަށެވެ.
"އުތުރުގައި ބަންކަރިންގެ ހިދުމަތް ފެށުމަށް ވާންޖެހޭ ތައްޔާރީތައް ދަނީ ކުރެވެމުން.މި މަސައްކަތް މިއަހަރު ނިމުމުގެ ކުރިން ފެށިގެން ދާނެ" ނަހުލާ ވިދާޅުވިއެވެ.
މިނިސްްޓަރ ނަހުލާ ވިދާޅުވީ ރާއްޖެއަކީ މީގެ 30 އަހަރު ކުރީން މެރިޓައިމް ސިނާއަތުގައި ނަން ހިނގާ ގައުމެއްކަމަށްވިޔަސް ވޭތުވެދިޔަ އަހަރުތަކުގައި އެ ސިނާއަތް ކުރިއެރުވުމަށް އެކަށީގެންވާ މަސައްކަތްތަކެއް ކުރެވިފައި ނެތުމުގެ ސަބަބުން ސިނާއަތަށް ވަނީ ވަރަށް ބޮޑު ހީނަރުކަމެއް އައިސްފައިކަމަށެވެ. ނަމަވެސް ރައީސުލްޖުމްހުރިއްޔާ އިބްރާހީމް މުހައްމަދު ޞާލިހުގެ ސަރުކާރުން މެރިޓައިމް ސިނާއަތް ކުރިއެރުވުމަށް ހާއްސަ އިސްކަމެއް ދީގެން މަސައްކަތްތަކެއް ފަށާފައިވާކަން މިނިސްްޓަރ ނަހުލާ ފާހަގަކުރެއްވިއެވެ. މިގޮތުން މެރިޓައިމް ސިނާއަތަށް ގާބިލް، ހަރުދަނާ، ތައުލީމީ މީހުން ނެރުމަށް އެކިއެކި ތަމްރީން ޕްރޮގްރާމްތައް ފަށާފައިވާކަމަށާއި، އެ ޕްރޮގްރާމްތަކުގެ ސަބަބަން ރާއްޖެއަށް ލާބައާއި މަންފާ ކުރާނެކަމަށް މިނިސްޓަރ ނަހުލާ ވިދާޅުވިއެވެ.
"ސީމަނުންނަކީ ކީވޯކާސްގެ ގޮތުގައި މިއަހަރު ކަނޑައަޅައި، އެފަރާތްތަކަށް ހާއްސަ ގޮތްތަކެއް ވަނީ ހަމަޖެހިގެން ގޮސްފައި. މިކަމުގެ ސަބަބުން ކޯވިޑަށްފަހު ރާއްޖެ އަންނަ އާގުބޯޓު ފަހަރު އިތުރުވެ، ރާއްޖެގެ ޝިޕިންގެ އިންޑަސްޓްރީއަށް ކުރަމުން އަންނަ ފައިދާ ދަނީ އެތައް ގުނައެއް އިތުރުވަމުން." ނަހުލާ ވިދާޅުވިއެވެ.
މިނިސްޓަރ ނަހުލާގެ ވާހަކަފުޅުގައި ވަނީ ޓެކްނޮލޮޖީ ދާއިރާގައި ދުނިޔެ ކުރިއެރުންތައް ހޯދަމުންދާއިރު ކަނޑު އުޅަނދުފަހަރުވެސް ތަރައްގީކުރަންޖެހޭނެކަން ފާހަގަކުރައްވާފައެވެ. އަދި ތިމާވެއްޓާއި ރަށްޓެރި އައު ހޯދުންތައް ހޯދައި، އެ ހޯދުންތަކުގެ އެހީގައި ކަނޑު އުޅަނދު ފަހަރާއި އޭގެ ވަށައިގެންވާ މާހައުލު ސަލާމަތާއި ރައްކާތެރިކަމުގައި ބޭއްވުމަށް ކެނޑިނޭޅި މަސައްކަތްކުރަންޖެހޭކަމަށްވެސް މިނިސްޓަރ ނަހުލާ ވިދާޅުވިއެވެ.