ބުރޫނާއީގައި ކުޅުމަށް ހަމަޖެހިފައިވާ ބައިނަލްއަގުވާމީ އެކުވެރިކަމުގެ ދެ މެޗުގެ ބޭނުމަކީ ޒުވާން ކުޅުންތެރިންނާއެކު ރަނގަޅު ޓީމެއް ބިނާކުރުން ކަމަށް ގައުމީ ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯ ބުނެފިއެވެ.
ރާއްޖޭން ބައިނަލްއަގުވާމީ އެކުވެރިކަމުގެ ދެ މެޗު ކުޅުމަށް ހަމަޖެހިފައިވަނީ ލާއޮސް އާއި ބުރޫނާއީ ދެކޮޅަށެވެ.
މި މެޗުތަކަށް އެކުލަވާލި ސްކޮޑުން ޒުވާން ކުުންތެރިންނަށް ފުރުސަތު ދީފައިވާއިރު، އޭގެ ތެރޭގައި ނިޝާމް މުޙައްމަދު ރަޝީދު (ޕޮގްބާ)، އަހުނަފް ރަޝީދު (އަހުއްކޮ)، އަޙްމަދު ބައްސާމް މުޙައްމަދު ނައީމް (ބައްކު) އަދި ގޯލްކީޕަރު އިޔާން އަބްދުލް އަލީމް (ޗިކީ) ހިމެނެއެވެ.
މި ފަހަރުގެ ސްކޮޑުގައި ގައުމީ ޓީމަށް ބައެއް ބަދަލުތައް ގެނައިރު، މި ސީޒަނުގެ އެފްއޭ ކަޕުގެ ފައިނަލް މެޗަށް ފަހު މީޑިއާތަކަށް ދިން އިންޓަވިއުއެއްގައި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވަނީ ގައުމީ ފުޓްބޯޅަ ޓީމުގެ ކަންކަން އަލުން ފަށާއިރު ދެން ބޭނުންވަނީ ބޮޑު ބަދަލަކާއެކު ފެށުމަށް ކަމަށާއި، އަމާޒަކީ ޒުވާން ސްކޮޑަކާއެކު މިހާރުން ފެށިގެން ވަރުގަދަ ޓީމެއް އެކުލަވާލުން ކަމަށް ވިދާޅުވެފައެވެ.
ބުރޫނާއީއާ ދެކޮޅަށް ކުޅުމަށް ހަމަޖެހިފައިވާ މެޗުގެ ކުރިން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މޮރިއޭރޯ ބުނީ ހަ ވަރަކަށް ދުވަހު ކުރިއަށްގެންދިޔަ ފަރިތަކުރުންތަކާ އަޅާބަލާއިރު ޓީމުގެ ކުޅުންތެރިންގެ މަސައްކަތް ރަނގަޅު ކަމަށެވެ. އަދި މިހާރު ބޭނުމަކީ ޒުވާން ކުޅުންތެރިންނާއެކު ސީނިއާ ބައެއް ކުޅުންތެރިން ހިމަނައިގެން ރަނގަޅު ޓީމެއް ބިނާކުރުން ކަމަށާއި، މި މެޗުތަކުން އެކަމަށް މަގުފަހުވެގެންދާނެ ކަމަށް އުއްމީދުކުރާ ކަމަށްވެސް ބުންޏެވެ.
ފީފާ ދުވަސްތަކުގައި މި މެޗުތައް ކުޅޭތީ، މިއީ ފީފާ ރޭންކިންއަށްވެސް ގުނާނެ މެޗުތަކެކެވެ. އެންމެ ފަހުން ނެރުނު ފީފާ ރޭންކިންގައި ރާއްޖެ އޮތީ 156 ވަނައިގައެވެ. އަދި ލާއޯސް 183 ވަނައިގައި އޮތްއިރު، ބުރޫނާއީ އޮތީ 190 ވަނައިގައެވެ.
މޮރިއޭރޯ ބުނީ ރާއްޖެއަށް ވުރެ ރޭންކިން ދަށް ގައުމުތަކާ ދެކޮޅަށް މެޗު ކުޅުމުގެ ބޭނުމަކީ ހަމަކަނި ރާއްޖެއަށް އޭގެ ފައިދާ ހޯދުން ނޫން ކަމަށާއި، މި މެޗުތަކުގެ ސަބަބުން ބުރޫނާއީއަށްވެސް ކުރިއެރުން ލިބިގެންދާނެ ކަމަށެވެ. އެހެންކަމުން ދެ ގައުމުގެ ފުޓްބޯޅަ އެސޯސިއޭޝަން ގުޅިގެން ކުރަމުންދާ މަސައްކަތް ކޯޗު ވަނީ ފާހަގަކޮށްފައެވެ.
ބުރޫނާއީގައި ގައުމީ ޓީމުން އެކުވެރިކަމުގެ ދެ މެޗު ކުޅޭއިރު، މި މެޗުތަކަށް ތައްޔާރުވުމުގެ ގޮތުން ގައުމީ ޓީމުން ވަނީ ދާދި ފަހުން ބ. އޭދަފުށީގައި ކުލަބު އޭދަފުއްޓާ ދެކޮޅަށް އެކުވެރިކަމުގެ މެޗެއްވެސް ކުޅެފައެވެ. އެ މެޗުން ގައުމީ ޓީމު މޮޅުވީ 3-0 ގެ ނަތީޖާއަކުންނެވެ.
ބުރޫނާއި މެޗުގެ ކުރިން ވާހަކަދައްކަމުން ގައުމީ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) ބުނީ މި މެޗުތަކަށް ނުކުންނަނީ ބޮޑު މެދުކެނޑުމަކަށްފަހު ކަމަށާއި، އެކަމަކު އޭދަފުށީގައި ކުޅެވުނު މެޗާއެކު ޓީމު އަލުން އެއްކޮށްލުމުގެ ފުރުސަތު ލިބިގެންދިޔަ ކަމަށެވެ. އަދި އެކުވެރިކަމުގެ މެޗުތަކަށް ޒުވާން ގިނަ ކުޅުންތެރިންނާއެކު ނުކުންނައިރު، މިއީ އެ ކުޅުންތެރިންނަށް ލިބިގެންދާނެ ރަނގަޅު ތަޖުރިބާއެއް ކަމަށްވެސް ވަނީ ބުނެފައެވެ.
ބައިނަލްއަގުވާމީ އެކުވެރިކަމުގެ މެޗަކަށް ރާއްޖޭން އެންމެ ފަހުން ނިކުމެފައިވަނީ މި އަހަރުގެ މާޗު މަހުގެ 24 ވަނަ ދުވަހު ބަންގްލަދޭޝްއާ ދެކޮޅަށެވެ. ގައުމީ ފުޓްބޯޅަ ދަނޑުގައި ކުޅުނު އެ މެޗު ރާއްޖޭން ވަނީ 2-0 ގެ ނަތީޖާއަކުން ކާމިޔާބުކޮށްފައެވެ.
ބައިނަލްއަގުވާމީ އެކުވެރިކަމުގެ މެޗެއްގައި ބުރޫނާއީއާ ދެކޮޅަށް ރާއްޖެ ނުކުންނައިރު، މި މެޗު ކުޅުމަށް ހަމަޖެހިފައިވަނީ ބުދަ ދުވަހު ރާއްޖެ ގަޑިން 13:00 ގައެވެ.