އިފޮޕްކާގެ 45ވަނަ ބައްދަލުވުން ނޮވެމްބަރ މަހު ރާއްޖޭގައި ބާއްވާގޮތައް ހަމަޖެހިއްޖެއެވެ. މި ބައްދަލުވުން ބާއްވާ ތާރީޚު ކޯވިޑާ ގުޅިގެން 2ފަހަރު ވަނީ ބަދަލުކޮށްފައެވެ.
ކޮންމެ އަހަރަކުވެސް ބާއްވާ އިފޮޕްކާގެ މި ބައްދަލުވުމަކީ ޞަރަޙައްދީ ފެންވަރެއްގައި ބާއްވާ ޢިމާރާތްކުރުމުގެ ދާއިރާގެ އެންމެ ބޮޑު އެއް ބައްދަލުވުމެވެ. މި ބައްދަލުވުން މިއަހަރު ރާއްޖޭގައި ކުރިއަށްދާނީ ނޮވެމްބަރ މަހުގެ 15އިން 19އަށެވެ. ރާއްޖެއިން މި ބައްދަލުވުމަށް ކަނޑައަޅާފައިވާ ޝިޢާރަކީ "ކޮންސްޓްރަކްޝަން ވިތް ކޮންޒަވޭޝަން – ބިލްޑް އަ ބެޓަރ ވޯލްޑް" މިއެވެ.
5 ދުވަހުގެ މުއްދަތަކަށް ކުރިއަށްދާ މި ކޮންވެންޝަންގައި އޭޝިއާ ޕެސިފިކްގެ ހުރިހައި ޤައުމުތަކުން އެ ޤައުމުގެ ކަންޓްރީ ރިޕޯޓް ހުށައަޅާ ޖަލްސާގައި ވާހަކަދައްކާނެއެވެ. މި ކޮންވެންޝަންގައި އޭޝިއާ ޕެސިފިކްގެ 20 ޤައުމާއި، ޔޫއެންގެ 10 ވަރަކަށް އެސޯސިއޭޝަނުން ބައިވެރިވާނެކަމަށް މަސީން ބުނެއެވެ.
މަސީން ބުނީ މިއީ ރާއްޖެއަށް ވަރަށް ބޮޑަށް ފައިދާ ކުރާނެ ކޮންވެންޝަނަކަށް ވެގެންދާނެކަމަށެވެ. ސަބަބަކީ އޭޝިއާ ޕެސިފިކްގެ 20 ޤައުމުގެ އިމާރާތްކުރުމުގެ ސިނާއަތުގައި ތިބި އެންމެ ފުންނާބުއުސް ފަރާތްތައް ކޮންވެންޝަންގައި ބައިވެރިވުމެވެ. ދިވެހި ކޮންޓްރެކްޓަރުންނާއި، ވިޔަފާރިވެރިންނާއި ޑިވެލޮޕަރުން އެމީހުންނާއި އެކުގައި މަޝްވަރާކުރުމާއި ބައްދަލުކޮށް ވާހަކަދައްކާ ހަދާލަން ވަރަށް ރަނގަޅު ވަގުތަކަށް ވާނެކަމަށް މަސީން ބުނެއެވެ.
މިއީ އިފޮޕްކާގެ ބައްދަލުވުމެއް ރާއްޖޭގައި ބާއްވާ ފުރަތަމަ ފަހަރަށްވާއިރު މިދިޔަ އަހަރު އިފޮޕްކާ ބައްދަލުވުން ބާއްވާފައިވަނީ މެލޭޝިޔާގައެވެ. އެބައްދަލުވުމުގައި އިފޮޕްކާގެ ކުރިޔަށް އޮތް ދައުރުގެ ރައީސްކަމަށް މަސީގެ ރައީސް މުޙައްމަދު އަލީ ޖަނާޙު ވަނީ އިންތިހާބުކޮށްފައެވެ.
ކޮންމެ އަހަރަކު ބާއްވާ އިފޮޕްކާގެ ބައްދަލުވުމުގެ ތެރެއިން ޞަރަޙައްދީ ފެންވަރެއްގައި ޢިމާރާތްކުރުމުގެ ދާއިރާ ހަރުދަނާކޮށް، އެއް ކުންފުނި އަނެއް ކުންފުންޏާއެކު މަސައްކަތްކުރެވޭނެ ގޮތްތަކާބެހޭ ގޮތުން މަޝްވަރާކުރެއެވެ. އަދި ޢިމާރާތްކުރުމުގެ ދާއިރާއަށް ކުރިމަތިވެފައިވާ މައްސަލަތައް ޙައްލުކުރުމާބެހޭ ގޮތުންވެސް މަޝްވަރާކުރެވޭނެއެވެ.