ޔޫކްރެއިނުގެ ސިފައިންނާއި އެ ޤައުމުގެ ރައްޔިތުންނާ ދެކޮޅަށް ރަޝިޔާ ސިފައިން ހިންގާފައިވާ އިންސާނިއްޔަތާ ޚިލާފު ޖަރީމާތައް ތަހުޤީޤު ކުރަން ޚާއްޞަ ޓްރައިބިޔުނަލްއެއް އެކުލަވައިލަން ވިލާތުގެ އިއްތިހާދު (އީ.ޔޫ)އިން ގޮވައިލައިފިއެވެ. އެ އިއްތިހާދުން މި ކަމަށް ގޮވައިލާފައި ވަނީ މަރުވެފައިވާ ގިނަ އަދަދެއްގެ ބަޔަކު ވަޅުލާފައިވާ ބޮޑެތި ވަޅުގަނޑުތަކެއް ޔޫކްރެއިނުން ފެނުމާ ގުޅިގެންނެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ ފެބުރުވަރީ މަހުގެ 24 ވަނަ ދުވަހު ޚާއްޞަ އަސްކަރީ އޮޕަރޭޝަނެއްގެ ނަމުގައެވެ. ހަނގުރާމައިގެ ކުރީކޮޅު ޔޫކްރެއިނުގެ އިރުމައްޗާއި ދެކުނުގެ ބައެއް ސަރަޙައްދުތައް ރަޝިޔާ ސިފައިން ހިފިއެވެ. ނަމަވެސް، ޔޫކްރެއިނުގެ ފައުޖުތަކުން މިހާރު ދަނީ އެ ސަރަޙައްދުތައް މިނިވަން ކުރަމުންނެވެ.
އެންމެ ފަހުން މިނިވަން ކޮށްފައިވާ ސަރަޙައްދުތަކުގެ ތެރޭގައި ޔޫކްރެއިނުގެ އިރުމަތީގައިވާ ރަށެއް ކަމުގައިވާ އިޒްޔުމް ހިމެނެއެވެ. ގިނަ އަދަދެއްގެ މީހުން ވަޅުލާފައިވާ 450 އަށްވުރެ ގިނަ ވަޅުގަނޑު އެ ރަށުން ފެނިފައިވެއެވެ. އެ ތަނުގައި ވަޅުލާފައިވާ މީހުންގެ ހަށިތައް ނަގައި، ސަހަރާތަކުގައި ވަޅުލުމަށް ޔޫކްރެއިނުގެ އޮފިޝަލުން ދަނީ މަސައްކަތް ކުރަމުންނެވެ.
އެ ތަނުން ފެނުނު ހަށިތަކުން، އަނިޔާކޮށްފައިވާ ނިޝާންތައް ފެނިފައިވާ ކަމުގައި ޔޫކްރެއިނުން ތުހުމަތު ކުރެއެވެ. މިހާތަނަށް ފެނިފައިވާ 1,000 އަށްވުރެ ގިނަ މީހުންގެ ތެރެއިން 99 އިންސައްތަ ހަށިތަކުން އަނިޔާގެ ނިޝާންތައް ފެނިފައިވާ ކަމަށާއި، ގިނަ މީހުންގެ އަތްފައި ބަނދެފައިވާ ކަމުގައި ޚާރްކިވްގެ އޮފިޝަލުން ބުނެއެވެ. އަދި، ރަޝިޔާ ސިފައިން ހައްޔަރުކުރި އެ ޤައުމުގެ ސިފައިންނާއި ޢާންމު ރައްޔިތުންނަށް އަނިޔާ ކުރަން ބޭނުން ކޮށްފައިވާ 10 ޢިމާރާތެއް ފެނިފައިވާ ކަމުގައި ޔޫކްރެއިނުން ބުނެއެވެ.
"މިއީ 21 ވަނަ ޤަރުނުގައި ހިނގައިގެން ވާނެ ފަދަ ކަންތައްތަކެއް ނޫން. ޢާންމުން ރައްޔިތުންނާ ދެކޮޅަށް ހިންގައިގެން ވާނެ އަމަލުތަކެއް ނޫން. ދީގެންވާނެ އަނިޔާތަކެއް ނޫން. މިއީ ހިތަށް ވެސް ނާރާ ފަދަ ނުބައި ކަމެއް،" މި ކަމާ ގުޅޭ ގޮތުން ވާހަކަފުޅު ދައްކަވަމުން ވިލާތުގެ އިއްތިހާދުގައި ރިޔާސަތު ބަލަހައްޓާ ޗެކް ރިޕަބްލިކްގެ ޚާރިޖީ ވަޒީރު ޔާން ލިޕަވްސްކީ ވިދާޅުވިއެވެ.
ޔޫކްރެއިނުގެ ޢާންމު ރައްޔިތުންނާ ދެކޮޅަށް އިންސާނިއްޔަތާ ޚިލާފު ޖަރީމާތައް ހިންގާފައިވާ ބަޔަކު ހޯދައި، އެ މީހުންގެ ތަހުޤީޤު ހިންގައި، ހައްޤު އަދަބު ދޭން ޖެހޭ ކަމުގައި އޭނާ ވިދާޅުވިއެވެ. އަދި، މި ކަން ކުރެވޭނީ މިނިވަން ޓްރައިބިޔުނަލްއަކަށް ކަމުގައި ވެސް އޭނާ ވިދާޅުވިއެވެ.
ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވެސް ވަނީ މި ކަން ތަހުޤީޤު ކޮށްދިނުމަށް އެދި ގޮވައިލައްވާފައެވެ. "މިއީ ނާޒީން ހިންގި ފަދަ އަމަލުތަކެއް. ރަޝިޔާއިން ވެސް އެ ފަދަ އަމަލުތައް ހިންގަމުން އެ ދަނީ. ޢާންމުންނަށް އަނިޔާކުރަން ބޭނުން ޚާރްކިވްގައި ބޭނުން ކޮށްފައިވާ 10 ޢިމާރާތެއް ފެނުނު. މި ކަމުގައި ޒިންމާވާ މީހުންނަށް ހައްޤު އަދަބު ދޭން ޖެހޭ،" ޒެލެންސްކީ ވިދާޅުވިއެވެ.
ގިނަ އަދަދެއްގެ ބަޔަކު ވަޅުލާފައިވާ ވަޅުތައް ފެނުމުން އެމެރިކާގެ ޚާރިޖީ ވަޒީރު އެންޓޮނީ ބްލިންކަން ވިދާޅުވީ، މިއީ ރަޝިޔާ ސިފައިން ޔޫކްރެއިނުގެ ޢާންމުންނާ ދެކޮޅަށް ހަނގުރާމައިގެ ކުށްތައް ހިންގާފައިވާ ކަމުގެ ހެކި ކަމުގައެވެ. ފަރަންސޭސި ވިލާތުގެ ރައީސް އެމަނުއެލް މެކްޚޯން ސިފަ ކުރައްވާ ގޮތުގައި މިއީ ގަތުލުއާންމެކެވެ.
ވިލާތުގެ އިއްތިހާދުގެ އެންމެ އިސްވެރިޔާ އުރުސުލާ ފޮންޑެ ލަޔަން ވިދާޅުވީ ރަޝިޔާގެ ރައީސް ވްލަޑިމިއަރ ޕުޓިން މި ކަމުގެ ފުރިހަމަ ޒިންމާ އުފުއްލަވަން ޖެހިވަޑައިގަންނަވާނެ ކަމަށެވެ. އަދި، އޭނާގެ މައްސަލަ ބައިނަލްއަޤުވާމީ ޖިނާޢީ ކޯޓުން ބަލަން ޖެހޭ ކަމުގައެވެ. އ.ދ.އިން ބުނީ، މި ކަން ތަހުޤީޤު ކުރުމަށް ޚާއްޞަ ޓީމެއް ފޮނުވުމަށް މަސައްކަތް ކުރަމުންދާ ކަމުގައެވެ.
ޔޫކްރެއިނުގައި ރަޝިޔާއިން ކުރަމުންދާ ހަނގުރާމައިގައި ކެމިކަލް އަދި ނިއުކްލިޔަރ ހަތިޔާރު ބޭނުން ނުކުރުމަށް އެމެރިކާގެ ރައީސް ޖޯ ބައިޑަން ދާދިފަހުން ވަނީ ޕުޓިން އަށް ގޮވައިލާފައެވެ. ޕުޓިން ވިދާޅުވަނީ، ހަނގުރާމަ ހުއްޓުމަކާ ގާތް ވެސް ނުވާ ކަމުގައެވެ. އަދި، ރަޝިޔާ ސިފައިން ބޮޑެތި ކުރިއެރުންތަކެއް ހޯދަމުންދާ ކަމުގައެވެ.