ލުބުނާނާއި ޔަހޫދީން އިސްރާޢީލާ ދެމެދު އޮންނަ ސަރަޙައްދީ އިމުގެ އަމަންބެލެހެއްޓުމުގައި ހަރަކާތްތެރިވާ އ.ދ.ގެ ޞުލްޙަ ބަލަހައްޓާ ފައުޖު (ޔުނިފިލް)ގެ ޒިންމާތަކާއި ބާރުތަކަށް ބަދަލުތަކެއް ގެނައުމުން ހިޒްބުاللهގެ އިސް ލީޑަރު ޙަސަން ނަޞްރު އ.ދ.އަށް ފާޑުކިޔައިފިއެވެ. އޭނާ އ.ދ.އަށް ފާޑުކިޔާފައި ވަނީ ޓީވީ މެދުވެރިކޮށް ދިން ބަސްދީގަތުމެއްގައެވެ.
އ.ދ.ގެ ސަލާމަތީ މަޖިލީހުން ވަނީ ޔުނިފިލްގެ ޒިންމާތައް އިތުރު އެއް އަހަރު ދުވަހުގެ މުއްދަތަށް އިތުރު ކުރަން އޮގަސްޓު 31 ގައި ނިންމާފައެވެ. އަދި، ބާރުތަކަށް ބަދަލުތަކެއް ގެނެސްފައެވެ. ކުރިން ހަމަޖެހިފައި އޮތް ގޮތުން، ޔުނިފިލްގެ ސިފައިންނަށް އެ ސަރަޙައްދުގައި ހަރަކާތްތެރި ވެވޭނީ ލުބުނާނުގެ އަސްކަރިއްޔާއާ ގުޅިގެންނެވެ. އޮޕަރޭޝަންތައް ހިންގޭނީ ލުބުނާނުގެ އަސްކަރިއްޔާއާ މަޝްވަރާ ކުރުމަށް ފަހުއެވެ.
ނަމަވެސް، އޮގަސްޓު 31 ގައި ޔުނިފިލްގެ ޒިންމާތަކަށް ގެނައި ބަދަލާއެކު، އެ ފައުޖުގެ ސިފައިންނަށް ލުބުނާނުގެ ސަރަޙައްދީ އިން ހިމެނޭ ސަރަޙައްދުގައި މިނިވަންކަމާ އެކު ހަރަކާތެރިވެ، އޮޕަރޭޝަންތައް ހިންގުމުގެ ހުއްދަ ވަނީ ދީފައެވެ. މިއީ، ލުބުނުގައި ހަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ ހިޒްބުاللهއިން އެދޭ ގޮތެއް ނޫނެވެ.
"މިއީ އިސްރާޢީލުން ރާވައިގެން ހިންގާފައިވާ ޖަރީމާއެއް. މިއީ ލުބުނާނުގެ މިނިވަންކަމާއި ސިޔާދަތަށް އަރައިގަތުމަށް އިސްރާޢީލުން އަޑީގައި އޮވެގެން އ.ދ. މެދުވެރިކޮށް ކޮށްފައިވާ ކަމެއް،" ނަޞްރުالله ބުންޏެވެ. ޔުނިފިލްގެ ސިފައިންގެ ޒިންމާތަކަށް ބަދަލު ގެނައުމުގެ ފުރުޞަތު ދިނުމުން ނަޞްރުالله ވަނީ ލުބުނާނުގެ ސަރުކާރަށް ފާޑު ކިޔާފައެވެ.
ނަޞްރުاللهގެ ފާޑުކިޔުންތަކަށް ޔުނިފިލްއިން ވަނީ ރައްދު ދީފައެވެ. ބުނީ، ކުރިއަށް އޮތް ތަނުގައި ވެސް ލުބުނާނުގެ އަސްކަރިއްޔާއާ ގުޅިގެން މަސައްކަތް ކުރާނެ ކަމުގައެވެ. އަދި، އޮޕަރޭޝަންތައް ހިންގުމުގެ ކުރިން އެ ޤައުމުގެ އަސްކަރިއްޔާއާ މަޝްވަރާ ކުރުން މަތީ ދެމި އޮންނާނެ ކަމުގައެވެ.
ލުބުނާނާއި ޔަހޫދީ އިސްރާޢީލާ ގުޅޭ ސަރަޙައްދީ އިމުގެ ޞުލްޙައާއި އަމަން ބެލެހެއްޓުމުގެ ޒިންމާތަކާ ޔުނިފިލްއިން ހަވާލުވެފައި ވަނީ މީގެ 40 އަހަރު ކުރިންނެވެ. އެއީ 1978 ވަނަ އަހަރުއެވެ. ޞުލްހަ ބެލެހެއްޓުމާ ޔުނިފިލްއިން ހަވާލުވީ، ޔަހޫދީ އިސްރާޢީލުން ލުބުނާނަށް އަރައި ބިންތަކަށް ވެރިވެގަންނަން ކުރި މަސައްކަތްތަކަށް ފަހުއެވެ.
2006 ވަނަ އަހަރު ލުބުނާނާއި ޔަހޫދީ އިސްރާޢީލާ ދެމެދު ކުރި 36 ދުވަހުގެ ހަނގުރާމައަށް ފަހު ޔުނިފިލްގެ ސިފައިންގެ އަދަދާއި ޒިންމާތައް ވަނީ އިތުރު ކޮށްފައެވެ. އެ ސަރަޙައްދުގެ އަމަން ބެލެހެއްޓުމުގައި ޔުނިފިލްގެ 10,500 އަށްވުރެ ގިނަ ސިފައިން މިހާރު ވެސް ދަނީ ހަރަކާތްތެރިވަމުންނެވެ.