ޢުރުދުންގެ ވެރިރަށް ޢައްމާނުގައި ވެއްޓުނު ޢިމާރާތެއްގެ ދަށުން ހަތަރު މަހުގެ ތުއްތު ކުއްޖަކު ދިރިއޮއްވާ ސަލާމަތް ކޮށްފިއެވެ. ޢައްމާނުގެ ޖަބަލް އަލް-ވަބްދާ ޑިސްޓްރިކްޓުގައި ހުރި ޢާންމުން ދިރިއުޅޭ ޢިމާރާތް ވެއްޓިފައި ވަނީ ސެޕްޓެންބަރު 15 ވަނަ ދުވަހުއެވެ.
ހަތަރު ބުރީގެ ޢިމާރާތުގެ ދަށުވެފައިވާ ކަމަށް ބެލެވޭ މީހުން ސަލާމަތް ކުރުމަށް ކުއްލި ހަލާތްތަކުގައި ހަރަކާތްތެރިވާ 100 އަށްވުރެ ގިނަ މީހުން އަދިވެސް ދަނީ މަސައްކަތް ކުރަމުންނެވެ. މި ހާދިސާގައި މަރުވި މީހުންގެ އަދަދު މިހާރު ވަނީ 11 އަށް އަރާފައެވެ.
ޢިމާރާތުގެ ދަށުން ސަލާމަތް ކުރެވުނު ހަތަރު މަހުގެ ކުއްޖާގެ ނަމަކީ މަލަކެވެ. "އަހަރެންގެ ހިތަށް ލިބުނު އުފާވެރިކަން ދުލުން ބަޔާން ކޮށްދޭން ވެސް ނޭނގޭ. އޭނާ ސަލާމަތާއި ރައްކާތެރިކަމުގައި ދިރިއޮއްވާ ފެނުމުން ޙަމްދު ކުރަން،" ތުއްތު ކުއްޖާގެ މަންމަ ކަމުގައިވާ އިޞްރާ ރާއިދު ބުންޏެވެ.
މަލަކު ސަލާމަތް ކުރެވުނު ނަމަވެސް، މި ހާދިސާގައި ޢިމާރާތުގެ ދަށުވެ މަރުވި މީހުންގެ ތެރޭގައި ކުޑަކުދިން ހިމެނެއެވެ. މީގެ ތެރޭގައި އެއް ޢާއިލާއަކަށް ނިސްބަތްވާ ތިން ކުދިން ވެސް ހިމެނެއެވެ. އެއީ، 17 އަހަރާއި 12 އަހަރާއި 9 އަހަރުގެ ތިން ކުދިންނެވެ. ނަމަވެސް، 45 އަހަރުގެ މީހެއް ވަނީ ދިރިހުއްޓާ ސަލާމަތް ކުރެވިފައެވެ.
ޢިމާރާތް ވެއްޓެން މެދުވެރިވި ސަބަބެއް ކަމަށް ބެލެވެނީ، މަރާމާތު ކުރުމުގެ ކަންކަމަށް ފަރުވާ ކުޑަ ކުރުމެވެ. މި ހާދިސާއާ ގުޅިގެން ޢުރުދުންގެ ބޮޑުވަޒީރު ބިޝަރް އަލް ޚަސަވްނީ ވަނީ ފުރިހަމަ ތަޙުޤީޤެއް ހިންގުމަށް އަންގަވާފައެވެ.
ޢުރުދުންގެ ޕްރޮސިކިއުޓަރ ޖެނެރަލްގެ އޮފީހުން ވެސް ވަނީ މި ހާދިސާ ހިނގަން މެދުވެރިވި ސަބަބު ދެނެގަތުމަށް ތަހުޤީޤެއް ފަށާފައެވެ. މި ހާދިސާގެ އެއް ދުވަސް ކުރިން ޢިމާރާތުގެ އެތެރޭގައި ތޮރުފުމަށް މަސައްކަތްތަކެއް ކޮށްފައިވާ ކަމުގައި އެ އޮފީހުން ބުނެއެވެ.
ތަހުޤީޤުގެ ދަށުން ތިން މީހަކު ހައްޔަރު ކުރުމަށް ޕްރޮސިކިއުޓަރ ޖެނެރަލްގެ އޮފީހުން ވަނީ އަމުރު ކޮށްފައެވެ. މި ތިން މީހުންގެ ތެރޭގައި ހިމެނެނީ ޢިމާރާތުގެ މެނޭޖަރާއި، އެ ތަނުގެ މަރާމާތުގެ މަސައްކަތްތަކާ ހަވާލުވި އިތުރު ދެ މީހެކެވެ.