ރަޝިޔާ ސިފައިން ޔޫކްރެއިނަށް އަރައި ފަށާފައިވާ ހަނގުރާމައަށް އެއްވެސް ބަދަލެއް ގެންނަން ވިސްނާފައި ނުވާ ކަމުގައި ރަޝިޔާގެ ރައީސް ވްލަޑިމިއަރ ޕުޓިން ވިދާޅުވެއްޖެއެވެ. އޭނާ މިހެން ވިދާޅުވީ، އުޒްބެކިސްތާނުގައި މިހާރު ކުރިއަށްދާ ޝެންގްހާއީ ކޯޕޮރޭޝަން އޮގަނައިޒޭޝަން (އެސް.ސީ.އޯ)ގެ ބައްދަލުވުމުގެ ތެރެއިން ނޫސްވެރިންނާ ބައްދަލު ކުރައްވާ ވާހަކަފުޅު ދައްކަވަމުންނެވެ.
ޕުޓިން ވިދާޅުވީ، ރަޝިޔާއިން ހިފާފައިވާ ސަރަޙައްދުތަކުގައި ޔޫކްރެއިން ސިފައިން ވަރުގަދަ ކެމްޕޭނެއް ހިންގަމުން ދިޔަ ނަމަވެސް، ރަޝިޔާ ސިފައިން ހިންގަމުންދާ އަސްކަރީ އޮޕަރޭޝަނަށް އެއްވެސް ބަދަލެއް ގެންނަން ނިންމަވާފައި ނުވާނެ ކަމުގައެވެ. އަދި، ހަނގުރާމައިގެ ލަނޑުދަނޑިތަކަށް ބަދަލެއް ގެންނަން ރާއްވަވާފައި ނުވާނެ ކަމުގައެވެ.
"ޑޮންބާސްގައި ރަޝިޔާ ސިފައިން ހިންގަމުންދާ އަސްކަރީ އޮޕަރޭޝަން ހުއްޓުމެއް ނެތީ ދަނީ ކުރިއަށް. ތަންކޮޅެއް ލަސް ދުވެއްޔެއްގައި ނަމަވެސް، އެ އޮޕަރޭޝަން ހުއްޓައިލުމުގެ އެއްވެސް ނިޔަތެއް ނެތް. ރަޝިޔާ ސިފައިން ދަނީ ޔޫކްރެއިނުގެ އިތުރު ސަރަޙައްދުތައް ހިފަމުން. އަވަސް އަރުވައިލައިގެންނެއް ނޫން މިއުޅެނީ" ޕުޓިން ވިދާޅުވިއެވެ.
ޕުޓިން ވިދާޅުވީ، ރަޝިޔާ ސިފައިންގެ ފުރިހަމަ ބާރާއި އެކު އަދި ޔޫކްރެއިނަށް އަރާފައި ނުވާ ކަމުގައެވެ. އަދި، ޔޫކްރެއިނުގައި ހަރަކާތްތެރިވާ ގިނަ ސިފައިންނަކީ ކުލީ ސިފައިން ކަމަށް އޭނާ ވިދާޅުވިއެވެ. އަދި، ރަޝިޔާގެ އަމާޒަކީ ޑޮންބާސް ސަރަޙައްދު އެއްކޮށް ހިފުން ކަމުގައި ވެސް އޭނާ ވިދާޅުވިއެވެ.
މީގެ އިތުރުން، ރަޝިޔާ ސިފައިންގެ އަމާޒުތަކާ ދެކޮޅަށް ޔޫކްރެއިނު ސިފައިން ޓެރެރިސްޓް ހަމަލާތައް ދެމުންދާ ކަމުގައި ވެސް އޭނާ ތުހުމަތު ކުރެއްވިއެވެ. އަދި، ރަޝިޔާއިން ބޭނުން ކުރާ ޢުމްރާނީ ވަސީލަތްތަކަށް އަމާޒުކޮށް ޔޫކްރެއިނު ސިފައިން ހަމަލާ ދެމުންދާ ކަމުގައި ވެސް އޭނާ ވިދާޅުވިއެވެ.
"ރަޝިޔާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އިތުރު ކުރާނަމަ، އަދި ވަރުގަދަ ކުރާ ނަމަ، ރަޝިޔާއިން ޔޫކްރެއިނުގައި ހިންގަމުންދާ އަސްކަރީ އޮޕަރޭޝަން ވެސް އިތުރަށް ވަރުގަދަ ކުރަން ޖެހިދާނެ،" އެމެރިކާއާއި ވިލާތުގެ އިއްތިހާދު (އީ.ޔޫ.)އިން ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް އިޝާރާތް ކުރައްވައި ވާހަކަފުޅު ދައްކަވަމުން ޕުޓިން ވިދާޅުވިއެވެ.
ރަޝިޔާ ސިފައިން ޔޫކްރެއިނަށް އަރާފައި ވަނީ ފެބުރުވަރީ މަހުގެ 24 ވަނަ ދުވަހުއެވެ. އަދި، ޔޫކްރެއިނުގެ އިރުމައްޗާއި ދެކުނުގެ ބައެއް ސަރަޙައްދުތައް ވަނީ ހިފާފައެވެ. ނަމަވެސް، އެ ސަރަޙައްދުތައް މިނިވަން ކުރުމަށް ޔޫކްރެއިނުން ވަނީ ސެޕްޓެންބަރު މަހުގެ ކުރީކޮޅު އަސްކަރީ ކެމްޕޭނެއް ފަށާފައެވެ. އަދި، މިހާތަނަށް 9,000 ކިލޯމީޓަރުގެ ސަރަޙައްދެއް މިނިވަން ކޮށްފައިވާ ކަމުގައި ޔޫކްރެއިނުން ބުނެއެވެ.