ރަޝިޔާ ސިފައިން ތިބިހާ ދުވަހަކު ޔޫކްރެއިނުގެ އިރުދެކުނުގައި ހުންނަ ޒަޕޮރީޜިޔާ ނިއުކްލިޔަރ ހަކަތަ އުފައްދާ ޕްލާންޓަށް ރައްކަލެއް ނެތް ކަމަށާއި، އެ ތަނުގެ ރައްކާތެރިކަން ކަށަވަރު ކުރެވޭނީ ރަޝިޔާ ސިފައިން އެ ތަނުން ފޭބުމުން ކަމުގައި ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވިދާޅުވެއްޖެއެވެ. ޒަޕޮރީޜިޔާ ޕްލާންޓަކީ ވިލާތުގެ ޤައުމެއްގައި ހުންނަ ނިއުކްލިޔަރަ ހަކަތަ އުފައްދާ އެންމެ ބޮޑު ޕްލާންޓެވެ.
ރަޝިޔާ ސިފައިން ޒަޕޮރީޜިޔާއިން ފޭބުމަށް ގޮވައިލާ އެޓޮމިކް ހަކަތައާ ބެހޭ ބައިނަލްއަޤްވާމީ އިދާރާ (އައި.އޭ.އީ.އޭ)އިން ވެސް ވަނީ ޤަރާރެއް ފާސް ކޮށްފައެވެ. މިއީ، ޒަޕޮރީޜިޔާގެ މައްސަލައިގައި 35 މެންބަރުންގެ މައްޗަށް އެކުލެވިގެންވާ އައި.އޭ.އީ.އޭ.ގެ ބޯޑުން ފާސްކޮށްފައިވާ ދެވަނަ ޤަރާރެވެ. ދެ ޤަރާރުގައި ވެސް ގޮވައިލާފައި ވަނީ އެ ތަނުން ރަޝިޔާ ސިފައިން ފޭބުމަށެވެ.
"ރަޝިޔާއިން ޒަޕޮރީޜިޔާ ޕްލާންޓުގައި، އަދި އެ ތަނާ ދެކޮޅަށް، އަދި ޔޫކްރެއިނުގައިވާ އެއްވެސް ނިއުކްލިޔަރ ޕްލާންޓަކާ ދެކޮޅަށް، ހިންގަމުންދާ ހުރިހާ ހަރަކާތްތަކެއް ވަގުތުން ހުއްޓައިލަން ޖެހޭ،" އައި.އޭ.އީ.އޭ.ގެ ބޯޑުގެ ޤަރާރުގައި ބުނެފައިވެއެވެ. މި ޤަރާރު ފާސްވީ 26 މެންބަރުންގެ ތާޢީދާ އެކުއެވެ. ދެ މެންބަރުން ވަނީ ޤަރާރާ ދެކޮޅަށް ވޯޓު ދީފައެވެ. އެއީ ރަޝިޔާއާއި ޗައިނާއެވެ.
ވަކި ފަރާތަކަށް ވޯޓު ދީފައި ނުވާ މެންބަރު ޤައުމުތަކަކީ މިޞްރު، ދެކުނު އެފްރިކާ، ސެނެގޯލް، ބުރުންޑީ، ވިއެޓްނާމް، އިންޑިޔާ އަދި ޕާކިސްތާނެވެ. "ޔޫކްރެއިނުގެ ނިއުކްލިޔަރ ޕްލާންޓުތައް ހިފާ، އެ ތަންތަނާ ދެކޮޅަށް ރަޝިޔާއިން ހިންގާ ހަރަކާތްތަކާ މެދު ހިތާމަކުރަން،" އައި.އޭ.އީ.އޭ.ގެ ޤަރާރުގައި ބުނެފައިވެއެވެ.
މި ކަމާ ގުޅޭ ގޮތުން ޒެލެންސްކީ ވިދާޅުވީ، ޒަޕޮރީޜިޔާގެ ސަލާމަތާއި ރައްކާތެރިކަން ކަށަވަރު ކުރެވޭނީ ރަޝިޔާ ސިފައިން އެ ތަނުން ފޭބުމުން ކަމުގައެވެ. އަދި، އެ ސަރަޙައްދަކީ ހަތިޔާރު ގެންގުޅުމާއި ހަމަލާދިނުން މަނާ ސަރަޙައްދެއްގައި ގޮތުގައި ކަނޑައެޅުނު ދުވަހަކުން ކަމުގައެވެ.
"އައި.އޭ.އީ.އޭ.އިން ނިންމާފައި މި ވަނީ މުހިންމު ނިންމުމެއް. އެ ޤަރާރު ތަޞްދީޤު ކުރެވޭނީ ރަޝިޔާ ސިފައިން އެ ތަނުން ފައިބައިގެން. މިއީ، ހަމައެކަނި އެ ތަނުގެ ރައްކާތެރިކަމަށް ކުރަން ޖެހޭ ކަމެއް ނޫން. މިއީ މުޅި ދުނިޔޭގެ ރައްކާތެރިކަމަށް މިހާރުންމިހާރަށް އަޅަން ޖެހޭ ފިޔަވަޅެއް،" ޒެލެންސްކީ ވިދާޅުވިއެވެ.
"ހަނގުރާމައިގެ މިހާތަނަށް ޔޫކްރެއިނުގެ އެކި ސަރަޙައްދުތަކާ ދެކޮޅަށް ރަޝިޔާ ސިފައިން ވަނީ 3,800 އަށްވުރެ ގިނަ މިސައިލް ހަމަލާ ދީފައި. މި ފަދަ ހަމަލާތަކުގެ ސަބަބުން ރަޝިޔާ އެކަހެރިވެ ބާކީވުން އިތުރުވުން ނޫން ކަމެއް ނުވާނެ."
އައި.އޭ.އީ.އޭ.ގެ ޤަރާރަކީ ރަޝިޔާއާ ދެކޮޅަށް ނެރެފައިވާ ޤަރާރެއް ކަމުގައި އެ ޤައުމުން ބުނެއެވެ. އަދި، ޕްލާންޓަށް ދެމުންދާ ހަމަލާތަކުގެ އެއްވެސް ވާހަކައެއް ޤަރާރުގައި ނެތް ކަމުގައި ރަޝިޔާއިން ބުނެއެވެ. "މި ކަމުން ވެސް ދޭހަވަނީ، ޒަޕޮރީޜިޔާ ޕްލާންޓަށް ހަމަލާދެނީ ޔޫކްރެއިނުން ކަން. އަދި، ހުޅަނގުން އެ ކަން ފޮރުވަން މަސައްކަތް ކުރަމުންދާ ކަން،" ރަޝިޔާގެ ބަޔާނެއްގައި ބުނެފައިވެއެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ ފެބުރުވަރީ މަހުގެ 24 ވަނަ ދުވަހުއެވެ. އަދި، ހަނގުރާމައިގެ ކުރީކޮޅު ރަޝިޔާ ސިފައިން ވަނީ ޝެރްނޮބީލްގައި ހުންނަ ކުރީގެ ނިއުކްލިޔަރ ހަކަތަ އުފައްދާ ޕްލާންޓު ވެސް ހިފާފައެވެ. އެއީ، ދުނިޔޭގައި މިހާތަނަށް ހިނގި ރޭޑިއޭޝަން ލީކުވުމުގެ އެންމެ ނުރައްކާތެރި ހާދިސާ ހިނގި ތަނެވެ. ނަމަވެސް، ފަހުން ރަޝިޔާއިން ސިފައިން ވަނީ އެ ތަނުން ފައިބާފައެވެ.