އިޓަލީ ވިލާތުގެ މާރްކޭ ސަރަޙައްދަށް ބޯކޮށް ވާރޭވެހި ފެންބޮޑުވުމާ ގުޅިގެން ހިނގި ހާދިސާތަކެއްގައި 10 މީހުން މަރުވެއްޖެއެވެ. މި ހާދިސާގައި އެންމެ ބޮޑަށް ގެއްލުން ލިބިފައި ވަނީ މާރްކޭ ސަރަޙައްދުގެ ރަށެއް ކަމުގައިވާ ކަންޓިއާނޯއަށެވެ.
އެ ސަރަޙައްދަށް ދެ ތިން ގަޑިއިރުގެ ތެރޭގައި 400 މިލިމީޓަރުގެ ވާރޭ ވެހިފައިވާ ކަމުގައި އިޓަލީ ވިލާތުގެ މޫސުމާ ބެހޭ އިދާރާއިން ހާމަކުރެއެވެ. އެއީ، އެ ސަރަޙައްދަށް އަހަރެއްގެ މައްޗަށް ވާރޭ ވެހޭ އެވުރެޖުގެ ތިންބައިކުޅަ އެއްބަޔާ ގާތް ކުރާ އަދަދެކެވެ.
ބޯކޮށް ވާރޭވެހުމުގެ ސަބަބުން މާރްކޭގެ ގިނަ ސަރަޙައްދުތަކެއްގައި ފެންބޮޑުވެ، ކިސަޑު ހެދިފައި ވާއިރު، އައްސޭރިފަށުގެ ރަށެއް ކަމުގައިވާ ސެނެގައްލިޔާގައި ދިރިއުޅޭ ގިނަ އަދަދެއްގެ ބަޔަކު ރައްކާތެރި ހިސާބުތަކަށް ބަދަލުކުރަން ޖެހުނެވެ. ފެންބޮޑުވުމުން ރައްކާތެރިކަން ހޯދުމަށް ގިނަ އަދަދެއްގެ ބަޔަކު ވަނީ އެ މީހުންގެ ގެދޮރުތަކުގެ ފުރާޅުތައް މައްޗަށް އަރާފައެވެ. މީހުން ސަލާމަތް ކުރުމަށް ބޭނުންކޮށްފައި ވަނީ ޑިންގީ ފަދަ އުޅަނދުފަހަރެވެ.
ކުއްލިއަކަށް އެހާ ބޯކޮށް ވާރޭވެހި، ފެންބޮޑުވުމަށް މެދުވެރިވެފައި ވަނީ މޫސުމަށް އަންނަމުންދާ ނޭދެވޭ ބަދަލުތަކުގެ ސަބަބުން ކަމުގައި މޫސުމާ ބެހޭ ދާއިރާގެ މާހިރުން ބުނެއެވެ.
"މިހާރު މިއީ ބަދަލު ކުރެވޭނެ ކަމެއް ނޫން. ކުރިއަށް އޮތް ތަނުގައި ވެސް މި ގޮތަށް ކުއްލިކުއްލިއަށް މޫސުން ގޯސްވެ، މިފަދަ ހާދިސާތައް ހިނގާނެ ކަމަށް ލަފާ ކުރެވޭ،" އިޓަލިއަން ސޮސައިޓީ އޮފް އެންވަޔަރަމަންޓަލް ޖިއޮލޮޖީގެ މާހިރެއް ކަމުގައިވާ ޕައޮލާ ޕިނޯ ޑިއަސްޓޯރޭ ވިދާޅުވިއެވެ.