ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ހަތް ބައި އިލެކްޝަނެއް އަންނަ މަހަށް ތާވަލްކޮށްފިއެވެ.
އިލެކްޝަންސް ކޮމިޝަނުން އާންމުކޮށްފައިވާ ތަފްސީލްތަކުގައިވާގޮތުން އަންނަ މަހުގެ 1 ވަނަ ދުވަހާއި 22 ވަނަ ދުވަހު ބައި އިލެކްޝަންތައް ބާއްވަން ވަނީ ތާވަލްކޮށްފައެވެ. އެގޮތުން އެންމެ ފުރަތަމަ ބާއްވަން ތާވަލްކޮށްފައި ވަނީ ށ. މާއުނގޫދޫ ކައުންސިލް މެމްބަރަކު ހޮވުމަށް ބާއްވާ ބައި އިލެކްޝަނެވެ. އެ އިންތިޚާބުގައި ދެ ކެންޑިޑޭޓުން ވާދަކުރާއިރު ހޮވަނީ އެންމެ މެމްބަރެކެވެ.
މީގެ އިތުރަށް ހަމަ އެ ދުވަހު ރ. ރަސްމާދޫ އާއި ތ. ގުރައިދޫ އަދި ލ. ދަނބިދޫގެ އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ ބައި އިލެކްޝަން ވެސް ވަނީ ތާވަލްކޮށްފައެވެ. މި ހުރިހާ އިންތިޚާބެއްގެ ވެސް ވޯޓުލުން ކުރިއަށްގެންދަން ހަމަޖައްސާފައި ވަނީ އެ ދުވަހުގެ ހެނދުނު 8ން ފެށިގެން ހަވީރު 4ގެ ނިޔަލަށެވެ. ކޮންމެ ކޮމިޓީއަކަށް ވެސް އިންތިޚާބުކުރަނީ އެންމެ މެމްބަރެކެވެ. އޭގެ ތެރެއިން ލ. ދަނބިދޫ ކޮމިޓީއަށް 4 ކެންޑިޑޭޓުން ކުރިމަތިލާފައިވާއިރު، އެހެން ހުރިހާ ކޮމިޓީއަކަށް ކުރިމަތިލީ ދެ ކެންޑިޑޭޓުންނެވެ.
އަންނަ މަހުގެ 22 ވަނަ ދުވަހު ބާއްވަން ތާވަލްކޮށްފައި ވަނީ ތިން ރަށެއްގެ އަންހެނުންގެ ތަރައްގީއަށް މަސައްކތްކުރާ ކޮމިޓީތަކުގެ ބައި އިލެކްޝަނެވެ. އެއީ ވ. ތިނަދޫއާއި އެ އަތޮޅު ފެލިދޫއާއި، ހއ. ހޯރަފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބެވެ. މީގެ ތެރެއިން ތިނަދޫ ކޮމިޓީއަށް 5 މެމްބަރުން އައްޔަންކުރަން ޖެހޭއިރު އެހެން ރަށްތަކަށް ހޮވަން ޖެހެނީ އެންމެ މެމްބަރެކެވެ. މި އިންތިޚާބަށް ކުރިމަތިލުމުގެ ފުރުސަތު މި މަަހުގެ 22 ވަނަ ދުވަހުގެ ނިއަލަށްވަނީ ހުޅުވާލާފައެވެ.
އަންހެނުންގެ ކޮމެޓީތަކުގެ އިންތިޚާބުތައް ކައިރިކަރީގައި ބާއްވަން ޖެހުމަކީ އިލެކްޝަންސް ކޮމިޝަނުންވެސް ކަންބޮޑުވުން ފާޅުކޮށްފައިވާ މައްސަލައެކެވެ. އެގޮތުން މިހާރު މި އިންތިޚާބުތައް އަވަސް އަވަހަށް ބާއްވަން ޖެހޭތީ ކޮމިޝަނުގެ ބަޖެޓަށް ބާރުބޮޑުވާކަމުގެ ޝަކުވާ ކޮމިޝަނުން ވަނީ ކޮށްފައެވެ. އެކަމަށް ރިއާޔަތްކޮށް ކޮމެޓީތަކުގެ ކޯރަމް ނުގެއްލޭ ކަމުގައިވާނާމަ، ބައި އިލެކްޝަންތައް ކޮންމެ އަހަރަކުވެސް އެއްފަހަރާ ވަކި ތާރީޚެއްގައި ބޭއްވުމަށް ޤާނޫނަށް އިސްލާހެއް މިހާރު ވަނީ ހުށަހަޅާފައެވެ.