ގއ. މާމެންދޫގައި މިދިޔަ އަހަރު ހިންގި މާރާމާރީއެއްގައި ކުޑަކުއްޖަކު މަރާލި މައްސަލާގައި އެކަކުގެ މައްޗަށް ކުށް ސާބިތުވެއްޖެއެވެ.
މިދިޔަ އަހަރުގެ ފެބްރުއަރީ މަހުގެ 8 ވަނަ ދުވަހު އެ ރަށުގައި ހިނގި ސިލްސިލާ ދެ މާރާމާރީގައި މަރުވީ އެރަށު ލީލީ އޮފް ދި ވެލީ އުމުރުން 17 އަހަރުގެ އަހުމަދު އުދައްޔުއެވެ.
މި މައްސަލާގައި ޖުމްލަ 4 މީހެއްގެ މައްޗަށް ވަނީ ދައުވާކޮށްފައެވެ. އޭގެ ތެރެއިން އެކަކަކީ ކުޑަކުއްޖެކެވެ. ޕީޖީ އޮފީހުން ބުނިގޮތުގައި މިހާތަނަށް ކުށް ސާބިތުވެފައި ވަނީ އެ ކުއްޖާގެ މައްޗަށެވެ. އެ ކުޑަކުއްޖާއާ ގުޅުންހުރި އިތުރު އެއްވެސް ތަފްސީލެއް ހާމައެއް ނުކުރެއެވެ.
އެ ކުއްޖާގެ މައްޗަށް އުފުލާފައި ވަނީ ޓުނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއާއި، މީހަކަށް ނުރައްކާތެރި ހާނިއްކައެއް ވާގޮތަށް ތޫނު އެއްޗެއް ބޭނުންކޮށްގެން މާރާމާރީ ހިންގި ކަމުގެ ދައުވާއެވެ. މި ދެ ކުށް ވެސް އޭނާގެ މައްޗަށް ސާބިތުވެ ކުޑަކުދިންގެ އަދުލުގެ ގާނޫނުގައި ބަޔާންކޮށްފައިވާ އިޖުރާއަތްތަކާ އެއްގޮތަށް ކުރިއަށްގެންދާނެ ކަމަށް އެ އޮފީހުން ވަނީ ބުނެފައެވެ.
އުދައްޔުގެ މަރާއި ގުޅިގެން ދައުލަތުން ދައުވާކުރާ ތިން މީހުންނަކީ ގއ މާމެންދޫ ބިލެތްމާގޭ ޝަރަފް ރަޝީދާއި އެރަށު ގުލްފާމްގޭ މުހައްމަދު މާޒިނާއި ހަމަ އެރަށު ރިހިފަރުދާގޭ އަޙްމަދު ޝަމީމެވެ. މި ތިން މީހުންގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއާއި ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ. މި ތިން މީހުންގެ މައްޗަށް އުފުލާފައިވާ ދައުވާގެ ޝަރީއަތް މިހާރު އޮތީ ހެކިބަސް ނެގުމާއި ހަމައިގައެވެ.
މިމާރާމާރީ ހިންގާފައިވަނީ މިދިޔަ އަހަރުގެ ފެބްރުއަރީ މަހުގެ 8 ވަނަ ދުވަހުގެ ރޭ 10:10 ހާއިރުގައެވެ.
މިމަރާމާރީގައި ތޫނު އެއްޗަކުން ހަމަލާދީ ޒަޚަމްކޮށްލި ދެ މީހަކަށް ގއ.އަތޮޅު ހޮސްޕިޓަލުގައިވެސް ވަނީ ފަރުވާދީފައެވެ. އެއީ އުދައްޔުއާއި އޭނާގެ ބޭބެއެވެ. އުދައްޔުގެ ބުރަކަށީގެ އެކި ތަންތަނަށް ވަޅިން ހަމަލާދީފައިވާކަމަށާއި 4 ނުވަތަ 5 އިންޗި ފުނަށް ވަޅި ހަރައި ޒަޚަމްކޮށްލާފައިވާ ނިޝާންތައްވެސް ހުރިކަމަށް ގއ.އަތޮޅު ހޮސްޕިޓަލުން އޭރު ބުނެފައިވެއެވެ. އުދައްޔު މަރުވީ ވެސް ލިބުނު އަނިޔާތަކަށް ފަރުވާހޯދަމުން ދަނިކޮށެވެ.