ނޫސްވެރިންގެ ކަންބޮޑުވުންތައް ޙައްލުކުރުމަށް ހެއްކާބެހޭ ޤާނޫނު އަލުން އިޞްލާހުކުރަން ރައީސް ނިންމަވައިފި

ހެއްކާބެހޭ ޤާނޫނުގައި މަސްދަރު ހާމަކުރަންޖެހޭ ގޮތަށް އޮތް އޮތުމާމެދު މީޑިއާތަކުގެ ކަންބޮޑުވުން އަހާ، ޤާނޫނަށް އިސްލާހު ހުށައެޅުމަށް ނިންމަވާފައިވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ރާއްޖޭގެ ފުރަތަމަ ބްރޮޑްކާސްޓް އެވޯޑް ދިނުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

ރައީސް ސާލިހު ވިދާޅުވީ ރާއްޖެއަށް ރިޔާސީ ނިޒާމެއް އައުމުގެ ކުރީގައި، ނޫސްވެރިކަމާއި ޚިޔާލުފާޅުކުރުމުގެ މިނިވަންކަން އޮތީ މުޅިންހެން ހިފެހެއްޓިފައިކަމަށެވެ. އަދި 2008ވަނަ އަހަރަށް ފަހުގައި ނޫސްވެރިކަމުގެ މިނިވަންކަން ހޯދައިދެވުމާއި އެކީގަވެސް ދާއިރާއަށް ގިނަ ގޮންޖެހުންތައް ކުރިމަތިވަމުން އައިކަމަށެވެ. ނަމަވެސް މި ސަރުކާރު ޙަވާލުވެ، ނޫސްވެރިންނަށް ޤާނޫނީގޮތުން ފަހި މާޙައުލެއް ޤާއިމުކޮށްދިނުމަށް މުހިންމު ބަދަލުތަކެއް ގެނެސްދީފައިވާކަމަށް ރައީސް ވިދާޅުވިއެވެ.

ރައީސުލްްޖުމްހޫރިއްޔާގެ ވާހަކަފުޅުގައި ނޫސްވެރިކަމަށް ޤާނޫނީ ހުރަހެއްގެ ގޮތުގައި ކުރިން، "އަބުރު ރައްކާތެރިކުރުމުގެ ނަމުގައި" އޮތް ޤާނޫނު މި ސަރުކާރުން އުވާލައްވައި، ނޫސްވެރިންނަށް މިކަމުގައި އޮތް ކަނބޮޑުވުންވެސް ޙައްލުކޮށްދެއްވާފައިވާކަން ފާހަގަކުރެއްވިއެވެ.

އެގޮތުން ރާއްޖޭގައި ޚިޔާލުފާޅުކުރުމުގެ މިނިވަންކަން ފުޅާ ދާއިރާއެއްގައި އޮތްނަމަވެސް ނޫސްވެރިން ހިފަހައްޓަންޖެހޭ އަޚްލާޤީ މިންގަނޑުގެ ތެރޭގައި ޒިންމާދާރުކަމާއެކު ނޫސްވެރިކަން ކުރުމުގައި ކުރިޔަށްދިއުމަށްވެސް އެމަނިކުފާނު އެދިވަޑައިގެންނެވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި ރާއްޖޭގެ ނޫސްވެރިންނަށް ބޭނުންވާ ހުނަރާ، ޤާބިލްކަމާ، ތަމްރީނު، ލިއްބައިދިނުމަށް ކުރިޔަށްވުރެ ބޮޑަށް، މިހާރު މަސައްކަތް ކުރަންޖެހޭކަން ފާހަގަކުރައްވައި އެކަމުގައި ސަރުކާރާ އަދި ވަކިން ޚާއްޞަކޮށް ބްރޯޑްކާސްޓިންގ ކޮމިޝަނާ، މީޑިއާ ކައުންސިލްގެ ދައުރުގެ މުހިއްމުކަން ފާހަގަކުރެއްވިއެވެ. އަދި މިހާރު ނޫސްވެރިންނާ ދާއިރާގެ އެންމެ ބޮޑު ކަންބޮޑުވުމެއް އޮތީ ހެއްކާބެހޭ ޤާނޫނުގެ 130 ވަނަ މާއްދާއަށްކަމަށް ރައީސް ވިދާޅުވިއެވެ. މި ޤަނޫނުން ނޫސްވެރިކަމަށް ހުރަސްއެޅޭގޮތަށް އޮތް އޮތުމަށްވެސް ބަދަލު ގެންނެވުމަށް ނިންމާފައިވާކަމަށް ރައީސް ވަނީ ވިދާޅުވެފައެވެ.

"ހެއްކާބެހޭ ޤާނޫނުގެ 130ވަނަ މާއްދާއަށް މިޑިއާގެ ކަންބޮޑުވުން އެބަހުރި. މިކަމާ ގުޅިގެން ކަމާބެހޭ ފަރާތްތަކާ މަޝްވަރާކޮށްފިން. މިކަމަށް ޙައްލުހޯދުމަށް ޤާނޫނަށް އިސްލާހު ހުށައެޅުމަށް ނިންމައިގެން މިހުރީ." ރައީސް ވިދާޅުވިއެވެ.

މި ޤާނޫނު ބުނާގޮތުން، ނޫސްތަކުގައި މާސްދަތު ހާމަނުކޮށް ލިޔާ ޚަބަރުތަކުގައި، ހިމެނޭ މަސްދަތު ހާމަކުރުމަށްވެސް މަޖުބޫރުވެއެވެ. މިކަމާ ހުރިހާ މީދިއާތަކުން އަންނަނީ ދެކޮޅުހަދާ ކަންބޮޑުވުން ފާހަގަކުރަމުންނެވެ.

ރައީސް ވަނީ ނޫސްވެރިކަން ކުރުމުގައި ނޫސްވެރިކަމުގެ މިންގަނޑުތަކަށް އިޙުތިރާމްކޮށް، އެ މިންގަނޑުން މަޢުލޫމާތު ގެނެސްދިނުމަށް އެދިފައެވެ. އަދި ޚަބަރެއް ފެތުރުމުގެ ކުރިން، އެކަމުން ނިކުމެދާނެ ނަތީޖާއާމެދު ވިސްނާފައި މެނުވީ، އެކަން ނުކުރުމަށް އެދިލެއްވިއެވެ. މިއީ މުޅި މުޖުތަމަޢުގެ މަސްލަޙަތު ހިމެނޭ ދާއިރާއަކަސްވުމަކީ، ކޮންމެ ނުސްވެރިއއެއްވެސް ޒިންމާދާރުކަމާއެކު މަސައްކަތް ބައްތަންކުރަންޖެހޭ މައިގަނޑު ސަބަބުކަމަށް ވިދާޅުވިއެވެ.

ބްރޮޑްކާސްޓް އެވޯޑް ދިނުމަށް ބޭއްވި ޙަފްލާގައި ޕީއެސްއެމްގެ ޗެނަލްތަކަށް ވަނީ ގިނަ އެވޯޑްތަކެއް ލިބިފައެވެ. އަދި ރާއްޖޭގައި ފުރަތަމަ ފަހަރަށް ބޭއްވި ބްރޯޑްކާސްޓް އެވޯޑްގެ އެންމެ މޮޅު އެންކަރަކަށް ހޮވިފައިވަނީވެސް ޕީއެސްއެމް ނިއުސްގެ އެޑިޓަރ/ޖާރނަލިސްޓް އަބްދު ﷲ މުއާޒުއެވެ.