ރާއްޖޭގައި ކުރިއަށްގެންދާ އެންމެ ބޮޑު ސަރވޭ، ބޯހިމެނުމަށް ބޭނުންވާ ލިސްޓް އެކުލަވާލުމުގެ މަސައްކަތް މާދަމާ ފަށާނެއެވެ. ބޯހިމެނުން ކުރިއަށްދާއިރު، ސަރވޭއަށް ބޭނުންވާ މަޢުލޫމާތު ދިނުމުގައި ނެޝަނަލް ބިއުރޯ އޮފް ސްޓެޓިސްޓިކްސްއަށް ފުރިހަމަ އެއްބާރުލުން ދިނުމަށް ބިއުރޯއިން އަންނަނީ އެދެމުންނެވެ.
ބޯހިމެނުމަކީ ކޮންމެ ދިހަ އަހަރަކުން އެއްއަހަރު ކުރިއަށް ގެންދަން ޖެހޭ މަސައްކަތެކެވެ. މިއީ ރާއްޖޭގެ އާބާދީއާއި ދިރިއުޅުމުގެ ޙާލަތު ދެނެގަތުމަށް ކުރިއަށްގެންދާ އެންމެ ބޮޑު ސަރވޭއެވެ. މިފަހަރުގެ ސަރވޭގައި ރާއްޖޭގެ އިޤްތިޞާދީ ޙާލަތު ދެނެގަތުމަށް މަޢުލޫމާތު އެއްކުރުންވެސް ކުރިއަށްދާނެއެވެ.
ސަރވޭ ފަށާނީ މިމަހުގެ 17 ވަނަ ދުވަހުއެވެ. ނަމަވެސް އޭގެ ކުރިން، މަޢުލޫމާތު ނަގާ ތަންތަނުގެ ލިސްޓް އެކުލަވާލުމުގެ މަސައްކަތް އަންގާރަ އަދި ބުދަ ދުވަހު ކުރިއަށްގެންދާނެއެވެ. މި މަސައްކަތަށް ޓީމުން ނިކުންނާނީ، ހެނދުނު 09:00އިން އިރުއޮއްސި 18:00އަށެވެ.
މި ޓީމްތަކުން ގޭގެއާއި މަސައްކަތް ހިންގާ ތަންތަނުގެ ލިސްޓް އެކުލަވާލާނެއެވެ. މި ޓީމުން ގޭގެއާއި މަސައްކަތްތައް ހިންގާ ތަންތަނަށް ދާއިރު، ލިސްޓް އެކުލަވާލުމުގައި އާއްމުންގެ ފުރިހަމަ އެއްބާރުލުމާއި އެހީތެރިކަމަށް ސްޓެޓްސް ބިއުރޯއިން އަންނަނީ އެދެމުންނެވެ.
ސްޓެޓްސް ބިއުރޯއިން ވަނީ ލިސްޓް އެކުލަވާލުމަށް ޓީމްތަކުން ދާއިރު އެކަމަށް ފަސޭހަކުރުމުގެ ގޮތުން، ގޭގެއާއި އަދި މަސައްކަތް ހިނގާ ތަންތަނަކީ ކޮބައިކަން އެނގޭގޮތަށް ނަން ޖަހާފައި ނުވަތަ ނަން ބޯޑު ހަރުކުރުމަށް އެދިފައެވެ. އަދި ބައިބަޔަށް ހުންނަ ތަންތަނުގައި، އެޕަރޓްމަންޓް ނަންބަރު އިނގޭނެހެން ބެހެއްޓުމަށްވަނީ އެދިފައެވެ. އަތޮޅުތަކުގެ ރަށްރަށުގައިވެސް މިގޮތަށް ޢަމަލުކުރުމަށް ސްޓެޓްސް ބިއުރޯއިން އަންގައެވެ.
ބޯހިމެނުމަށް އެމީގެއްގެ މަޢުލޫމާތު ނަގާނީ ސެޕްޓެމްބަރު 12ވަނަ ދުވަހުގެ ރޭ 12:00އާއި ހަމައަށް، އެމީހަކު ނިދައި ދިރިއުޅުނު ތާކުންނެވެ. އޭގެ ފަހުން އެހެން ތަނަކަށް ފުރާނަމަ ނުވަތަ އެހެން ތާކަށް ބަދަލުވާނަމަ، މިބުނި މުއްދަތުގައި ދިރިއުޅުނު ތަނަކުން މަޢުލޫމާތު ލިބޭނެ ގޮތް ހަމަޖެއްސުމަށް ސްޓެޓްސް ބިއުރޯއިންވަނީ އެދިފައެވެ.
މި މަސައްކަތުގައި އެހީވުމަށް ތަޅުލާފައި ހުންނަ އިމާރާތްތަކަށް ވަނުމަށް މަގު ފަހިކޮށްދިނުމާއި ގޭބިސީތަކާ މަސައްކަތް ހިންގާ ތަންތަނުގެ އިސް މީހުންނާ ބައްދަލުވާނެ ގޮތް ހަމަޖައްސައިދިނުމަށް ދަނީ އެދެމުންނެވެ.
ބޯހިމެނުމުގެ މަސައްކަތުގައި ރަށްރަށުގައި ދިރިއުޅޭ ދިވެހިންނާ ބިދޭސީންގެ އަދަދުތަކާއި، އާބާދީ އިތުރުވާ މިންވަރާ، ހިޖުރަކުރުން، އުމުރުފުރާތަކަށް އަންނަ ބަދަލު، މަސައްކަތުގެ އާބާދީ، ރަށްރަށުގެ އިޤްތިޞާދީ އަދި އިޖުތިމާއީ ޙާލަތު ދެނެގަންނާނެއެވެ.
ބޯހިމެނުމާ ގުޅުންހުރި މަސައްކަތްތައް ހޯމަ ދުވަހުން ފަށައިގެން، މިމަހުގެ 25 ވަނަ ދުވަހުގެ ނިޔަލަށް ކުރިއަށްދާނެއެވެ.