ކައުންސިލްތަކުން ވިޔަފާރިތައް ކުރަންވާނީ ރަށުގެ އިޤްތިސާދު ކުރިއަރުވާ އެހެން ވިޔަފާރިތަކަށް ފުރުސަތުތައް ފަހިވާނެ ގޮތަށް ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
އިކޮނޮމިކް މިނިސްޓްރީން ވަނީ ކައުންސިލްތަކަށް ވިޔަފާރި ކުރެވޭނެ ދާއިރާތައް ކަނޑައަޅައި "ކައުންސިލްތަކުން ލޯކަލް އޮތޯރިޓީ ކުންފުނި އުފެއްދުމާއި އަމިއްލަ ފަރާތްތަކާ އެކު ވިޔަފާރިކުރުމާ ބެހޭ ގަވާއިދު"އަށް އިސްލާހު ގެނެސް މިއަހަރުގެ މެއިމަހުގެ 18ގައި ގެޒެޓްކޮށްފައެވެ. މިއާއެކު ކައުންސިލްތަކަށްވަނީ ވިޔަފާރި ކުރުމަށް ކުންފުނިތައް އުފެއްދުމުގެ ފުރުސަތު ފަހިވެފައެވެ.
ވިޔަވަތި ރާއްޖެ ކޮންފަރެންސްގައި ކައުންސިލްތަކުން ވިޔަފާރިކުރުމާއި ގުޅޭގޮތުން އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވީ، ވިޔަފާރި ކުރުމުގެ ފުރުސަތުދީފައިވަނީ އެރަށެއްގެ ނުވަތަ އެ އަތޮޅެއްގެ އިޤްތިސާދުތައް ކުރިއެރުވުމަށް މަގުފަހިކޮށްދިނުން ކަމަށެވެ.
" ކައުންސިލްތަކުން ވިޔަފާރިކުރަން ކުންފުނި ހެދުމުގެ ގަވާއިދުގެ ދަށުން، މިލިބޭ ހައްޤުގެ މާނައަކީ، ބޮޑު ވިޔަފާރި ކުންފުންޏެއް ގޮތަށް ކައުންސިލުން ވިޔަފާރި ކުރަން އުޅުމެއް ނޫން، އެންމެ މުއްސަދި ކައުންސިލަކަށްވާކަށް ފައިސާ ހޯދާކަށްވެސް ނޫން،" މިނިސްޓަރ ފައްޔާޒް ވިދާޅުވިއެވެ.
މިނިސްޓަރ ފައްޔާޒް ވިދާޅުވީ، ކައުންސިލްތަކުން ވިޔަފާރިތައް ކުރުމުގައި އެރަށެއްގައި އަމިއްލަ ފަރާތްތަކުން ކުރަމުންދާ ވިޔަފާރިތަކަށް ކައުންސިލްތަކުން ވަނުން ރަނގަޅު ނޫން ކަމަށެވެ. ކައުންސިލްތައް ވާންވީ މަގުދައްކާ ބަޔަކަށް ކަމަށް މިނިސްޓަރ ވިދާޅުވިއެވެ.
" އާއްމު ވިޔަފާރިތައް ރަނގަޅަށް ކުރަމުންދާ ވިޔަފާރިތަކަށް ކައުންސިލްތަކުން ނުވަންނާށޭ، ވިޔަފާރިތަކަށް މަގުފަހިކޮށްދީ، ވިޔަފާރިތަކަށް އެންކަރޭޖްކޮށްދިނުމަށް ފުރަތަމަ ފިޔަވަޅު އަޅާ ބަޔަކަށް ކައުންސިލްތަށް ވާންވީ،" މިނިސްޓަރ ފައްޔާޒް ވިދާޅުވިއެވެ.
މިނިސްޓަރ ވިދާޅުވީ، ހުރިހާ ވިޔަފާރިތަކެއްގެ ތެރެއަށް ކައުންސިލްތަކުން ވަނުމަކީ އަމިއްލަ ވިޔަފާރިތަކަށް އޭގެ ނޭދެވޭ އަސަރުތައް ކުރާނެ ކަމެއް ކަމަށެވެ.
އިކޮނޮމިކް މިނިސްޓްރީން ގެންދަވަނީ ކުދި ވިޔަފާރިތައް ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. އެގޮތުން މާލީ އެހީތެރިކަން ފޯރުކޮށްދީ، ފަންނީ އެހީތެރިކަން ފޯރުކޮށްދިނުމުގެ މަސައްކަތްތައް މިނިސްޓްރީގެ ދަށުން އުފައްދާފައިވާ ކުންފުނިތަކުންދަނީ ކުރަމުންނެވެ.