ޗާލްސް ފިލިޕް އާތަރ ޖޯޖް އުފަންވެ ވަޑައިގަތީ 1948ވަނަ އަހަރުގެ ނޮވެންބަރު މަހުގެ 14ވަނަ ދުވަހު އިނގިރޭސި ޝާހީ ގަނޑުވަރުގައެވެ. އެއީ ކާފާފުޅު ރަސްގެފާނު ޖޯޖް ހަވަނައިގެ ރަސްކަމުގެ 12 ވަނަ އަހަރެވެ.
މަންމާފުޅު ރާނީ އެލަޒަބަތު ދެވަނަ އިނގިރޭސި ތަޚުތައް އިސް ކުރެވުނީ 1952 ވަނަ އަހަރުއެވެ. އެއީ، ޗާލްސްގެ އުމުރުފުޅުން އެންމެ ތިން އަހަރުގައެވެ. އަދި، އެންމެ ތުއްޕުޅު ދުވަހުން ފެށިގެން ވެސް ރާނީ ގެންދެވީ ޗާލްސް ވެރިކަން ކުރައްވާނެ ދުވަހަކަށް އޭނާ ތައްޔާރު ކުރައްވަމުންނެވެ. މިއަދު ޗާލްސްއަކީ އިނގިރޭސި ވިލާތާއި ކޮމަންވެލްތުގެ ރަސްގެފާނެވެ. ލަޤަބަކީ ރަސްގެފާނު ޗާލްސް ތިންވަނައެވެ. ނަމަވެސް، ތަޚުތުގައި އިށީނދެ ވަޑައިގެންނެވުމުގެ ފުރުޞަތު ލިބިވަޑައިގަތީ 70 އަހަރުގެ ދިގު އިންތިޒާރަކަށް ފަހުއެވެ.
އޭނާގެ ކުރިން ރަސްކަން ކުރައްވާފައިވާ ރަސްކަލުންނާއި ރަނިންނާ ޚިލާފަށް ޗާލްސް ތަޢުލީމު ހާސިލު ކުރައްވާފައިވަނީ ޢާންމު މަދަރުސާތަކާއި ކޮލެޖުތަކުގައެވެ. އޭނާގެ ފުރަތަމަ ސްކޫލަކީ ލަންޑަންގެ ހުޅަނގުގައި ހުންނަ ހިލް ހައުސް ސްކޫލެވެ. އޭގެ ފަހުން ބަރކްޝަރގައި ހުންނަ ކީމް ސްކޫލުގެ އިތުރުން ސްކޮޓްލެންޑުގައި ހުންނަ ބޯޑިން ސްކޫލަކަށް ވެސް ވަޑައިގެންނެވިއެވެ. އެހެން ބޭބޭފުޅުންނާ ޚިލާފަށް މަތީ ތަޢުލީމު ހާސިލު ކުރެއްވުމަށް ވެސް ޗާލްސް ޚިޔާރު ކުރެއްވީ އަމިއްލަ ކޮލެޖެކެވެ. އާކިއޮލޮޖީއާއި އެންތްރޮޕޮލޮޖީގެ ދާއިރާއިން ކޭމްބްރިޖްގެ ޓްރިނިޓީ ކޮލެޖުގައި މަތީ ތަޢުލީމުގެ ހަރުފަތްތައް ގިރާ ކުރައްވަން ފެއްޓެވި ނަމަވެސް، އޭނާ ފަހުން ވަނީ ތާރީޚީ ޢިލްމުގެ ދާއިރާއިން ކުރިއަށް ވަޑައިގެންނެވުމަށް ނިންމަވާފައެވެ.
އިނގިރޭސި ވަލީއަޙުދުގެ ލަޤަބު ކަމުގައިވާ ޕްރިންސް އޮފް ވޭލްސްގެ ލަޤަބު ރަސްމީކޮށް ޗާލްސްއަށް އަރުވާފައިވަނީ 1969 ވަނަ އަހަރު އޭނާގެ ތަޢުލީމީ ހަޔާތް ފުރިހަމަ ކުރައްވަމުން ގެންދެވި ދުވަސްވަރެވެ. އޭގެ އެއް އަހަރު ފަހުން ޗާލްސް ދަސްވެނިމިވަޑައިގެންނެވިއެވެ. ޗާލްސްއަކީ އިނގިރޭސި ޝާހީ ޢާއިލާގެ މެންބަރުންގެ ތެރެއިން ޑިގްރީގެ ސަނަދު ހާސިލު ކުރެއްވި ފުރަތަމަ މެންބަރެވެ.
ޝާހީ ޢާއިލާގެ އެހެން މެންބަރުންނެކޭ އެއް ފަދައިން ޗާލްސް ވެސް ވަނީ އިނގިރޭސި ވިލާތުގެ އަސްކަރިއްޔާގައި ޚިދުމަތް ކުރައްވާފައެވެ. މި ގޮތުން 1971 ވަނަ އަހަރު ޗާލްސް ވަނީ އިނގިރޭސި އަސްކަރިއްޔާގެ ވައިގެ ސިފައިންގެ ޚިދުމަތާ ގުޅިވަޑައިގަންނަވާފައެވެ. އަދި، އެއަށްފަހު، އިނގިރޭސި ކަނޑުގެ ސިފައިންގެ ލަޝްކަރުގެ މަނަވަރެއް ކަމުގައިވާ އެޗް.އެމް.އެސް. ބްރޮނިންގްޓަންގައި ވެސް ޚިދުމަތް ކުރެއްވިއެވެ. އަސްކަރީ ޚިދުމަތުން ވަކިވެ ވަޑައިގަތީ 1976 ވަނަ އަހަރެވެ.
ލޭޑީ ޑަޔާނާ ސްޕެންސާއާ ވަލީއަޙުދު ޗާލްސް ކައިވެނި ބައްލަވައިގަތީ 1981 ވަނަ އަހަރުއެވެ. މުޅި ދުނިޔޭގެ ކުރިމަތީގައެވެ. ލައިވްކޮށް ޓީވީގެ ޒަރީއާއިން ދުރަށް ދެއްކި ކައިވެނީގެ ހަފުލާ 750 މިލިޔަނަށް ވުރެ ގިނަ މީހުން ބެލިއެވެ. ޗާލްސްއާއި ޑަޔާނާއަށް ދެ ބޭފުޅުން ލިބިވަޑައިގެންނެވިއެވެ. ވަލީއަޙުދު ވިލިޔަމް އުފަންވެ ވަޑައިގަތީ 1982 ވަނަ އަހަރެވެ. އަދި، އޭގެ ދެ އަހަރު ފަހުން 1984 ވަނަ އަހަރު ޕްރިންސް ހެރީ އުފަންވެ ވަޑައިގަތެވެ.
1996 ވަނަ އަހަރަކީ ދެ ބޭފުޅުންގެ ކައިވެނި ރޫޅި، ޗާލްސްއާ މެދު ދުނިޔޭގެ ނަޒަރު ބަދަލުވެގެން ދިޔަ އަހަރެކެވެ. އަދި، އޭގެ އެއް އަހަރު ފަހުން، 1997 ވަނަ އަހަރު ހިނގި ކާރު އެކްސިޑެންޓެއްގައި ޑަޔާނާ ވަނީ އަވަހާރަވެފައެވެ. މިހާރުގެ އަނބިކަނބަލުން، ކުއީން ކޮންސޯޓް ކެމިލާއާ ޗާލްސް ކައިވެނި ބައްލަވައިގަތީ 2005 ވަނަ އަހަރެވެ.
ޗާލްސްއަކީ މީޑިޔާއާ އެހާ ރަހުމަތްތެރި ބޭފުޅެއް ނޫނެވެ. "އަހުރެންނަކީ ވަރަށް ޕްރައިވެޓް މީހެއް. ރާމާމަކުނެއްހެން ޗަރުކޭސް ދެއްކުމަކީ އަހުރެންނަށް ވަރަށް ދަތި ކަމެއް،" 1994 ވަނަ އަހަރު ދެއްވި ބަސްދީގަތުމެއްގައި ޗާލްސް ވިދާޅުވެފައިވެއެވެ. ނަމަވެސް، ޗާލްސްއަކީ އިޖުތިމާޢީ ދާއިރާގައި މަސައްކަތް ކުރުމަށް ވަރަށް ބޮޑަށް ޝައުޤުވެރިވެ ވަޑައިގަންނަވާ ބޭފުޅެކެވެ.
ޗާލްސްއަކީ ވަރަށް ތަފާތު މިޒާޖެއްގެ ބޭފުޅެކެވެ. ދަނޑުވެރިކަމާއި، ޚާއްޞަކޮށް އޯގެނިކް ކާނާއަށް ލޯބި ކުރައްވާ ބޭފުޅެކެވެ. ގަސްގަހާގެއްސާއި ވާހަކަފުޅު ދައްކަވާ ކަމަށާއި، ގަސްގަހާގެއްސާއި ސަލާމް ކުރާ ކަމަށް ޗާލްސް ވިދާޅުވި ވިދާޅުވުމަކާ ގުޅިގެން މީޑިޔާއިން ވަނީ އޭނާއަށް ވަރަށް ބޮޑަށް މަލާމާތް ރައްދު ކޮށްފައެވެ. ނަމަވެސް، އޭނާއަކީ ތިމާވެށްޓާ ގުޅުންހުރި ކަންކަމަށް ވަރަށް ބޮޑަށް އިސްކަންދެއްވާ ބޭފުޅެކެވެ.
ޗާލްސްއަކީ ގިނަ ބަޔެއްގެ ލޯތްބާއި އިހުތިރާމު ވެސް ހޯއްދަވާފައިވާ ބޭފުޅެކެވެ. ގިނަ ބަޔަކު ޤަބޫލު ކުރާ ގޮތުގައި، އޭނާ ވެވަޑައިގަންނަވާނީ ކަންކަމާ މެދު ފުންކޮށް އަދި ސީރިޔަސްކޮށް ވިސްނަވާނެ ރަސްގެފާނަކަށެވެ. އަދި، ރައްޔިތުންގެ ކެކުޅުންތަކާ މެދު ވިސްނަވާނެ ރަސްކަލަކަށެވެ.
ޗާލްސްއަކީ ޚައިރާތަށް ވެސް ގިނަގުނަ ހޭދަތަކެއް ކުރައްވާ ބޭފުޅެކެވެ. 1970ގެ އަހަރުތަކުގެ ތެރޭގައި އިނގިރޭސި ވިލާތަށް ކުރިމަތިވި އިޤްތިޞާދީ ކާރިސާގައި ޗާލްސް ވަނީ އަސްކަރިއްޔާއިން އޭނާއަށް ލިބިވަޑައިގެންނެވި ހުރިހާ ފައިސާއެއް ޢާންމު ރައްޔިތުންގެ ހާލަތު ރަނގަޅު ކުރުމަށް ޚަރަދު ކުރައްވާފައެވެ. އަދި، އޭގެ ފަހުން އެ ޤައުމުގައި ހިނގައިދިޔަ މުޒާހަރާތަކާ ގުޅިގެންނާއި ވަޒީފާ ނެތުމުގެ ސަބަބުން އަސަރު ކޮށްފައިވާ ޒުވާނުންނަށް ވިޔަފާރީގެ ދާއިރާއިން ކުރިއަށް ދިޔުމަށް އޭނާ އެހީތެރިވެ ވަޑައިގެންނެވިއެވެ.
"އެ ދުވަހު ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށް ނުދިން ނަމަ، އަހުރެންހާ ބޮޑު ގަމާރެއް މި ދުނިޔެ މަތީގައި ނުހުންނާނެ. އެނގުނީ، އެހީތެރިކަން ފޯރުކޮށްދިނުމަށް އަހުރެންނަށް ކުރެވޭނެ ކޮންމެ ވެސް ކަމެއް އޮންނާނެ ކަން،" ޗާލްސް ވިދާޅުވެފައިވެއެވެ.
ޝާހީ ޢާއިލާގެ ޒިންމާތަކުގެ ބޭރުން ޗާލްސް އެންމެ ހިތްޕުޅާ ހަމަވާ އެއް ކަމަކީ އިންގްލެންޑުގެ ހައިގްރޯވްގައި ހުންނަ އޭނާގެ ގެކޮޅުގެ ބަގީޗާގައި ވަގުތު ހޭދަ ކުރެއްވުމެވެ. މީގެ އިތުރުން ހިންގެވުމާއި މަސްވެރި ކަމަށް ވެސް އޭނާ ލޯބި ކުރައްވައެވެ. އާޓްސްގެ ދާއިރާއަށް ވެސް ލޯބި ކުރައްވާ ޗާލްސް ވަނީ "ދަ އޯލްޑް މޭން އޮފް ލޮކްނެގަރ"ގެ ނަމުގައި ކުޑަކުދިންގެ ވާހަކަފޮތެއް ވެސް ލިޔުއްވާފައެވެ. ޗާލްސްއަކީ ގިނަ ވަގުތު މަސައްކަތުގައި ހޭދަ ކުރެއްވުމަށް ވެސް ލޯބި ކުރައްވާ، ބުރަކޮށް މަސައްކަތް ކުރައްވާ، ހިތްހެޔޮ ބޭފުޅެއްގެ ގޮތުގައި އެކުވެރިންނާއި ޝާހީ ގަނޑުވަރުގައި މަސައްކަތް ކުރާ މުވައްޒަފުން ސިފަ ކުރެއެވެ.
"ރަސްކަމުގެ ތަޚުތުގައި އިށީނދެވޭނެ ދުވަހަކާ މެދު އަހުރެން ނުވިސްނަން. އެއީ، އެ ދުވަހެއް އަންނާނީ އަހުރެންގެ މަންމަގެ މަރަށް ފަހު. އެއީ އެހާ އުފާވެރި ދުވަހަކަށް ނުވާނެ،" 2010 ވަނަ އަހަރު ދެއްވި ބަސްދީގަތުމެއްގައި ޗާލްސް ވިދާޅުވެފައިވެއެވެ.