އިނގިރޭސި ވިލާތުގެ ރާނީ އެލިޒަބަތު ދެވަނައިގެ ޞިއްޙީ ހާލުކޮޅު ދެރަވެއްޖެއެވެ. ރާނީ މިހާރު ހުންނެވީ ސްކޮޓްލެންޓުގައި ހުންނަ ބެލްމޯރަލް ގަނޑުވަރުގައެވެ. ޞިއްޙީ ހާލުކޮޅު ދެރަވުމާ ގުޅިގެން އިނގިރޭސި ވިލާތުގެ ވަލީއަޙުދު ޗާލްސްއާއި އަނބިކަނބަލުން ކެމިލާ ވެސް ވަނީ ރާނީގެ އަރިހަށް ވަޑައިގަންނަވާފައެވެ.
ޑޮކްޓަރުން މިހާރު ގެންދަނީ ރާނީގެ ހާލުކޮޅު ބަލަމުންނެވެ. "މިއަދު ހެނދުނު ހެދި ޓެސްޓުތަކަކަށް ފަހު ޑޮކްޓަރުން ވަނީ ރާނީގެ ޞިއްޙީ ހާލުކޮޅާ މެދު ކަންބޮޑުވުން ފާޅުކޮށްފައި. އަދި، ރާނީގެ ޞިއްޙީ ހާލުކޮޅު ސުޕަވައިޒް ކުރަމުން ގެންދިޔުމަށް ނިންމާފައި،" ރާނީގެ ހާލުކޮޅާ ގުޅޭ ގޮތުން ބަކިންގްހެމް ގަނޑުވަރުން ނެރުނު ބަޔާނެއްގައި ބުންޏެވެ.
ވަލީއަޙުދު ޗާލްސްގެ އިތުރުން ރާނީގެ މާމަ ދަރިކަލުން ޕްރިންސް ވިލިޔަމްއާއި މުނިމާމަ ދަރިކަލުން ވެސް މިހާރު ވަނީ ބެލްމޯރަލް ގަނޑުވަރަށް ވަޑައިގަންނަވާފައެވެ. ޕްރިންސް ހެރީއާއި އަނބިކަނބަލުން މެގަން ވެސް ވަނީ ސްކޮޓްލެންޑަށް ވަޑައިގަންނަވާނެ ކަމަށް ވިދާޅުވެފައެވެ.
2021ވަނަ އަހަރުގެ އޮކްޓޫބަރު މަހު ހޮސްޕިޓަލުގައި އެޑްމިކޮށްގެން ފަރުވާ ދިނުމަށް ފަހު ރާނީ ވަނީ އެ ކަމަނާގެ ރަސްމީ ބައްދަލުވުންތައް މަދު ކުރައްވާފައެވެ. އަދި، ސްކޮޓްލެންޑުގައި ހުންނަ ބެލްމޯރަލް ގަނޑުވަރަށް ވަޑައިގަންނަވާފައި ވަނީ އަރާމު ކުރެއްވުމަށެވެ.
ސެޕްޓެންބަރު 5ގައި އިނގިރޭސި ވިލާތުގެ އައު ބޮޑުވަޒީރު ލިޒް ޓްރަސްއަށް އެ މަޤާމުގެ މަސްއޫލިއްޔަތުތައް ރަސްމީ ގޮތުން ހަވާލު ކުރުމަށް ބޭއްވި ރަސްމިއްޔާތު ވެސް ބާއްވާފައި ވަނީ ބެލްމޯރަލް ގަނޑުވަރުގައެވެ. މި އަހަރަކީ، އުމުރުފުޅުން 96 އަހަރުގެ ރާނީ، އެ ކަމަނާގެ ރަނިކަމަށް 70 އަހަރު ފުރުން ފާހަގަކުރާ އަހަރެވެ.
ރާނީ އެލިޒަބަތު އިނގިރޭސި ވިލާތާއި ކޮމަންވެލްތުގެ ރަނިކަމާ ހަވާލުވެ ވަޑައިގަތީ 1952 ވަނަ އަހަރުގެ ފެބުރުވަރީ މަހުގެ 6 ވަނަ ދުވަހު، އެ ކަމަނާގެ ބައްޕާފުޅު ރަސްގެފާނު ޖޯޖް ހަތަރުވަނަ އަވަހާރަވުމާ ގުޅިގެންނެވެ. އެއިރު އެ ކަމަނާގެ އުމުރުފުޅަކީ 25 އެވެ.