ހަފްތާއެއް ތެރޭ އެސެސްމަންޓް ނިންމާ، ފަރަށް ލިބުނު ގެއްލުމުގެ ބަދަލު ހޯދަން ހުށައަޅާނަން: އީޕީއޭ
ޕްލެޓްފޯމް ފަރަށްއަރާ ވިލިމާލެ ފަރަށް ލިބުނު ގެއްލުމުގެ އެސެސްމަންޓް ހަފްތާއެއް ތެރޭ ނިންމާ، ލިބުނު ގެއްލުމުގެ ބަދަލު ހޯދަން ހުށައަޅާނެ ކަމަށް އެންވަޔަރަމަންޓަލް ޕްރޮޓެކްޝަން އެޖެންސީ އީޕީއޭއިން ބުނެފިއެވެ.
އީޕީއޭގެ ޑިރެކްޓަރ ޖެނެރަލް އިބްރާޙީމް ނަޢީމް ޕީއެސްއެމް ނިއުސްއަށް ވިދާޅުވީ، ފަރަށް ލިބުނު ގެއްލުން ބެލުމަށް އެ ސަރަޙައްދަށް ޑައިވްކޮށް، އޭގެ މަޢުލޫމާތު އެއްކޮށްފައިވާކަމަށެވެ.
ފަރަށް އެރި ފްލޯޓިން ޕްލެޓްފޯމްގެ ފައިތައް ޖެހި، ފަރުގެ އެކި ހިސާބުގައި ބޮޑެތި ވަޅުގަނޑުތަކެއް ވަނީ ހެދިފައެވެ. މީގެ ބައެއް ވަޅުގަނޑުތަކުގެެ ފުންމިނުގައި ދިހަވަރަކަށް ފޫޓު ހުއްޓެވެ. އަދި ހަ ފޫޓާއި ހަތަރު ފޫޓުގެ ވަޅުގަނޑުތައްވެސް ފަރުގައި ހުއްޓެވެ.
ނައީމް ވިދާޅުވީ އެއްކޮށްފައިވާ މަޢުލޫމާތުތައް އިތުރަށް ބަލާ، ލިބުނު ގެއްލުން ވަޒަން ކުރުމުގެ މަސައްކަތް ކުރިއަށްދާކަމަށާއި މި މަސައްކަތް ކުރިއަށް އޮތް ހަފްތާއެއްހާ ދުވަހުގެ ތެރޭގައި ނިމޭނެކަމަށެވެ.
ފަރަށް ބޮޑެތި ގެއްލުންތަކެއް ވުމާއިއެކު، މިކަމަށް ބަދަލު ހޯދުމުގެ ގޮތުން ޖުރިމަނާ ކުރާނެ ކަމަށް ނައީމް ވިދާޅުވިއެވެ. ނަމަވެސް ގެއްލުމަށް ބަދަލު ހޯދާނެ މިންވަރު އެނގޭނީީ މިހާރު ކުރިއަށްދާ އެނަލިސިސް މަސައްކަތްތަކަށް ފަހުގައިކަމަށް އޭނާ ވިދާޅުވިއެވެ.
ބްރިޖްގެ މަސައްކަތަށް ގެނެސްފައިވާ ފްލޯޓިން ޕްލެޓްފޯމް ވިލިމާލެ ފަރަށް އެރީ، މޫސުން ގޯސްވުމުގެ ސަބަބުން މިދިޔަ މަހުގެ 16 ވަނަ ދުވަހުއެވެ. ޕްލެޓްފޯމް ފަރަށް އެރީ ޕްލެޓްފޯމް އެ ސަރަޙައްދުގައި އެޅުމުގެ މަސައްކަތް ކުރިއަށްދަނިކޮށް، މޫސުން ގޯސްވެގެންނެވެ. ޕްލެޓްފޯމް ފުންކުރެވުނީ 10ވަރަކަށް ދުވަސް ފަހުން، މިދިޔަ މަހުގެ 27 ވަނަ ދުވަހުއެވެ.
މީގެ ކުރިންވެސް، ފަރަށް ގެއްލުން ލިބުމުގެ އެކި ހާދިސާތަކުގައި ބޮޑެތި އަދަދުތަކުން އެކި ފަރާތްތައް ޖޫރިމަނާކޮށްފައިވެއެވެ.