ފިލްމީ ތަރި ފައުޒިއްޔާ ހަސަން ނިޔާވެއްޖެއެވެ.
ފައުޒިއްޔާ ނިޔާވީ ސްރީލަންކާގައި މިއަދު ހެނދުނުގެ ވަގުތެއްގައެވެ.
މައުލޫމާތު ލިބިފައިވާ ގޮތުގައި ފައުޒިއްޔާ ނިޔާވީ މެޔަށް ތަދެއް އަރައިގެން ފަރުވާދެމުން އަންނަނިކޮށެވެ. ފައުޒިއްޔާ ނިޔާވެފައިވަނީ އުމުރުން 79 އަހަރުއެވެ. މައުލޫމާތު ލިބޭ ގޮތުގައި ފައުޒިއްޔާ ލަންކާއަށް ގޮސްފައިވަނީ އަމިއްލަ ދަތުރެއްގައެވެ.
ފައުޒިއްޔާއަކީ ރާއްޖޭގެ ފިލްމް އިންޑަސްޓްރީއަށް ގިނަ ދުވަސްތަކެއް ވަންދެން ޚިދުމަތްކޮށްދެއްވި ފަރާތެކެވެ. ގިނަ ބައެއްގެ މަގްބޫލްކަން ހޯދާފައިވާ ފައުޒިއްޔާ ފިލްމީ ދާއިރާގައި އުޅޭތާ 35 އަހަރަށް ވުރެން ގިނަ ދުވަސްވެއްޖެއެވެ.
ފައުޒިއްޔާ ވަނީ ދިވެހި އެތައް ފިލްމަކާއި، އެތައް ޑްރާމާއެއްގައި މަސައްކަތް ކޮށްފައެވެ. އޭނާ ފިލްމީ ދާއިރާއަށް ނިކުތީ "ސީދާ" ކިޔާ ފިލްމަކުން މަންމައެއްގެ ރޯލުންނެވެ. އަދި އެންމެ ފަހުން މަސައްކަތް ކޮށްފައިވަނީ މަޝްހޫރު ޑައިރެކްޓަރ މުހައްމަދު ނިޔާޒު (ޓެޑުރީ)ގެ "ލަސްވިޔަސް" ފިލްމުގައެވެ. އެއީ އަދި ނެރެފައިނުވާ ފިލްމެކެވެ. ފިލްމީ ދާއިރާގައި އެންމެ ގިނައިން އޭނާ ކުޅެފައިވަނީ މަންމައެއްގެ ރޯލެވެ.