އެމެރިކާގެ ކުރީގެ ރައީސް ޑޮނަލްޑް ޓްރަމްޕު ދިރިއުޅުއްވާ ރިސޯޓުން 700 އަށްވުރެ ގިނަ ސަފުހާގެ ސިއްރު ލިޔެކިޔުންތައް އަތުލައިގަނެފައިވާ ކަމުގައި އެ ޤައުމުގެ ޤައުމީ އަރުޝީފުން ބުނެފިއެވެ. ފްލޮރިޑާގެ ޕާމް ބޯޗުގެ މާރް-އަ-ލާގޯގައި ހުންނަ ޓްރަމްޕުގެ ރިސޯޓުން ގިނަ އަދަދެއްގެ ސިއްރު ލިޔެކުޔުންތަކެއް ހޯދާފައި ވަނީ މި މަހުގެ 8 ވަނަ ދުވަހު ފެޑެރަލް ބިޔުރޯ އޮފް އިންޓެލިޖެންސް (އެފް.ބީ.އައި)އިން ޖެހި ރޭޑެއްގައެވެ.
އެ ރޭޑުގައި އެފް.ބީ.އައި.އިން ވަނީ ވައިޓް ހައުސްގެ ލިޔެކިޔުންތައް ހުރި 20 ފޮށިގަނޑު ހޯދާފައެވެ. އޭގެ ތެރޭގައި އެމެރިކާގެ ޤައުމީ ސަލާމަތާ ގުޅުންހުރި މަޢުލޫމާތުގެ މައްޗަށް އެކުލެވޭ ސިއްރު ލިޔެކިޔުންތައް ހިމެނެއެވެ. އެ ޤައުމުގެ ޤައުމީ އަރުޝީފުން ޖަނަވަރީ މަހު ވެސް ވަނީ ޓްރަމްޕް ވަގަށް ގެންދަވާފައިވާ ގިނަ އަދަދެއްގެ ލިޔެކިޔުންތައް ހޯދާފައެވެ.
ޓްރަމްޕުގެ ރިސޯޓުން ހޯދާފައިވާ ލިޔެކިޔުންތަކުގެ ތެރޭގައި އެ ޤައުމުގެ ޤައުމީ ސަލާމަތާ ގުޅުންހުރި 700 އަށްވުރެ ގިނަ ސަފުހާގެ ސިއްރު ލިޔުންތައް ހޯދާފައިވާ ކަން ހާމަވެފައި ވަނީ، ޤައުމީ އަރުޝީފުން އިސްވެރިޔާ ޑެބްރާ ސްޓައިޑެލް ވޯލް، ޓްރަމްޕުގެ ކުރީގެ ޤާނޫނީ ވަކީލު އިވާން ކޮރްކޮރަންއަށް ފޮނުވި ސިޓީއެއްގައެވެ. އެ ސިޓީ މިހާރު ވަނީ ޢާންމު ކޮށްފައެވެ.
"ފޮށިތަކުގައި ހުރި ލިޔެކިޔުންތަކުގެ ތެރޭގައި 100 އަށްވުރެ ލިޔުންތައް ހުރި. އެއީ 700 އަށްވުރެ ގިނަ ސަފުހާގެ ލިޔެކިޔުންތައް. އޭގައި، އެންމެ މަތީ ލެވެލްގައި ސިއްރު ކޮށްފައިވާ ލިޔެކިޔުންތައް ހިމެނޭ. އަދި، ޤައުމީ ސަލާމަތާ ގުޅުންހުރި ލިޔެކިޔުންތައް ވެސް ހިމެނޭ،" ވޯލްގެ ސިޓީގައި ބުނެފައިވެއެވެ. ޓްރަމްޕް މި ލިޔެކިޔުންތައް ގެންދަވާފައި ވަނީ ރިޔާސީ އިންތިޚާބުން ނާކަމިޔާބުވެ، 2021 ޖަނަވަރީގައި ވައިޓް ހައުސްއިން ނިކުމެ ވަޑައިގެންނެވި އިރެވެ.
ލިޔުކިޔުންތައް ހޯދުމަށް އެފް.ބީ.އައި.އިން ހިންގި ރޭޑާ މެދު ޓްރަމްޕް ވަނީ ވަރަށް ބޮޑަށް ނުރުހުން ފާޅު ކުރައްވާފައެވެ. "އެފް.ބީ.އައި.ގެ އޮފިސަރުންގެ ބޮޑު ފައުޖެއް އައިސް މި ތަން ހިފައިފި. މި ތަނަށް ރޭޑު ޖަހާ ކަން ކުރިން އަންގާފައެއް ވެސް ނެތް. މުޅި ތަނުގައި އޮތީ އެފް.ބީ.އައި.ގެ އޮފިސަރުން. އެ މީހުން އައިސް އަހަރެންގެ ތިޖޫރީ ވެސް ފަޅައިލައިފި،" އެފް.ބީ.އައި.ގެ ރޭޑާ މެދު ހިތްހަމަނުޖެހުން ފާޅު ކުރައްވަމުން ޓްރަމްޕް ކުރިން ވިދާޅުވެފައިވެއެވެ.
އަދި، މިއީ ރައީސް ޖޯ ބައިޑަން އަޑީގައި ހުންނަވައިގެން ހިންގާފައިވާ އަމަލެއް ކަމުގައި ސިފަ ކުރައްވާފައެވެ. އެމެރިކާގެ ދައުލަތުގެ ހުރިހާ ލިޔެކިޔުންތަކެއް ބަލަހައްޓަނީ އެ ޤައުމުގެ ޤައުމީ އަރުޝީފުންނެވެ.